GENESIS 37
37
Si Jose Ginbaligya pa Egipto
1Si Jacob nagpuyo sa duta nga ginpanlugayawan sang iya amay, sa duta sang Canaan. 2Ini amo ang maragtas sang panimalay ni Jacob.
Si Jose, nga nagapanuigon sing napulog pito ka tuig, nagapahalab sang panong upud sa iya mga utud; sia pamatan-on kaupud sa mga lalaking anak ni Bilha kag ni Zilpa, mga asawa sang iya amay; kag si Jose nagdala sa ila amay sing malaut nga balita nahanungud sa ila. 3Karon ginhigugma ni Israel si Jose sing labi pa sa tanan niya nga kabataan, bangud nga anak sia sang iya katigulangon; kag ginhimoan niya sia sing panapton nga madamu sing duag. 4Apang sang nakita sang iya mga utud nga ang ila amay naghigugma sa iya sing labi pa sa tanan niya nga utud, gindumtan nila sia, kag indi sila makahambal sa iya sing madaiton.
5Karon si Jose nagdamgo sing isa ka damgo, kag sang ginsugid niya ini sa iya mga utud sila nagdumut pa gid sa iya. 6Nagsiling sia sa ila, “Pamati kamo sining damgo nga gindamgo ko: 7yari karon, nagabugkos kita sing mga linaylay sa uma, kag yari karon, ang akon linaylay nagbangon kag nagtindug sing matadlong; kag yari karon, ang inyo mga linaylay naglibut sa sini, kag nagyaub sa akon linaylay.” 8Ang iya mga utud nagsiling sa iya, “Magahari ka bala sa amon sa pagkamatuud? Ukon magagahum ka bala sa amon sa pagkamatuud?” Gani sila nagdumut pa gid sa iya tungud sang iya mga damgo kag sang iya mga polong. 9Niyan nagdamgo sia sing isa pa ka damgo, kag ginsugid ini sa iya mga utud, kag nagsiling, “Yari karon, nagdamgo ako sing isa pa ka damgo; kag yari karon, ang adlaw, ang bulan, kag ang napulog isa ka bitoon nagayaub sa akon.” 10Apang sang ginsugid niya ini sa iya amay kag sa iya mga utud, ang iya amay nagbadlong sa iya, kag nagsiling sa iya, “Ano bala nga damgo ining gindamgo mo? Magakari gid bala ako kag ang imo iloy kag ang imo mga utud sa pagyaub sa duta sa imo?” 11Kag ang iya mga utud nahisa sa iya,#Binu. 7:9. apang ang iya amay nagpamalandong sang pinamolong.
12Karon ang iya mga utud nagkadto sa pagpahalab sang panong sang ila amay sa Siquem. 13Kag si Israel nagsiling kay Jose, “Wala bala nagapahalab ang imo mga utud sang panong sa Siquem? Kari ka, ipadala ko ikaw sa ila.” Kag nagsiling sia sa iya, “Yari ako.” 14Gani nagsiling sia sa iya, “Lakat ka karon, tan-awa kon maayo ang imo mga utud, kag ang panong; kag dalhi ako sing polong.” Gani ginpadala niya sia tubtub sa nalupyakan sang Hebron, kag sia nag-abut sa Siquem. 15Kag nakita sia sang isa ka tawo nga nagadalangdalang sia sa latagon; kag ginpamangkot sia sang tawo, “Ano bala ang ginapangita mo?” 16Nagsiling sia, “Nagapangita ako sang akon mga utud, ginaampo ko sa imo, sugiri ako kon diin sila nagapahalab.” 17Kag nagsiling ang tawo, “Naghalin sila gikan diri, kay nabatian ko sila nga nagasiling, ‘Makadto kita sa Dotan.’” Gani si Jose nag-apas sa iya mga utud, kag nakita sila sa Dotan. 18Nalantawan nila sia sa malayo, kag sa wala pa sia makapalapit sa ila naghimbon sila sa pagpatay sa iya. 19Nagsinilingay sila, “Nagapakari ining paladamgo. 20Kari kamo karon, patyon naton sia kag iholog sia sa isa sang mga boho; niyan magasiling kita nga ang isa ka talonon nga sapat nagtukub sa iya, kag tan-awon naton kon ano ang madangatan sang iya mga damgo.” 21Apang sang nabatian ini ni Ruben, ginluwas niya sia sa ila kamut, nga nagasiling, “Indi naton sia pagpatyon.” 22Kag si Ruben nagsiling sa ila, “Dili kamo magpaagay sing dugo; iholog sia sa sining boho nga yari sa kamingawan, apang dili pagsakiton sia”—agud nga maluwas niya sia gikan sa ila kamut, sa pag-uli sa iya sa iya amay. 23Gani sang nag-abut si Jose sa iya mga utud, gin-ubahan nila si Jose sang iya bayo nga malaba, ang bayo nga madamu sing duag nga nasuklub niya; 24kag gindakup nila sia kag ginholog sia sa boho. Ang boho wala sing sulud, wala sing tubig ini.
25Niyan naglingkod sila sa pagkaon sing tinapay; kag sang ginabayaw nila ang ila mga mata nalantawan nila ang isa ka katay sang mga Ismaelnon nga nagapakari gikan sa Galaad, upud sang ila mga camelyo nga napakuluhan sing mga pahamut, ihalaplas, kag mirra, nga nagadala sini padulhog sa Egipto. 26Niyan si Juda nagsiling sa iya mga utud, “Ano bala ang kapuslanan kon patyon ta ang aton utud kag tabonan ang iya dugo? 27Kari kamo, ibaligya naton sia sa mga Ismaelnon, kag dili naton pagsakiton sia, kay aton utud sia, aton unud.” Kag ang iya mga utud nagpamati sa iya. 28Niyan nag-agi ang mga manugbaligya nga Midianhon; kag ginbatak nila kag ginpagowa si Jose sa boho, kag ginbaligya si Jose sa mga Ismaelnon sing duha ka pulo ka bilog nga pilak; kag gindala nila si Jose sa Egipto.#Binu. 7:9.
29Sang nagbalik si Ruben sa boho kag nakakita nga wala na si Jose sa boho, ginkusnit niya ang iya mga panapton 30kag nagbalik sa iya mga utud, kag nagsiling, “Ang bata wala na; kag ako, sa diin bala ako makadto?” 31Niyan ginkuha nila ang malaba nga bayo ni Jose, kag nagpatay sing kanding, kag gintum-oy sa dugo ang bayo; 32kag ginpadala nila ang bayo nga madamu sing duag kag gindala ini sa ila amay, kag nagsiling, “Ini amon nakita; tan-awa karon kon ini bayo sang imo anak ukon indi.” 33Kag nakilala niya ini, kag nagsiling, “Bayo ini sang akon anak; isa ka sapat nga talonon nagtukub sa iya; sa wala sing duhaduha ginkusnit si Jose.” 34Niyan ginkusnit ni Jacob ang iya mga panapton, kag nagtampion sia sing panapton sa lalaw, kag naglalaw tungud sa iya anak sa madamung mga adlaw. 35Kag nagtindug ang tanan niya nga anak nga lalaki kag ang tanan niya nga anak nga babayi sa paglipay sa iya; apang sia nagdumili nga lipayon; kag nagsiling, “Indi, magapanaug ako nga nagalalaw sa akon anak sa Sheol.” Sa amo naghibi ang iya amay tungud sa iya. 36Kag ginbaligya sia sang mga Midianhon sa Egipto kay Potifar, manugdumala ni Faraon, pangolo sang mga bantay.
Currently Selected:
GENESIS 37: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society