EZEQUIEL 19
19
Panalabiton tungud sa mga Principe sa Israel
1Kag ikaw, panalabiton ka tungud sa mga principe sang Israel, 2kag magsiling:
Daw anong leon nga babayi ang imo iloy
sa tunga sang mga leon!
Sa tunga sang bataon nga mga leon nagluko sia,
ginsagud niya ang iya mga totoy.
3Kag ginpadaku niya ang isa sang iya mga totoy;
nanginbataon nga leon sia,
kag nakatoon sia sa pagtukub sang tulukbon;
naghalunhon sia sing mga tawo.
4Ang mga pungsud man nakabati nahanungud sa iya;
nadakup sia sa boho nila;
kag gindala nila sia nga may mga kaw-it
pakadto sa duta sang Egipto.
5Sang nakita niya nga naghulat sia,
nga ang iya paglaum nadula,
nagkuha sia sing isa na man sang iya mga totoy
kag ginhimo sia nga leon nga bataon.
6Nagpakadto-pakari sia sa tunga sang mga leon;
nanginbataon sia nga leon;
kag nakatoon sia sa pagtukub sang tulukbon;
naghalunhon sia sing mga tawo.
7Kag nakahibalo sia sang ila mga palacio,
kag nagwagwag sang ila kabanwaanan;
kag ang duta nagmingaw kag ang kabug-osan niya
bangud sang kagahud sang iya pagngurab.
8Niyan ang mga pungsud nagpahamtang batok sa iya
sa tagsa ka luyo gikan sa mga puud;
ginhumlad nila sa ibabaw niya ang ila pukot;
nadakup sia sa ila boho.
9Ginbutang nila sia sa hawla nga may mga kaw-it,
kag gindala sia sa hari sang Babilonia;
ginpasulud nila sia sa mga pamakud,
agud nga ang iya tingug indi na mabatian
sa kabukiran sang Israel.
10Ang imo iloy nanginkaangay sang uvas sa ulubasan
nga gintanum sa ubay sang mga tubig,
mabungahon ini kag puno sang mga sanga
bangud sang madamung tubig.
11May mabakud nga mga sanga ini
nga sa mga cetro sang mga naggahum;
ang ila kataas ginpalambut
sa tunga sang mga sanga nga madabung;
nakita sila sa ila kataason
upud sang kadam-an sang ila mga sanga.
12Apang gingabut ini sa kasingkal,
ginpilak ini sa duta;
ang salatan naghuyus sang iya bunga;
ang iya mabakud nga mga sanga ginbali kag nalaya;
gin-upud sila sang kalayo.
13Karon gintanum ini sa kamingawan,
sa duta nga mamala kag kigas.
14Kag ang kalayo nagagowa sa mga bilogon sang iya mga sanga,
naghalunhon ini sang iya bunga,
sa bagay nga wala sa iya sing sanga nga mabakud,
nga mangincetro sa paggahum.
Ini panalabiton, kag manginpanalabiton.
Currently Selected:
EZEQUIEL 19: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
