GENESIS 12
12
Ang Pagtawag sang Dios kay Abram
1Karon ang Ginoo nagsiling kay Abram, “Halin ka sa imo duta kag sa imo kahimataan kag sa balay sang imo amay pakadto sa duta nga akon igapakita sa imo.#Binu. 7:2-3; Heb. 11:8. 2Kag himoon ko gikan sa imo ang isa ka pungsud nga daku, kag pakamaayohon ko ikaw, kag padakuon ang imo ngalan, kag manginpagpakamaayo ikaw. 3Pakamaayohon ko ang mga nagapakamaayo sa imo, kag ang nagapakamalaut sa imo pakamalauton ko; kag sa imo pakamaayohon ang tanan nga mga panimalay sang duta.#Gal. 3:8.
4Gani naglakat si Abram, sono sa napamolong sa iya sang Ginoo; kag nag-upud sa iya si Lot. Si Abram kapitoan kag lima ka tuig sang pagtaliwan niya sa Haran. 5Kag gindala ni Abram si Sarai nga iya asawa, kag si Lot nga anak sang iya utud, kag ang tanan nga pagkabutang nila nga ila natipon, kag ang mga kalag nga ila naangkon sa Haran; kag naglakat sila sa pagkadto sa duta sang Canaan. Sang nag-abut sila sa duta sang Canaan, 6si Abram naglatas sa duta pakadto sa duug sang Siquem, sa terebinto sang More. Sa sadtong tion ang mga Canaanhon yara pa sa duta. 7Niyan ang Ginoo nagpahayag kay Abram, kag nagsiling, “Sa imo kaliwat ihatag ko ining duta.”#Binu. 7:5; Gal. 3:16. Gani nagpatindug sia didto sing halaran sa Ginoo, nga nagpahayag sa iya. 8Nagliton sia gikan didto pakadto sa bukid sa sidlangan sang Bet-el, kag nagpatindug sang iya layanglayang, nga ang Bet-el sa katundan kag ang Ai sa sidlangan; kag nagtukud sia didto sing halaran sa Ginoo kag nagpanawag sa ngalan sang Ginoo. 9Kag si Abram nagpanlakatan, nga nagapakadto pa nayon sa Bagatnan.
Si Abram sa Egipto
10Karon may tiggulutum sa duta. Gani nagdulhog si Abram sa Egipto sa pagpabilin didto, kay matama ang tiggulutum sa duta. 11Sang naghinamput sia sa Egipto, nagsiling sia kay Sarai nga iya asawa, “Ginakilala ko nga ikaw babayi nga maanyag tolokon; 12kag kon makita ka sang mga Egiptohanon, magasiling sila, ‘Ini asawa niya’; niyan patyon nila ako, apang ikaw hilwayon nila nga buhi. 13Isiling ikaw akon utud nga babayi,#Gen. 20:2; 26:7. agud nga magmaayo sa akon tungud sa imo, kag nga magkabuhi ang akon kalag bangud sa imo.” 14Sang nakasulud si Abram sa Egipto nakita sang mga Egiptohanon nga ang babayi tama kaanyag. 15Kag sang nakita sia sang mga principe ni Faraon, gindayaw sia kay Faraon. Kag gindala ang babayi sa balay ni Faraon. 16Kag tungud sa iya si Faraon naghimo sing maayo kay Abram; kag may mga carnero sia, mga baka, mga asno nga lalaki, mga ulipon nga lalaki, mga ulipon nga babayi, mga bakiya nga asno, kag mga camelyo.
17Apang gindautan sang Ginoo si Faraon kag ang iya panimalay sang dalagku nga mga kalalat-an bangud kay Sarai, asawa ni Abram. 18Gani gintawag ni Faraon si Abram, kag nagsiling, “Ano bala ining ginhimo mo sa akon? Ngaa bala nga wala mo ako sugiri nga sia imo asawa? 19Ngaa bala nga nagsiling ka, ‘Utud ko sia,’ sa bagay nga ginkuha ko sia nga mangin-akon asawa? Busa karon, yara ang imo asawa, kuhaa sia, kag lakat ka.” 20Kag si Faraon nagtulin sa mga tawo nahanungud kay Abram; kag gindulong nila sia, upud ang iya asawa kag ang tanan nga iya.
Currently Selected:
GENESIS 12: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society