JOB 6
6
Si Job Nagasabdong sang Iya mga Abyan
1Niyan si Job nagsabat:
2“O kon gintimbang kuntani ang akon kasakit,
kag ang bug-os ko nga kalalat-an ginbutang sa mga timbangan!
3Kay karon mabug-at pa ini sa balas sang mga dagat;
busa ang akon mga polong nangin-madalas.
4Kay ang mga baslay sang Makaako yari sa sulud nakon;
ang dalit sini ginainum sang akon espiritu;
ang mga kakugmat sang Dios nagapaagisud sila batok sa akon.
5Nagahirihiri bala ang talonon nga asno kon sia may hilamon,
ukon nagaima bala ang baka sa iya kumpay?
6Makaon bala ang matab-ang nga wala maasini,
ukon may lalim bala sa puti sang itlog?
7Ang akon kalag nagadumili sa pagtandug sa ila;
sila subong sang kalan-on nga masum-ud sa akon.
8“O kabay pa nga maagum ko ang akon pangabay,
kag nga ang Dios magtugut sa akon sang butang nga akon ginahandum;
9nga mahamuut ang Dios sa pagligis sa akon,
nga pagbuhian niya ang iya kamut kag magtapus sa akon!
10Ini manginkalipay ko pa;
hoo, pasadyaha ako sa kasakit nga wala nagapasaylo;
nga wala ako magpanghiwala sang mga polong sang Balaan.
11Ano bala ang akon kusug, nga maghulat ako?
Kag ano bala ang akon katapusan, nga magpailub ako?
12Ang akon kusug kusug bala sang mga bato,
ukon ang akon unud saway bala?
13Indi bala nga wala ako sing kabulig sa sulud nakon,
kag nga ang kaalam ginpapalayo sa akon?
14“Sa iya nga daw mapunaw na pakitaan sing kalolo sang iya abyan
sia nga nagabiya sang kahadluk sang Makaako.
15Ang akon mga utud nagmalimbongon subong sang sapa,
subong sang ililigan sang mga sapa nga nagaagi,
16nga maitum tungud sang hielo,
kag sa diin ang nieve nagapanago.
17Sa tion nga mag-init nadula sila;
kon mag-init, matunaw sila sa ila duug.
18Ang mga katay sang manlalakat nga nagaagi sa dalanon nila nagalipas;
nagataklad sila sa kamingawan, kag nawala.
19Ang mga katay sang manlalakat sang Tema naglantaw,
ang mga guban sang Saba naghulat sa ila.
20Nahuy-an sila bangud nga naglaum sila;
nag-abut sila didto kag naglibog.
21Kay karon wala na kamo sing pulus;
nakakita kamo sing kakugmat, kag nahadluk.
22Nagsiling bala ako, ‘Hatagi ako’?
Ukon, ‘Doloti ako gikan sa imo pagkabutang’?
23Ukon, ‘Luwasa ako sa kamut sang kasumpung’?
Ukon, ‘Tubsa ako sa gahum sang mga manugpigos’?
24“Tudloi ako, kag magahipus ako;
pahangpa ako sa diin nakasayup ako.
25Daw ano kakusug sang mga polong sang pagkatarung!
Apang ang inyo pagsabdong ano bala ang ginasabdong niya?
26Nagahunahuna kamo bala sa pagsabdong sang mga polong,
sa ginatan-aw nga ang mga polong sang isa nga nagapanungonsungon subong sang hangin?
27Hoo, buut kamo magpapalad sa mga ilo,
kag magahimo nga inugbaligya sang inyo abyan.
28“Busa karon, magkahamuut sa pagtolok sa akon;
kay sa pagkamatuud indi ako magbutig sa inyo nawung.
29Balik, ginaampo ko sa inyo, magwala sing dipagkatarung.
Hoo, balik liwat, ang akon alatubangon matarung.
30May dipagkatarung bala sa akon dila?
Indi bala makapangilala sang malaut nga mga butang ang akon idilimdim?
Currently Selected:
JOB 6: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
