HEBREO 1
1
Ang Dios Naghambal paagi sa Iya Anak
1Ang Dios sa dumaan nga tion naghambal sa aton mga ginikanan paagi sa mga manalagna sa madamu kag sarisari nga bagay; 2apang sa sining olihi nga mga adlaw naghambal sia sa aton paagi sa Anak, nga ginhimo niya nga manunubli sang tanan nga butang, nga paagi sa iya man gintuga niya ang kalibutan. 3Sia nagapabanaag sang himaya sang Dios kag nagadala sang larawan gid sang iya kinaugali, nga nagapadayon sang tanan nga butang paagi sa iya polong nga gamhanan. Sang nahimo niya ang pagtinlo sang mga sala, naglingkod sia sa too sang Pagkahalangdon sa hitaas, 4nga nanginmaayo pa sa mga manugtunda sanglit nga nakaagum sia sing ngalan nga halangdon pa sang sa ila.
Ang Anak Labi pa sa mga Manugtunda
5Kay sa kay sin-o bala sang mga manugtunda sa bisan kon san-o nagsiling ang Dios,
“Ikaw ang Anak ko,
karon nga adlaw nangin-anak ko ikaw”#Sal. 2:7.?
Ukon liwat,
“Ako mangin-amay sa iya,
kag sia mangin-anak sa akon”#2 Sam. 7:14; 1 Cron. 17:13.?
6Kag liwat, sang ginadala niya ang iya panganay sa kalibutan, nagasiling sia,
“Pasimbaha sa iya ang tanan nga manugtunda sang Dios.”#Deut. 32:43, sa Griego.
7Nahanungud sa mga manugtunda nagasiling sia,
“Nga nagahimo sang iya mga manugtunda nga mga hangin,
kag sang iya mga alagad nga mga dabdab sang kalayo.”#Sal. 104:4.
8Apang nahanungud sa Anak nagasiling sia,
“Ang imo trono, O Dios,#1:8 Ukon ang Dios imo trono. sa katuigan sang katuigan,
ang cetro nga matarung amo ang cetro sang imo ginharian.
9Ginhigugma mo ang pagkamatarung kag gindumtan ang kalautan;
busa ang Dios, ang imo Dios, naghaplas sa imo
sang lana sang kalipay labaw sa imo mga kaupud.”#Sal. 45:6-7.
10Kag,
“Ikaw, Ginoo, sa ginsuguran nagpahamtang sang sadsaran sang duta,
kag ang mga langit binuhatan sang imo mga kamut;
11sila mawala, apang ikaw nagapadayon;
sila tanan magadaan subong sang panapton,
12lukuton mo sila subong sang kunup,
kag baylohan sila.
Apang ikaw amo sa gihapon,
kag ang imo mga tuig magapadayon.”#Sal. 102:25-27.
13Apang sa kay sin-o bala sang mga manugtunda sa bisan kon san-o nagsiling sia,
“Lingkod ka sa akon too,
tubtub nga mahimo ko ang imo mga kaaway
nga palatungan sang imo mga tiil”#Sal. 110:1.?
14Indi bala sila tanan espiritu nga manug-alagad nga ginpadala sa pag-alagad, tungud sa ila nga magaagum sang kaluwasan?
Currently Selected:
HEBREO 1: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
