MANUGWALI 6

1May malaut nga nakita ko sa idalum sang adlaw, kag ini mabug-at sa mga tawo: 2isa ka tawo nga ginhatagan sang Dios sing manggad, pagkabutang, kag dungug, sa bagay nga wala sia ginakulanga sa iya kalag sang tanan nga iya ginahandum, apang wala sia paghatagi sang Dios sing gahum sa pagkaon sini, kondi ang tagaluwas nagakaon sini; ini kadayawan; ini malaut nga balatian. 3Kon ang tawo amay sang isa ka gatus nga kabataan, kag nagakabuhi sing madamu nga tuig, sa bagay nga ang mga adlaw sang iya mga tuig madamu, apang ang iya kalag indi mabusug sang kaayohan, kag labut pa wala sia malubung, nagasiling ako nga maayo pa sa iya ang nahar-as. 4Kay nagaabut ini sa kadayawan kag nagataliwan sa kadudulman, kag ang iya ngalan tabonan sang kadudulman; 5labut pa wala ini makakita sang adlaw ukon nakakilala sini; ini may pahuway sang sa isa. 6Bisan nagakabuhi sia sing isa ka libo ka tuig nga makaduha isugid, apang wala nagapangalipay sing kaayohan—wala bala ang tanan nagakadto sa isa ka duug?

7Ang bug-os nga kinabudlayan sang tawo tungud sa iya baba, kag bisan pa ang iya luyag wala mabusug. 8Kay ano bala ang kinalabaw sang maalam sa buangbuang? Ukon ano bala ang iya sang imol nga tawo nga makahibalo maglakat sa atubangan sang mga buhi? 9Maayo pa ang itololok sang mga mata sang sa nagadalangdalang nga handum; ini man kadayawan kag pagpanikasug sa hangin.

10Ang bisan ano nga nagligad ang iya ngalan nahatag sing dugay na, kag nahibaloan kon ano ang tawo, kag indi sia makasumpung sa gamhanan pa sa iya. 11Sa ginatan-aw nga may madamu nga butang nga nagadugang sa kadayawan, ano bala ang kinaayo pa sang tawo? 12Kay sin-o bala ang nakahibalo kon ano ang maayo sa tawo sa tanan nga adlaw sang iya kabuhi nga walay pulus, nga ginahinguyang niya subong sang landong? Kay sin-o bala ang makasugid sa tawo kon ano ang sa olihi niya sa idalum sang adlaw?

Currently Selected:

MANUGWALI 6: ABHIL82

Highlight

Copy

Compare