EXODO 20

Ang Napulo ka Sogo

(Deut. 5:1-21)

1Kag ang Dios naghambal sini tanan nga polong, nagasiling, 2“Ako ang Ginoo nga imo Dios, nga nagpagowa sa imo gikan sa duta sang Egipto, sa balay sang kahiolipnan.

3“Dili ka maghuput sing iban nga mga dios sa atubangan ko.

4“Dili ka maghimo nga sa imo sing larawan nga tinigban, ukon bisan ano nga kaangay sang bisan anong butang nga yara sa langit sa ibabaw, ukon yara sa duta sa idalum, ukon yara sa tubig sa idalum sang duta; 5dili ka magyaub sa ila ukon mag-alagad sa ila;#Ex. 34:17; Lev. 19:4; 26:1; Deut. 4:15-18; 27:15. kay Ako ang Ginoo nga imo Dios maimon nga Dios, nga nagapaduaw sang kalautan sang mga ginikanan sa mga anak tubtub sa ikatlo kag sa ikap-at nga kaliwatan sang mga nagadumut sa akon, 6apang nagapakita sing malig-on nga paghigugma sa linibo sang mga nagahigugma sa akon kag nagabantay sang akon mga sogo.#Ex. 34:6-7; Num. 14:18; Deut. 7:9-10.

7“Dili ka maggamit sang ngalan sang Ginoo nga imo Dios sa wala sing kapuslanan;#Lev. 19:12. kay indi pagkabigon sang Ginoo nga wala sing sala ang nagagamit sang iya ngalan sa walay kapuslanan.

8“Dumduma ang adlaw nga inugpahuway, sa pagpakabalaan sini.#Ex. 16:23-30; 31:12-14. 9Sa anum ka adlaw magpangabudlay ka, kag maghimo sang tanan mong buluhaton; 10apang ang ikapitong adlaw isa ka inugpahuway sa Ginoo nga imo Dios; sa sini dili ka maghimo sing bisan anong buluhaton,#Ex. 23:12; 31:15; 34:21; 35:2; Lev. 23:3. ikaw, ukon ang imo anak nga lalaki, ukon ang imo anak nga babayi, ukon ang imo alagad nga lalaki, ukon ang imo alagad nga babayi, ukon ang imo kahayupan, ukon ang dumuloong nga yara sa sulud sang imo mga gawang; 11kay sa anum ka adlaw ginhimo sang Ginoo ang langit kag ang duta, ang dagat, kag ang tanan nga yara sa ila, kag nagpahuway sa ikapitong adlaw; busa ginpakamaayo sang Ginoo ang adlaw nga inugpahuway kag ginpakabalaan ini.#Gen. 2:1-3; Ex. 31:17.

12“Tahora ang imo amay kag ang imo iloy,#Deut. 27:16; Mat. 15:4; 19:19; Mar. 7:10; 10:19; Luc. 18:20; Efe. 6:2. agud nga ang imo mga adlaw maglawig sa duta nga ginahatag sa imo sang Ginoo nga imo Dios.#Efe. 6:3.

13“Dili ka magpatay.#Gen. 9:6; Lev. 24:17; Mat. 5:21; 19:18; Mar. 10:19; Luc. 18:20; Roma 13:9; Sant. 2:11.

14“Dili ka magpanglahi.#Lev. 20:10; Mat. 5:27; 19:18; Mar. 10:19; Luc. 18:20; Roma 13:9; Sant. 2:11.

15“Dili ka magpangawat.#Lev. 19:11; Mat. 19:18; Mar. 10:19; Luc. 18:20; Roma 13:9.

16“Dili ka magsaksi sing dimatuud batok sa imo isigkatawo.#Ex. 23:1; Mat. 19:18; Mar. 10:19; Luc. 18:20.

17“Dili ka magkaibog#Roma 7:7; 13:9. sang balay sang imo isigkatawo; dili ka magkaibog sang asawa sang imo isigkatawo, ukon sang iya alagad nga lalaki, ukon sang iya alagad nga babayi, ukon sang iya baka, ukon sang iya asno, ukon ano nga butang nga iya sang imo isigkatawo.”

Ang Kahadluk sang Katawohan

(Deut. 5:22-33)

18Karon sang nabatyagan sang bug-os nga katawohan ang mga daguub kag ang mga kilat kag ang tonog sang budyong kag ang bukid nga nagaaso, ang katawohan nahadluk kag nagkurug; kag nagtindug sila sa malayo, 19kag nagsiling kay Moises, “Pamolong ka sa amon, kag kami magapamati; apang dili ang Dios magpamolong sa amon, basi nga mapatay kami.”#Heb. 12:18-19. 20Kag si Moises nagsiling sa katawohan, “Dili kamo mahadluk; kay nagkari ang Dios pagtilaw sa inyo, kag nga ang kahadluk sa iya manginyara sa atubangan ninyo, agud nga indi kamo magpakasala.”

21Kag ang katawohan nagtindug sa malayo, samtang nga si Moises nagpalapit sa pitipit nga kadudulman diin yara ang Dios. 22Kag ang Ginoo nagsiling kay Moises, “Amo ini ang isiling mo sa katawohan sang Israel: ‘Kamo gid nakakita nga ako nagpakighambal sa inyo gikan sa langit. 23Dili kamo maghimo sing iban nga mga dios nga pilak upud sa akon, ukon maghimo nga sa inyo sing mga dios nga bulawan. 24Halaran nga duta himoon mo sa akon kag ihalad sa ibabaw sini ang imo mga halad-nga-sinonog kag ang imo mga halad-sa-paghidait, ang imo mga carnero kag ang imo mga baka; sa tagsa ka duug diin ipahanumdum ko ang akon ngalan magakara ako sa imo kag magapakamaayo ako sa imo. 25Kag kon maghimo ka sing halaran nga bato sa akon, dili mo pagpatindugon ini sa bato nga binasbasan;#Deut. 27:5-7; Jos. 8:31. kay kon gamitan mo ini sang imo galamiton gindagtaan mo ini. 26Kag dili ka magsaka sa mga halintang sa akon halaran, agud nga indi masapwan didto ang imo kahubo.’

Currently Selected:

EXODO 20: ABHIL82

Highlight

Copy