ISAIAS 50
50
Ang Ginoo Nagabulig sa mga Nagasalig sa Iya
1Amo ini ang ginasiling sang Ginoo:
“Diin bala ang sulat sa pagbulagay sang inyo iloy,
nga sa amo ginsikway ko sia?
Ukon sa kay sin-o bala sa akon mga nautangan
ginbaligya ko kamo?
Yari karon, tungud sang inyo kalautan ginbaligya kamo,
kag tungud sang inyo mga paglalis ginsikway ang inyo iloy.
2Ngaa bala sang pag-abut ko, walay tawo?
Sang pagtawag ko, ngaa walay masabat?
Ginpalip-ot bala nga mas-a ang akon kamut, nga indi makatubus?
Ukon wala bala ako sing gahum sa pagluwas?
Yari karon, sa akon pagsabdong ginapamala ko ang dagat,
ginahimo ko nga kamingawan ang mga suba;
ang ila mga isda nagabaho bangud nga walay tubig,
kag napatay sa kauhaw.
3Ginapanaptan ko sing kaitum ang kalangitan,
kag ginahimo ko nga panapton nga sako ang ila tabon.”
4Ang Ginoong Dios naghatag sa akon
sang dila sang mga ginaton-an,
agud nga makahibalo ako magsakdag sa polong
sa ginalapyo.
Nagamata sia agaaga,
ginapukaw niya ang akon idulungug
sa pagpamati subong sang mga ginaton-an.
5Ang Ginoong Dios nagbukas sang akon idulungug,
kag indi ako mabinatoon,
wala ako mag-isul.
6Ginataya ko ang akon likod sa mga manughanut,
kag ang akon mga pisngi sa mga naggabut sang bohok;
wala ko pagtagoa ang akon nawung
sa kahuya kag sa pagdupla.
7Kay ang Ginoong Dios magatabang sa akon;
busa wala ako mahangawa;
busa ginpalig-on ko ang akon nawung subong sang santikan,
kag nakahibalo ako nga indi ako pagpakahuy-an;
8malapit sia nga nagapakamatarung sa akon.
Sin-o bala ang magapakigsuay sa akon?
Magtindug kita sing tingub.
Sin-o bala ang akon kasumpung?
Magpalapit sia sa akon.
9Yari karon, ang Ginoong Dios magatabang sa akon;
sin-o bala ang magatagudili sa akon?
Yari karon, magadaan sila tanan subong sang panapton;
ut-uton sila sang sipit.
10Sin-o bala sa inyo ang nagakahadluk sa Ginoo
kag nagatuman sang tingug sang iya alagad,
ang nagalakat sa kadudulman,
kag walay kapawa,
apang magsalig sia sa ngalan sang Ginoo
kag magsandig sa iya Dios?
11Yari karon, tanan kamo nga nagadabok sing kalayo,
nga nagawagkus sing mga agipo!
Lakat kamo sa dabdab sang inyo kalayo,
kag sa mga agipo nga inyo gindabokan!
Amo ini ang maagum ninyo sa akon kamut:
magahigda kamo sa kasubo.
Currently Selected:
ISAIAS 50: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
