2 CORINTO 7
7
1Sanglit aton ining mga saad, mga hinigugma, tinloan ta ang aton kaugalingon sang tanan nga kadagtaan sang lawas kag espiritu, kag himpiton ta ang pagkabalaan sa kahadluk sa Dios.
Ang Kalipay ni Pablo sa Paghinulsul sang Iglesia
2Buksi ang inyo mga tagiposoon sa amon; wala kami nahimoan sing sayup, wala kami sing nahalitan, wala kami sing nalakbang. 3Ginasiling ko ini indi sa pagtagudili sa inyo, kay nasiling ko anay nga yari kamo sa amon mga tagiposoon, sa pagkamatay sing tingub kag sa pagkabuhi sing tingub. 4Daku ang akon pagsalig sa inyo; daku ang pagpabugal ko nahanungud sa inyo; puno ako sing paglipay. Nagaawas ako sa kalipay sa bug-os namon nga kapipit-an.
5Kay bisan sang pag-abut namon sa Macedonia,#2 Cor. 2:13. walay kapahuwayan ang amon mga lawas kondi ginpapiotan kami sa tagsa ka luyo—sa gowa pagbinanggianay kag sa sulud kahadluk. 6Apang ang Dios, nga nagalipay sang mga nasub-an, naglipay sa amon sa pag-abut ni Tito, 7kag indi lamang sa iya pag-abut kondi man sa paglipay nga naagum niya sa inyo, sang nagsugid sia sa amon sang inyo handum, inyo kasubo, inyo kakugi tungud sa akon, sa bagay nga nagkalipay ako sing labi pa. 8Kay bisan ginpasubo ko kamo sang akon sulat, wala ako naganulsul (bisan nagnulsul ako), kay nakita ko nga yadtong sulat nagpasubo sa inyo, bisan sa malip-ot nga tion lamang. 9Sa amo, nagakalipay ako, indi nga ginpasubo kamo, kondi nga ginpasubo kamo nga sa paghinulsul; kay ginpasubo kamo sa diosnon nga bagay, agud nga indi kamo madulaan sing bisan ano bangud sa amon. 10Kay ang diosnon nga kasubo nagahikot sing paghinulsul nga sa kaluwasan kag wala nagadala sing nulsul, apang ang kasubo nga kalibutanon nagahikot sing kamatayon. 11Kay tan-awa kon daw anong kabalaka ang napatubas sa inyo sining diosnon nga kasubo, daw anong kakunyag sa pag-apin sa inyo kaugalingon, daw anong kaakig, daw anong kahadluk, daw anong paghandum, daw anong kakugi, daw anong silot! Sa tagsa ka bagay nagpamatuud kamo sang inyo kaugalingon nga putli sa sining butang. 12Gani bisan nagsulat ako sa inyo, nagsulat indi tungud sa naghimo sang sayup, ukon sa nag-antus sang sayup, kondi agud nga ang inyo pagkabalaka tungud sa amon mahayag sa inyo sa atubangan sang Dios. 13Busa ginlipay kami.
Kag sa amon kalipay nagkalipay kami sing labi pa gid sa kalipay ni Tito, bangud nga ang iya painoino ginpapahuway ninyo tanan. 14Kay kon nagmitlang ako sa iya sing bugal nahanungud sa inyo, wala ako mahuy-i; apang subong nga nagpamolong kami sa inyo sang tanan nga butang sa kamatooran, amo man ang amon pagpabugal sa atubangan ni Tito nasapwan nga kamatooran. 15Kag ang iya gugma nagabugana ayon sa inyo, sa nagadumdum sia sang pagkamatinumanon ninyo nga tanan, kon paano nga sa may kahadluk kag pagkurug ginbaton ninyo sia. 16Nagakalipay ako bangud nga may himpit nga pagsalig ako sa inyo.
Currently Selected:
2 CORINTO 7: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
