HABACUC 3
3
Ang Pangamuyo ni Habacuc
1Pangamuyo ni Habacuc nga manalagna, nga nabagay sa Sigyonot.
2O Ginoo, nabatian ko ang sugid nahanungud sa imo,
kag sang imo buluhaton, O Ginoo, nahadluk ako.
Buhi-a ini sa tunga sang katuigan;
sa tunga sang katuigan ipakilala ini,
sa kasingkal dumduma ang kalooy.
3Ang Dios nag-abut gikan sa Teman,
kag ang Balaan gikan sa Bukid nga Paran.
Ang iya himaya nagatugub sang mga langit,
kag ang duta napuno sang iya pagdayaw. Sela
4Ang iya kasilaw subong sang kapawa,
may mga silak sia nga nagagowa sa iya kamut;
kag didto ang palanagoan sang iya gahum.
5Nagauna sa iya ang kamatay,
kag ang kalayohon nga kirab nagagowa sa iya mga tiil.
6Nagtindug sia kag nagtakus sang duta;
nagtolok sia kag ginpabulag ang mga pungsud;
niyan ang dayon nga mga bukid ginpaaplaag,
ang kabakoloran nga nagapadayon nagsalup.
Ang iya mga paglakat subong sang dumaan.
7Nakita ko ang mga layanglayang sang Cusan sa kapipit-an;
ang mga kumbung sang duta sang Midian nagkurug.
8O Ginoo, ang imo kasingkal batok bala sa mga suba?
Batok bala sa mga suba ang imo kaakig,
ukon ang imo kaakig batok sa dagat,
sang nagsakay ka sa imo mga kabayo,
sa imo mga kangga sang kaluwasan?
9Ang imo pana ginhublasan mo,
kag ginbutang sa mga lubid ang baslay. Sela
Ginpalitik mo ang duta sing mga suba.
10Nakakita sa imo ang mga bukid, kag nagkahadluk;
nag-agi ang unus sang mga tubig;
ang kadadalman nagmitlang sang iya tingug,
nagbayaw ini sang iya mga kamut sa hitaas.
11Ang adlaw kag ang bulan nagdolog sa ila puluy-an
sa kapawa sang imo mga baslay sang nag-agi sila,
sa kasilaw sang imo bangkaw nga nagaidlap.
12Ginlatas mo ang duta sa kaalipungut,
ginlinas mo ang mga pungsud sa kaakig.
13Naggowa ka tungud sa kaluwasan sang imo katawohan,
tungud sa kaluwasan sang imo hinaplas.
Ginpilasan mo ang pangolo gikan sa balay sang malauton nga tawo,
nga nagahublas sang iya paa tubtub sa liog. Sela
14Ginpalapsan mo sang imo mga bangkaw ang olo sang iya mga mangangaway,
nga nag-abut sila subong sang buhawi sa pagpaaplaag sa akon,
nga nagakalipay subong sang nagahalunhon sang makalolooy sa tago.
15Ginpatasak mo sa imo mga kabayo ang dagat,
ang tinumpok sang dalagku nga mga tubig.
16Nabatian ko, kag nagkurug ang akon lawas,
ang akon mga bibig nagkurug sa tingug;
ang kagabok nagasulud sa akon mga tul-an,
sa akon duug nagakurug ako.
Ako magahulat sing hipus sa adlaw sang kalisdanan
nga magaabut sa katawohan nga nagagubat sa aton.
17Bisan ang higuera indi magpamulak,
ukon walay bunga sa mga uvas;
ang patubas sang olivo mawad-an,
kag ang mga latagon indi magpatubas sing kalan-on,
ang panong mapapas sa toril
kag walay kabakahan sa mga palasudlan,
18apang ako magakasadya sa Ginoo,
magakalipay ako sa Dios sang akon kaluwasan.
19Ang Dios, ang Ginoo, amo ang akon kusug;
ginahimo niya ang akon mga tiil subong sang iya sang mga usa,#2 Sam. 22:34; Sal. 18:33.
palakton niya ako sa akon mataas nga mga duug.
Sa pangulo nga manuglanton: sa akon mga tulunggon nga may cuerdas.
Currently Selected:
HABACUC 3: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
