HEBREO 4

1Busa, sa nagapabilin pa ang saad sa pagsulud sa iya kapahuwayan, magkahadluk kita basi kon may isa sa inyo nga bilangon nga wala makalambut sini. 2Kay nag-abut sa aton ang maayong balita subong nga sa ila; apang ang polong nga nabatian wala nila mapusli, bangud nga wala mabuylogi sang pagtoo sang mga nakabati. 3Kay kita nga nagtoo nagasulud sa sinang kapahuwayan, subong nga iya nasiling,

“Subong nga nagsumpa ako sa akon kasingkal,

‘Indi gid sila makasulud sa akon kapahuwayan,’”#Sal. 95:11.

bisan nga natapus ang mga buhat niya kutub sa pagpasad sang kalibutan. 4Kay nasiling niya sa isa ka bahin nahanungud sa ikapitong adlaw sa sining bagay, “Kag ang Dios nagpahuway sa ikapitong adlaw gikan sa tanan niyang buluhaton.”#Gen. 2:2. 5Kag sa sining bahin liwat nagsiling sia,

“Indi gid sila makasulud sa akon kapahuwayan.”#Sal. 95:11.

6Sanglit niyan nabilin pa nga ang iban magsulud sini, kag ang mga nakabati anay sang maayong balita wala makasulud bangud sa pagkadimasinolondon, 7nagpat-ud sia liwat sing isa ka adlaw, “Karon nga adlaw,” nga nagasiling paagi kay David sa tapus ang malawig nga tion, subong sang nasiling,

“Karon nga adlaw kon mabatian ninyo ang iya tingug,

dili pagpatig-aha ang inyo mga tagiposoon.”#Sal. 95:7-8.

8Kay kon si Josue nakahatag sa ila sing kapahuwayan,#Deut. 31:7; Jos. 22:4. wala ang Dios kuntani maghambal sa olihi sang iban pa nga adlaw. 9Gani niyan, may nabilin pa nga isa ka adlaw nga inugpahuway nga sa katawohan sang Dios; 10kay sia nga nagasulud sa kapahuwayan sang Dios nagapahuway man sa iya mga buhat subong nga ang Dios sa iya.#Gen. 2:2.

11Busa maghimulat kita sa pagsulud sa sinang kapahuwayan, agud nga walay tawo nga maholog sa among huwaran sang pagkadimasinolondon. 12Kay ang polong sang Dios buhi kag gamhanan, matalum pa sa bisan ano nga espada nga duha sing sulab, nga nagalapus tubtub sa nautlan sang kalag kag espiritu, sang mga lutalutahan kag utuk, kag nagahantup sang mga hunahuna kag mga tinutuyo sang tagiposoon. 13Kag walay tinuga nga indi hayag sa atubangan niya, kondi ang tanan hublas kag dayag sa mga mata niya nga hatagan ta sing husay.

Si Jesus ang Dakung Pinakamataas nga Sacerdote

14Niyan kay kita may daku nga pinakamataas nga sacerdote nga nakalatas sang mga langit, si Jesus, ang Anak sang Dios, lig-onon ta ang aton pagtu-ad. 15Kay wala kita sing isa ka pinakamataas nga sacerdote nga indi matandug sang aton mga kaluyahon, kondi isa nga nasulay sa tanan nga bagay kaangay naton, apang wala nagapakasala. 16Niyan magpalapit kita nga may pagsalig sa trono sang bugay, agud nga makabaton kita sing kalooy kag makaagum sing bugay sa pagbulig sa aton sa tion sang kinahanglan.

Currently Selected:

HEBREO 4: ABHIL82

Highlight

Copy

Compare