DANIEL 11

1Kag nahanungud sa akon, sa nahauna nga tuig ni Dario nga Mediahanon, nagtindug ako sa pagpalig-on kag sa pagpabakud sa iya.

Ang mga Hari sang Aminhan kag sang Bagatnan

2“Kag karon ipahayag ko sa imo ang kamatooran. Yari karon, may magatindug pa nga tatlo ka hari sa Persia; kag ang ikap-at magamanggaranon pa gid sa ila tanan; kag kon manginmalig-on sia paagi sa iya manggad, painiton niya ang tanan batok sa ginharian sang Grecia. 3Niyan magatindug ang hari nga gamhanan, nga magagahum nga may dakung pagbulut-an kag magahimo sono sa iya kabubut-on. 4Kag kon magtindug sia, mabungkag ang iya ginharian kag bahinbahinon nayon sa apat ka hangin sa langit, apang indi sa iya kaliwatan, ukon sono sa iya pagbulut-an nga paggahum; kay ang iya ginharian gabuton kag magakadto sa iban luwas sini sa ila.

5“Niyan magabakud ang hari sang bagatnan, apang ang isa sang mga principe niya magabakud labaw sa iya kag ang iya pagbulut-an mangindaku nga pagbulut-an. 6Sa katapusan sang mga tuig magatingub sila, kag ang babaying anak sang hari sang bagatnan magaabut sa hari sang aminhan sa pagpakighidait; apang indi sia makahawid sang kusug sang iya butkon, kag sia kag ang iya kaliwat indi makatindug; kondi itugyan sia, kag ang mga nagdala sa iya, kag ang nagpanganak sa iya, kag ang nagpabakud sa iya sa sadtong mga tion.

7“Apang gikan sa singil sang iya mga gamut magatindug ang isa sa iya duug; magakadto sia sa hangaway kag magasulud sa pamakud sang hari sang aminhan, kag magasumpung sa ila kag magalandas. 8Dalhon niya nga bihag sa Egipto ang ila mga dios man pati ang ila mga larawan nga tinunaw kag ang ila matahum nga mga gamit nga pilak kag bulawan; kag magapaumud sia sa pagsulong sa hari sang aminhan sing pila ka tuig. 9Niyan sia magakadto batok sa ginharian sang hari sang bagatnan apang magabalik sia sa iya kaugalingon nga duta. 10“Ang iya mga anak nga lalaki magapakig-away kag magatipon sing kadam-an sang dakung kusug, nga magakari kag magabaha kag magaagi, kag magabalik sila kag magapakig-away sa iya pamakud. 11Niyan ang hari sang bagatnan, nga maakig, magagowa kag magapakig-away sa hari sang aminhan; kag magapagowa sia sing dakung kadam-an, apang ang kadam-an itugyan sa iya kamut. 12Kag kon maagaw ang kadam-an, ang iya tagiposoon magapakataas, kag pukanon niya ang mga linaksa, apang indi sia maglandas. 13Kay ang hari sang aminhan magabalik kag magapagowa sing kadam-an nga madamu pa sang sa nahauna; kag sa katapusan sang mga tuig magakari sia nga may dakung hangaway kag madamung pagkabutang.

14“Sa sadtong mga tion may madamu nga magatindug batok sa hari sang bagatnan; subong man ang mga anak sang mga malugus sa tunga sang imo katawohan magatindug sa ila kaugalingon sa pagtuman sang palanan-awon; apang mapukan sila. 15Niyan magaabut ang hari sang aminhan kag magatumpok sang palalipdan, kag magaagaw sang banwang mabakud. Kag ang mga kusug sang bagatnan indi makabato, ukon ang iya pinili nga katawohan, kay walay kusug sa pagbato. 16Apang ang nagaabut batok sa iya magahimo sono sa iya kabubut-on, kag walay bisan sin-o nga makabato sa iya; kag magatindug sia sa duta nga mahimayaon, kag sa iya kamut yara ang kalaglagan. 17Ipadulong niya ang iya nawung sa pagkari upud sa kusug sang bug-os niyang ginharian, kag magadala sia sing mga kasugtanan sang paghidait kag tumanon sila. Ihatag niya sa iya ang babaying anak sang mga babayi sa paglaglag sang ginharian; apang indi ini makatindug ukon manginsa iya kapuslanan. 18Sa tapus sini magabalikid sia sa mga pulo, kag magakuha sing madamu; apang ang principe magapauntat sang pasipala niya; ipabalik niya gayud sa iya ang iya pasipala. 19Niyan magabalikid sia sa mga pamakud sang iya kaugalingon nga duta; apang masandad sia kag mapukan, kag indi makita.

20“Niyan magatindug sa iya duug ang isa nga magapaagi sang manugpabuhis sa himaya sang ginharian; apang sa pila ka adlaw laglagon sia, indi sa kaakig ukon sa inaway. 21Sa iya duug magatindug ang talamayon nga tawo nga sa iya wala nila mahatag ang kadungganan sang ginharian; apang magaabut sia sa tion sang kalig-onan kag magaagum sang ginharian paagi sa mga olog-olog. 22Ang mga kusug malutus sa atubangan niya kag mabungkag, kag ang principe man sang katipan. 23Kag sa tapus nga mahimo ang pagdampig upud sa iya magalimbong sia; kay magataklad sia kag magabakud nga may diotay nga katawohan. 24Sa tion sang kalig-on magaabut sia sa mabuganaon gid nga mga duug sang puud; kag magahimo sia sang wala paghimoa sang iya mga ginikanan ukon sang mga ginikanan sang iya mga ginikanan, ipanagtag niya sa ila ang inatihan, ang inagaw, kag pagkabutang. Hikuton niya ang iya mga pahito batok sa mga pamakud, bisan sa isa ka tion. 25Kag pukawon niya ang iya gahum kag ang iya kaisug batok sa hari sang bagatnan nga may daku nga hangaway; kag ang hari sang bagatnan magapakig-away nga may daku kag gamhanan nga hangaway; apang indi sia makatindug, kay magahikut sia sing mga pahito batok sa iya. 26Bisan ang mga nagakaon sang iya mga kalan-on nga manamit magalaglag sa iya; ang iya hangaway magabaha, kag madamu ang magakapukan nga pinatay. 27Kag nahanungud sa sini nga duha ka hari, ang ila tagiposoon manginsa paghimo sing daut; magapamolong sila sing kabutigan sa isa ka latok; apang ini indi mag-uswag; kay ang katapusan manginsa tion pa nga ginpat-ud. 28Niyan magabalik sia sa iya duta nga may daku nga pagkabutang, apang ang iya tagiposoon manginbatok sa katipan nga balaan. Kag himoon niya ang iya nahamut-an, kag magabalik sa iya kaugalingon nga duta.

29“Sa tion nga pinat-ud magabalik sia kag magakadto sa bagatnan; apang indi mangin-amo ini sa olihi nga tion subong sang sa una. 30Kay magaabut batok sa iya ang mga sakayan sang Kitim, busa magakalisud sia kag magabalik, kag maalipungut batok sa katipan nga balaan kag magahimo sang iya nahamut-an. Magabalik gid sia kag magahangad sa mga nagbiya sang balaan nga katipan. 31Ang mga kusug magatindug sa iya bahin kag pasipalahan nila ang santuario kag ang pamakud, kag kuhaon ang dalayon nga halad-nga-sinonog. Kag patindugon nila ang kalangil-aran nga nagapamingaw.#Dan. 9:27; 12:11; Mat. 24:15; Mar. 13:14. 32Ang mga nagahimo sing pagkamalaut batok sa katipan patalangon niya paagi sa mga olog-olog; apang ang katawohan nga nakakilala sa ila Dios manginmabakud kag magahimo. 33Kag ang mga maalam sa katawohan magatudlo sang madamu, apang mapukan sila sa espada kag sa dabdab, sa pagbihag kag sa pangati, sing madamu nga adlaw. 34Karon kon mapukan sila, buligan sila sing diotay nga bulig. Apang madamu ang magasimpon sa ila sa mga olog-olog; 35kag ang iban sa ila nga mga maalam mapukan, sa pag-ulay sa ila kag sa pagputli sa ila kag sa pagpaputi sa ila, tubtub sa tion sang katapusan, bangud nga ini sa tion pa nga pinat-ud.

36“Kag magahimo ang hari sono sa iya kabubut-on; magapakataas sia, kag magapakadaku sang iya kaugalingon labaw sa tagsa ka dios,#2 Tes. 2:3-4. kag magapamolong sing makatilingala nga mga butang batok sa Dios sang mga dios.#Bug. 13:5-6. Magauswag sia tubtub nga matuman ang kaalipungut; kay ang natapat himoon. 37Indi sia magsapak sang mga dios sang iya mga ginikanan, ukon sang handum sang mga babayi; indi sia magsapak sa bisan ano nga dios, kay magapakadaku sia sang iya kaugalingon labaw sa tanan. 38Apang sa iya duug padunggan niya ang dios sang mga pamakud; ang dios nga wala makilala sang iya mga ginikanan padunggan niya sing bulawan kag pilak, sing mga bato nga bilidhon kag mga butang nga matahum. 39Sulungon niya ang mga pamakud nga mapag-on gid sa bulig sang dios nga dumoloong; ang bisan sin-o nga nagakilala sa iya dugangan niya sing himaya. Padumalahon niya sila sa ibabaw sang kadam-an kag bahinbahinon nga balus ang duta.

40“Sa tion sang katapusan ang hari sang bagatnan magasumpung sa iya; kag ang hari sang aminhan magaabut batok sa iya kaangay sang buhawi, nga may mga kangga kag may mga manugkabayo, kag may madamu nga sakayan; kag magasulud sia sa kadutaan kag magasalakay kag magaagi. 41Magasulud man sia sa duta nga mahimayaon. Kag madamu nga kadutaan ang laglagon, apang ini sila luwason sa iya kamut: ang Edom kag ang Moab kag ang puno sang mga anak sang Amon. 42Untayon niya ang iya kamut man sa kadutaan, kag indi makalikaw ang duta sang Egipto. 43Magagahum sia sa mga bahandi nga bulawan kag pilak, kag sa tanan nga bilidhon nga mga butang sang Egipto; ang mga Libiahanon kag ang mga Etiopiahanon magasonod sa iya mga tikang. 44Apang ang mga balita gikan sa sidlangan kag sa aminhan magatublag sa iya, kag magagowa sia sa daku nga kasingkal sa paglaglag kag sa paghapay sing bug-os sang madamu. 45Kag patindugon niya ang mga layanglayang sang iya palacio sa ulut sang dagat kag sang mahimayaon nga bukid nga balaan; apang magalambut sia sa iya katapusan, kag wala gid sing matabang sa iya.

Currently Selected:

DANIEL 11: ABHIL82

Highlight

Compare

Copy