2 SAMUEL 15
15
Si Absalom Nagaribuk batok kay David
1Sa tapus sini si Absalom nag-aman nga sa iya sing mga kangga kag mga kabayo, kag kalim-an ka lalaki sa pagdalagan sa una niya. 2Kag si Absalom nagbangon sing aga pa kag nagtindug sa higad sang dalan sang gawang; kag kon ang bisan sin-ong tawo may kasaba nga dapat magkadto sa hari nga hukman, niyan ginpatawag sia ni Absalom, kag nagsiling, “Taga-diin ka bala nga banwa?” Kag nagsiling sia, “Ang imo alagad isa sang mga kabikahan sang Israel,” 3si Absalom nagsiling sa iya, “Tan-awa, ang imo kasaba maayo kag matarung; apang wala sing tawo nga gintugyanan sang hari nga magpamati sa imo.” 4Labut pa si Absalom nagsiling, “O kon ako kuntani ang ginhimo nga hukom sa duta! Niyan magkari sa akon ang tagsa ka tawo nga may kasaba ukon kasuayon, kag himoan ko sia sing katarungan.” 5Kag kon ang bisan sin-ong tawo magpalapit sa pagyaub sa iya, gin-untay niya ang iya kamut, kag dakpon sia, kag halukan sia. 6Sa sining bagay naghimo si Absalom sa tanan sa Israel nga nagkadto sa hari nga hukman; gani si Absalaom nagbihag sang mga tagiposoon sang mga tawo sang Israel.
7Kag sa katapusan sang kap-atan ka tuig, si Absalom nagsiling sa hari, “Gina-ampo ko sa imo tuguti ako sa pagkadto kag sa pagbayad sang akon saad, nga ginsaad ko sa Ginoo, sa Hebron. 8Kay ang imo alagad nagsaad sing isa ka saad sang nagpabilin ako sa Gesur sa Siria, nga nagasiling, ‘Kon sa pagkamatuud ang Ginoo magdala sa akon liwat sa Jerusalem, alagdon ko ang Ginoo.’” 9Ang hari nagsiling sa iya, “Lakat ka sa paghidait.” Gani nagtindug sia, kag nagkadto sa Hebron. 10Apang si Absalom nagpadala sing mga lampitaw sa tanan gid nga kabikahan sang Israel, nga nagasiling, “Sa gilayon nga mabatian ninyo ang tonog sang budyong, niyan magsiling kamo, ‘Si Absalom hari sa Hebron!’” 11Nag-upud kay Absalom ang duha ka gatus ka lalaki gikan sa Jerusalem nga ginpangagda, kag naglakat sa ila kabunayag, kag wala sila sing nahibaloan nga bisan anong butang. 12Kag si Absalom nagpatawag kay Ahitofel nga Gilonhon, ang palangkoton ni David, gikan sa iya banwa sa Gilo sang nagadolot sia sang mga halad. Kag ang pagpuhon mabakud, kay ang katawohan nagdugang sing dalayon upud kay Absalom.
13Kag may nag-abut nga manugbalita kay David, nga nagasiling, “Ang mga tagiposoon sang mga tawo sang Israel nagasonod kay Absalom.” 14Niyan si David nagsiling sa tanan niyang alagad nga upud sa iya sa Jerusalem, “Tindug kamo, kag malagyo kita; kay basi wala sa aton sing makapalagyo kay Absalom; dalidali kamo sa pagtaliwan, basi kon malambut niya kita sing madali, kag magpatupa sing malaut sa aton, kag maglaglag sang banwa sa sulab sang espada.” 15Kag ang mga alagad sang hari nagsiling sa hari, “Yari karon, ang imo mga alagad handa sa paghimo sang bisan anong pilion sang akon ginoong hari.” 16Gani ang hari naggowa, kag ang bug-os niyang panimalay sa olihi niya. Kag ginbilin sang hari ang napulo ka babayi nga mga hinuptan sa pagbantay sang balay. 17Kag ang hari naggowa kag ang tanan nga tawo sa olihi niya; kag nagdolog sila sa Betmerhak. 18Kag ang tanan niyang alagad nagligad sa iya luyo; kag ang tanan nga Keretnon, kag ang tanan nga Peletnon, kag ang tanan nga Githanon, anum ka gatus ka tawo nga naghalin sa Gat nga nagsonod sa iya, nag-una sa hari.
19Niyan ang hari nagsiling kay Itai nga Githanon, “Ngaa bala nga nagaupud ka sa amon? Balik ka, kag magpabilin upud sa hari, kay ikaw dumuloong, kag tinapok man gikan sa imo duug. 20Sa bagay nga kahapon ka lamang mag-abut, pataklaron kag padolhogon ka bala namon upud sa amon sining adlaw, sa ginatan-aw nga nagakadto ako sa wala ko mahibal-i? Balik ka, kag dalha pabalik ang imo mga utud; kag [ang Ginoo magpakita] sang malig-on nga paghigugma kag katutum sa imo.” 21Apang si Itai nagsabat sa hari, “Sa nagakabuhi ang Ginoo, kag sa nagakabuhi ang akon ginoong hari, sa bisan anong duug nga didto ang akon ginoong hari, bisan sa kamatayon ukon sa kabuhi, didto man ang imo alagad.” 22Kag si David nagsiling kay Itai, “Lakat niyan, magtabok.” Gani nagtabok si Itai nga Githanon, kag ang tanan niya nga tawo kag ang tanan nga magamay nga upud sa iya. 23Kag ang bug-os nga duta naghibi sa mabaskug nga tingug sang nagtabok ang bug-os nga katawohan, kag ang hari nagtabok sa sapa nga Cedron, kag ang bug-os nga katawohan nagtabok nayon sa dalan sang kamingawan.
24Kag, yari karon, si Sadoc man nag-abut, kag upud sa iya ang tanan nga Levinhon, nga nagadala sang kaban sang katipan sang Dios; kag ginpahamtang nila ang kaban sang Dios, kag si Abiatar nagtaklad, tubtub nga ang katawohan nakatapus sa paggowa sa banwa. 25Niyan ang hari nagsiling kay Sadoc, “Ibalik ang kaban sang Dios sa banwa. Kon ako makakita sing kahamuut sa mga mata sang Ginoo, sia magapabalik sa akon kag magapakita sa akon sini kag sang iya puluy-an; 26apang kon sia magsiling sing subong sini, ‘Wala ako sing kahamuut sa imo,’ yari karon, yari ako, himoon niya sa akon ang maayo sa iya.” 27Nagsiling man ang hari kay Sadoc nga sacerdote, “Indi bala ikaw ang manugpanan-aw? balik ka nga may paghidait sa banwa, kag ang inyo duha ka anak nga lalaki upud sa imo, ang imo anak nga si Ahimaaz, kag si Jonatan nga anak ni Abiatar. 28Tan-awa, ako magahulat sa mga obogan sang kamingawan,#Sal. 63 Titulo. tubtub nga may mag-abut nga polong gikan sa inyo sa pagpahibalo sa akon.” 29Gani ginyayongan ni Sadoc kag ni Abiatar ang kaban sang Dios pabalik sa Jerusalem; kag nagpabilin sila didto.
30Apang si David nagtaklad sa taklaran sang mga Olivo, nga nagahibi sang nagtaklad sia, nga nagpulus sia sang iya olo kag naglakat nga tiil lamang; kag ang bug-os nga katawohan nga yara upud sa iya nagpulus ang tagsa ka tawo sang iya olo, kag nagtaklad sila, nga nagahibi sang nagtaklad sila. 31Kag nagsugid kay David ang isa, “Si Ahitofel yara sa tunga sang mga manugpuhon upud kay Absalom.” Kag si David nagsiling, “O Ginoo, ginaampo ko sa imo, liso-a sa kabuangon ang laygay ni Ahitofel.”
32Sang nakasap-ong si David sa putokputokan sang taklaran, diin ginsimba ang Dios, yari karon, si Husai nga Arquinhon nagsamput sa pagsugata sa iya nga ang iya bayo nakusnit kag dutaon ang iya olo. 33Si David nagsiling sa iya, “Kon mag-upud ka sa akon, niyan manginlulan ka nakon. 34Apang kon magbalik ka sa banwa, kag magsiling kay Absalom, ‘O hari, ako mangin-imo alagad; subong nga nangin-alagad ako anay sang imo amay, sa amo karon mangin-alagad mo ako,’ niyan madaug mo nga sa akon ang laygay ni Ahitofel. 35Wala bala didto upud sa imo si Sadoc kag si Abiatar nga mga sacerdote? Gani ang bisan ano nga butang nga imo mabatian sa balay sang hari, isugid mo ini kay Sadoc kag kay Abiatar nga mga sacerdote. 36Yari karon, yadto didto upud sa ila ang ila duha ka anak, si Ahimaaz, anak ni Sadoc, kag si Jonatan, anak ni Abiatar; kag paagi sa ila ipadala ninyo sa akon ang tanan nga inyo mabatian.” 37Gani si Husai, nga abyan ni David, nagpauli sa banwa, sang si Absalom nagasulud sa Jerusalem.
Currently Selected:
2 SAMUEL 15: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
