ESTER 1
1
Si Hara Vasti Nagasumpong kay Asuero
1Sa mga adlaw ni Asuero,#Esd. 4:6. si Asuero nga naghari kutub sa India tubtub sa Etiopia sa isa ka gatus kag duha ka pulo kag pito ka puud, 2sa sadtong mga adlaw sang si Hari Asuero naglingkod sa trono sang iya ginharian, nga yara sa Susan nga palacio, 3sa ikatlong tuig sang iya paghari, naghimo sia sing piesta sa tanan niya nga principe kag iya mga alagad, ang gahum sang Persia kag Media kag ang mga dungganon kag mga principe sang mga puud nga yara sa atubangan niya, 4sang nagpakita sia sang manggad sang iya mahimayaon nga ginharian kag sang kadungganan sang iya halangdon nga pagkahari sa madamung adlaw, isa ka gatus kag kawaloan ka adlaw. 5Kag sang natapus ining mga adlaw, ang hari naghimo sing piesta sa bug-os nga katawohan nga yara sa Susan nga palacio, sa dalagku kag magamay, sing pito ka adlaw, sa luwang sang katamnan sang palacio sang hari. 6May mga pakabit nga panapton nga maputi, verde kag asul nga nahigtan sing mga lubid nga lino nga mapino kag purpura sa mga singsing nga pilak kag sa mga haligi nga marmol, kag ang mga salaliayan bulawan kag pilak nga napahamtang sa salog nga marmol nga mapula, maputi, madalag, kag maitum. 7Ginpainum nila sila sa mga suludlan nga bulawan, nga nagakalainlain sa isa kag isa, kag ang alak nga harianon bugana sono sa kaalwan sang hari. 8Kag ang pag-inum sono sa kasogoan, walay bisan sin-o nga makapilit; kay amo ini ang gintangdo sang hari sa tanan nga mga manugdumala sang iya balay, nga maghimo sila sono sa luyag sang tagsa ka tawo. 9Si Hara Vasti man naghimo sing piesta nga sa mga babayi sa palacio ni Hari Asuero.
10Sa ikapitong adlaw, sang masadya tungud sa alak ang tagiposoon sang hari, nagsogo sia sa ila ni Mehuman, Bizta, Harbona, Bigta, kag Abagta, Zetar kag Carcas, ang pito ka eunuco nga nag-alagad sa atubangan ni Hari Asuero, 11sa pagdala kay Hara Vasti sa atubangan sang hari nga may purungpurung nga harianon, sa pagpakita sa mga katawohan kag sa mga principe sang iya kagayon; kay matahum sia nga tolokon. 12Apang si Hara Vasti nagdumili sa pagkadto sa sogo sang hari paagi sa mga eunuco. Busa ang hari nagsingkal, kag ang iya kaakig nagdabdab sa sulud niya.
13Niyan ang hari nagsiling sa mga mangin-alamon nga nakahibalo sang mga tion—kay amo ini ang kinabatasan sang hari sa tanan nga nakahibalo sang kasogoan kag paghukom, 14ang madason sa iya amo sila ni Carsena, Setar, Admata, Tarsis, Meres, Marsena, kag Memucan, ang pito ka principe sang Persia kag Media, nga nakakita sang nawung sang hari, kag naglingkod nga nahauna sa ginharian—: 15“Ano bala ang himoon ta kay Hara Vasti sono sa sogo, bangud nga wala sia magtuman sang sogo ni Hari Asuero paagi sa mga eunuco?” 16Niyan si Memucan nagsabat sa atubangan sang hari kag sang mga principe, “Si Hara Vasti wala makasayup sa hari lamang, kondi man sa tanan nga principe kag sa tanan nga mga katawohan nga yara sa tanan nga puud ni Hari Asuero. 17Kay ini nga buhat sang hara magalapnag sa tanan nga babayi, sa paghimo sang ila mga bana nga talamayon sa mga mata nila, kon masugid ini, ‘Si Hari Asuero nagsogo nga dalhon sa atubangan niya si Hara Vasti, apang wala sia magkadto.’ 18Sa sini nga adlaw ang mga princesa sang Persia kag Media nga nakabati sang buhat sang hara magasiling sang subong sa tanan nga principe sang hari, kag manginmay daku nga katamayan kag kasingkal. 19Kon nahamut-an sang hari, maggowa ang sogo nga harianon gikan sa iya, kag isulat ini sa mga kasogoan sang mga Persiahanon kag sang mga Mediahanon nga indi ini mabaylohan, nga si Vasti indi na magkari sa atubangan ni Hari Asuero; kag ihatag sang hari ang iya harianon nga pagkahimtang sa isa nga maayo pa sa iya. 20Gani kon ang mando sang hari nga himoon niya mabantala sa bug-os gid niya nga ginharian, kay ini daku, ang tanan nga asawa magatahud sa ila mga bana, sa dalagku kag magamay.” 21Ang pinamolong nagpahamuut sa hari kag sa mga principe, kag ang hari naghimo sono sa polong ni Memucan; 22nagpadala sia sing mga sulat sa tanan nga puud sang hari, sa tagsa ka puud sono sa iya pagsulat kag sa tagsa ka katawohan sono sa ila hambal, nga ang tagsa ka lalaki maggahum sa iya kaugalingon nga balay kag magpamolong sono sa hambal sang iya katawohan.
Currently Selected:
ESTER 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society