EZEQUIEL 13
13
Dimatuud nga mga Manalagna Gintagudilian
1Nag-abut sa akon ang polong sang Ginoo: 2“Anak sang tawo, tagna batok sa mga manalagna sang Israel nga nagatagna, kag isiling sa ila nga nagatagna gikan sa ila kaugalingon nga tagiposoon: ‘Pamatii ninyo ang polong sang Ginoo!’ 3Amo ini ang ginasiling sang Ginoong Dios, Kailo ang mga manalagna nga buangbuang nga nagasonod sa ila kaugalingon nga espiritu, kag walay bisan anong nakita! 4O Israel, ang imo mga manalagna kaangay sang mga ido nga talonon sa nawagwag nga mga duug. 5Wala kamo magsaka sa mga bulwang, ukon magpatindug nga sa panimalay sang Israel, sa pagtindug sa inaway sa adlaw sang Ginoo. 6Nakakita sila sing dimatuud kag binutig nga pagpamakot; nga nagasiling, ‘Nagasiling ang Ginoo,’ apang ang Ginoo wala magpadala sa ila, kag ginpalaum nila ang mga tawo nga ang polong palig-onon. 7Wala kamo bala makakita sing dimatuud nga palanan-awon, kag wala kamo magpamolong sing dimatuud nga pagpamakot, sa nagasiling kamo, ‘Ang Ginoo nagasiling,’ sing ugai wala ako magpamolong?”
8Busa amo ini ang ginasiling sang Ginoong Dios: “Bangud nga nagpamolong kamo sing dimatuud kag nakakita sing mga butig, busa yari karon, ako batok sa inyo, nagasiling ang Ginoong Dios. 9Ang akon kamut manginbatok sa mga manalagna nga nagatan-aw sing dimatuud nga mga palanan-awon kag nagapamakut sing kabutigan; indi sila makasimpon sa kasapulan sang akon katawohan, ukon masulat sila sa listahan sang panimalay sang Israel, kag indi sila magsulud sa duta sang Israel; kag makilala ninyo nga Ako amo ang Ginoong Dios. 10Bangud nga, bangud gid nga ginhaylo nila ang akon katawohan, nga nagasiling, ‘Paghidait,’ nga walay paghidait;#Jer. 6:14; 8:11. kag kon ang isa nagapatindug sing kuta, yari karon, ginagalagalahan nila ini sang wala masimbogi; 11isiling sa ila nga nagagalagala sini sing wala masimbogi nga ini mapukan! May mabunok nga ulan, kag kamo, O dalagkung mga hielo nga daw bato, magatupa, kag ang mabagyohon nga hangin magapalitik sini; 12kag kon mapukan ang kuta indi bala pag-isiling sa inyo, ‘Diin na bala ang galagala nga gingalagala ninyo sini?’ 13Busa amo ini ang ginasiling sang Ginoong Dios: Palitikon ko gid ini sang mabagyohon nga hangin sa akon kasingkal; kag may mabunok nga ulan sa akon kaakig, kag dalagku nga mga hielo nga daw bato sa kasingkal sa pagpapas sini. 14Gani lumpagon ko ang kuta nga gingalagalahan ninyo sing wala masimbogi, kag dalhon ini paidalum sa duta, agud nga mabuksan ang iya sadsaran; kon mapukan ini, papason kamo sa tunga niya; kag makilala ninyo nga Ako amo ang Ginoo. 15Sa sini matuman ko ang akon kasingkal sa kuta, kag sa mga naggalagala sini sing wala masimbogi; kag magasiling ako sa inyo, wala na ang kuta, ukon sila nga naggalagala sini, 16ang mga manalagna sang Israel nga nagatagna nahanungud sang Jerusalem kag nagatan-aw sing mga palanan-awon sang paghidait tungud sa iya, nga walay paghidait, nagasiling ang Ginoong Dios.
17“Kag ikaw, anak sang tawo, ituhoy ang imo nawung batok sa mga anak nga babayi sang imo katawohan, nga nagatagna gikan sa ila kaugalingon nga tagiposoon; tagna ka batok sa ila 18kag isiling, Amo ini ang ginasiling sang Ginoong Dios: Kailo sa mga babaying nagatahi sing mga hamil sa tanan nga siko, kag nagahimo sing mga panyo sa olo sang mga tawo sa tagsa ka kataason, sa pagdakup sing mga kalag! Dakpon ninyo bala ang mga kalag sang akon katawohan, kag magsagup nga buhi sing mga kalag, nga sa inyo kaugalingon? 19Ginpasipalahan ninyo ako sa tunga sang akon katawohan tungud sa mga tinapnay nga sebada kag tungud sa mga tinipik nga tinapay, sa pagpatay sang mga kalag nga indi dapat mapatay, kag sa pagluwas nga buhi sang mga kalag nga indi dapat magkabuhi, sa inyo pagbutig sa akon katawohan, nga nagapamati sa kabutigan.
20“Busa amo ini ang ginasiling sang Ginoong Dios: Yari karon, ako batok sa inyo mga hamil nga sa ila nagapandakup kamo sang mga kalag sa pagpalupad sa ila, kag kusniton ko sila gikan sa inyo mga butkon; kag buhian ko ang mga kalag nga gindakup ninyo sa pagpalupad sa ila. 21Kusniton ko man ang inyo mga panyo, kag luwason ang akon katawohan gikan sa inyo kamut, kag manginwala na sila sa inyo kamut nga pagdakpon; kag makilala ninyo nga Ako amo ang Ginoo. 22Bangud nga sa kabutigan ginpakalisud ninyo ang tagiposoon sang matarung, nga wala ko mapasubu, kag ginpalig-on ninyo ang mga kamut sang malauton, agud nga indi magtalikod sa iya malaut nga dalanon kag maluwas nga buhi; 23busa indi na kamo makakita sing dimatuud nga palanan-awon ukon diosnon nga pagpamakot; luwason ko ang akon katawohan gikan sa inyo kamut. Niyan makilala ninyo nga Ako amo ang Ginoo.”
Currently Selected:
EZEQUIEL 13: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
