EZEQUIEL 11
11
Ang Malaut nga mga Principe Ginsabdong
1Ang Espiritu nagbayaw sa akon, kag nagdala sa akon sa gawang nga nasidlangan sang balay sang Ginoo, nga nagaatubang sa sidlangan. Kag yari karon, sa ganhaan sang gawang duha ka pulo kag lima ka lalaki; kag sa tunga nila nakita ko si Jaazanias nga anak ni Azur, kag si Pelatias nga anak ni Benaya, nga mga principe sang katawohan. 2Kag nagsiling sia sa akon, “Anak sang tawo, ini sila amo ang mga tawo nga nagapadugi sing kalautan kag nagahatag sing malaut nga laygay sa sini nga banwa; 3nga nagasiling, ‘Ang tion indi malapit sa pagpatindug sing mga balay; ini nga banwa amo ang kawa, kag kita amo ang unud.’ 4Busa tagna ka batok sa ila, tagna, O anak sang tawo.”
5Kag naholog sa akon ang Espiritu sang Ginoo, kag nagsiling sia sa akon, “Pamolong, Amo ini ang ginasiling sang Ginoo: Amo ini ang inyo ginsiling, O panimalay sang Israel; kay nahibaloan ko ang mga butang nga nagaabut sa inyo painoino. 6Ginpadamu ninyo ang inyo mga pinatay sa sini nga banwa, kag ginhil-ub ninyo sing mga pinatay ang iya mga dalan. 7Busa amo ini ang ginasiling sang Ginoong Dios: Ang inyo mga pinatay nga ginhal-id ninyo sa tunga sini, amo sila ang unud, kag ini nga banwa amo ang kawa; apang pagowaon kamo gikan sa tunga sini. 8Ginkahadlukan ninyo ang espada; kag dalhon ko sa inyo ang espada; nagasiling ang Ginoong Dios. 9Kag pagowaon ko kamo gikan sa tunga niya, kag itugyan kamo sa mga kamut sang mga dumoloong, kag magahikot sing mga paghukom sa inyo. 10Mapukan kamo sa espada; hukman ko kamo sa mga dulunan sang Israel; kag makilala ninyo nga Ako amo ang Ginoo. 11Ini nga banwa indi manginkawa ninyo, ukon kamo mangin-unud sa tunga sini; hukman ko kamo sa dulunan sang Israel; 12kag makilala ninyo nga Ako amo ang Ginoo; kay wala kamo maglakat sa akon mga palatukuran, ukon maghikot sang akon mga pagsolondan, kondi naghimo sono sa mga pagsolondan sang mga pungsud nga yara sa palibut ninyo.”
13Kag nahanabu, sang nagtagna ako, nga si Pelatias nga anak ni Benaya napatay. Niyan napukan ako nga hapa, kag nagsinggit sa mabaskug nga tingug, kag nagsiling, “Ay Ginoong Dios! tapuson mo bala sing bug-os ang salin sang Israel?”
Ang Saad sang Pagpahauli kag Pagbag-o
14Kag nag-abut sa akon ang polong sang Ginoo: 15“Anak sang tawo, ang imo mga utud, bisan ang imo mga utud, ang mga tawo sa imo kahimataan, ang bug-os nga panimalay sang Israel, tanan sila, sila amo ang ginsilingan sang mga pumuluyo sang Jerusalem, ‘Palayo kamo sa Ginoo; sa amon ginhatag ini nga duta nga kaugalingon.’ 16Busa isiling, ‘Amo ini ang ginasiling sang Ginoong Dios: Sanglit kay ginhalin ko sila sing malayo sa tunga sang mga pungsud, kag sanglit ginpaaplaag ko sila sa tunga sang mga duta, wala sing sapayan manginsantuario ako sa ila sa diotay nga tion sa mga duta diin sila magakadto.’ 17Busa isiling, ‘Amo ini ang ginasiling sang Ginoong Dios: Tiponon ko kamo gikan sa mga katawohan, kag tingbon ko kamo gikan sa mga duta diin ginpaaplaag kamo, kag ihatag ko sa inyo ang duta sang Israel.’ 18Kag magaabut sila didto, kag kuhaon nila sa iya ang tanan nga makahiligko nga butang kag ang tanan niya nga kalangil-aran gikan didto. 19Kag hatagan ko sila sing isa ka tagiposoon, kag ibutang ko sa inyo ang espiritu nga bag-o; kuhaon ko ang tagiposoon nga batobatohon gikan sa ila unud kag hatagan ko sila sing tagiposoon nga unud, 20agud nga maglakat sila sa akon mga palatukuran kag magbantay sang akon mga pagsolondan kag maghimo sa ila; kag sila mangin-akon katawohan, kag ako mangin-ila Dios.#Ezeq. 36:26-28. 21Apang nahanungud sa ila nga ang ila tagiposoon naglakat sa tagiposoon sang ila makahiligko nga mga butang kag sa ila mga kalangil-aran, itungtung ko ang ila dalanon sa ila mga olo, nagasiling ang Ginoong Dios.”
22Niyan ginbayaw sang mga querubin ang ila mga pakpak, kag ang mga aliling sa luyo nila; kag ang himaya sang Dios sang Israel yara sa ibabaw nila. 23Kag ang himaya sang Ginoo naghayaw gikan sa tunga sang banwa, kag nagdolog sa ibabaw sang bukid nga yara sa nasidlangan sang banwa.#Ezeq. 43:2-5. 24Kag ginbayaw ako sang Espiritu kag gindala ako sang Espiritu sang Dios sa palanan-awon sa Caldea, sa ila nga sa kabihagan. Gani ang palanan-awon nga nakita ko nagpaibabaw gikan sa akon. 25Niyan nagpamolong ako sa ila nga sa kabihagan sang tanan nga butang nga ginpakita sang Ginoo sa akon.
Currently Selected:
EZEQUIEL 11: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
