HEBREO 12

Nagatolok kay Jesus

1Busa, sanglit ginalibutan kita sing tama kadaku nga panganod sang mga saksi, isikway ta man ang tagsa ka kabug-atan, kag ang sala nga nagatapik gid, kag magdalagan kita nga may pagbatas sang dalaganon nga ginabutang sa aton atubang, 2nga nagatolok kay Jesus nga pangolo kag manughimpit sang aton pagtoo, nga tungud sa kalipay nga ginbutang sa iya atubang nagbatas sang cruz, nga nagatamay sang kahuluy-an, kag nagalingkod sa too sang trono sang Dios.

3Talupangda sia nga nagbatas sang amo nga pagsumpung sang mga makasasala batok sa iya kaugalingon, agud nga indi kamo paglapyoon ukon pagpunawon sa inyo mga kalag. 4Sa inyo pagpanikasug batok sa sala wala pa kamo makapakigsumpung tubtub sa pagpaagay sang inyo dugo. 5Kag nalimutan bala ninyo ang laygay nga nagapahanumdum sa inyo subong sa mga anak?—

“Anak ko, dili pagtamaya ang disiplina sang Ginoo,

ukon mapunaw kon silotan ka niya.

6Kay ang ginahigugma sang Ginoo ginadisiplina niya,

kag ginahampak ang tagsa ka anak nga ginabaton niya.”#Job 5:17; Hulu. 3:11-12.

7Tungud sa disiplina kinahanglan nga magbatas kamo. Ang Dios nagakabig sa inyo subong nga mga anak; kay sin-o bala ang anak nga wala ginadisiplina sang iya amay? 8Kon wala kamo ginadisiplina, diin ang tanan umalambit, niyan mga onon kamo kag indi mga anak. 9Labut pa, may mga ginikanan kita nga dutan-on sa pagdisiplina sa aton kag ginatahud ta sila. Indi bala kita magpasakup sing labi pa sa Amay sang mga espiritu kag magkabuhi? 10Kay sila nagdisiplina sa aton sa malip-ot nga tion sa luyag nila, apang sia nagadisiplina sa aton sa kapuslanan ta, agud nga mangin-umalambit kita sang iya pagkabalaan. 11Ang tanan nga pagdisiplina sa malip-ot nga tion daw masakit sa baylo nga makalipay; sa olihi nagapatubas ini sing madaiton nga bunga sang pagkamatarung sa mga nahanas sa sini.

Paandam batok sa Pagsikway sang Bugay sang Dios

12Busa bayawa ang nagapamuypuy nga mga kamut kag ang maluya nga mga tuhud pabakura,#Isa. 35:3. 13kag maghimo sing mga banas nga matadlong sa inyo mga tiil,#Hulu. 4:26. agud nga ang piang indi magliw-as kondi hinonoo mag-ayo. 14Tinguhaa ninyo ang pagpakighidait sa tanan nga tawo, kag ang pagkabalaan nga sa wala ini walay tawo nga makakita sang Ginoo. 15Tatapa nga walay isa nga makulangan sang bugay sang Dios; nga walay “gamut sang kapaitan”#Deut. 29:18. nga mag-ulhot kag magtublag sa inyo, kag bangud sini madagtaan ang madamu; 16nga walay isa nga magmakihilawason ukon di-espirituhanon subong kay Esau, nga sa isa ka kaonan nagbaligya sang iya pagkapanganay.#Gen. 25:29-34. 17Kay nahibaloan ninyo nga sang olihi, sang buut sia magpanubli sang pagpakamaayo, ginsikway sia, kay wala na sia sing kahigayonan sa paghinulsul, bisan ginpangita niya ini nga may mga luha.#Gen. 27:30-40.

18Kay wala kamo magpalapit sa sarang matandug, ang nagadabdab nga kalayo, kag kadudulman, kag sa mangitongito, kag sa bagyo, 19kag sa tonog sang budyong, kag sa tingug nga bangud sang iya mga polong ang mga nakabati nagpakilooy nga indi na sila paghambalan pa sing mga balita.#Ex. 19:16-22; 20:18-21; Deut. 4:11-12; 5:22-27. 20Kay indi sila makabatas sang ginhatag nga sogo, “Kon bisan ang isa ka sapat magtandug sang bukid, batohon ini.”#Ex. 19:12-13. 21Sa pagkamatuud, tama kamakahaladluk ang nakita nga si Moises nagsiling, “Nagakurug ako sa kahadluk.”#Deut. 9:19. 22Kondi nagapalapit kamo sa Bukid nga Sion kag sa banwa sang Dios nga buhi, ang Jerusalem nga langitnon, kag sa dimaisip nga mga manugtunda sa malipayon nga pagtilipon, 23kag sa katilingban sang mga panganay nga nalista sa langit, kag sa hukom nga Dios sang tanan, kag sa mga espiritu sang matarung nga mga tawo nga nahimpit, 24kag kay Jesus, nga manugpatunga sang bag-o nga katipan, kag sa dugo nga ginwisik nga nagahambal sing maayo pa sang sa dugo ni Abel.#Gen. 4:10.

25Andam kamo nga indi ninyo pag-isikway ang nagahambal. Kay kon wala sila makalikaw sang ginsikway nila ang nagpaandam sa ila sa duta,#Ex. 20:19. labi pa gid kita nga indi makalikaw kon kita magbiya sa iya nga nagapaandam gikan sa langit. 26Ang iya tingug nagtay-ug anay sang duta; apang karon nagsaad sia, “Apang liwat pa pagatay-ugon ko indi lamang ang duta kondi man ang langit.”#Hag. 2:6. 27Ining polong, “Apang liwat pa,” nagapahayag sang pagkuha sang gintay-ug, subong sang nahimo, agud nga ang mga butang nga indi matay-ug magpabilin. 28Busa magpasalamat kita nga nakabaton sing ginharian nga indi matay-ug, kag gani magdolot kita sa Dios sing pagsimba nga kalahamut-an, nga may pagtahud kag kahangawa; 29kay ang aton Dios amo ang kalayo nga nagapapas.#Deut. 4:24.

Currently Selected:

HEBREO 12: ABHIL82

Highlight

Copy

Compare