2 CORINTO 13
13
1Ikatlo na ini nga nagakara ako sa inyo. Sa pagpamatuud sang duha ukon tatlo ka saksi#Deut. 17:6; 19:15. palig-onon ang bisan anong sumbong. 2Ginpaandaman ko ang nakasala anay kag ang iban nga tanan, kag karon nga wala ako sa inyo ginapaandaman ko sila, subong sang ginhimo ko sang yara ako sa inyo sa ikaduhang pagduaw, nga kon magkara ako liwat wala ako sing pasaylohon sa ila— 3bangud nga nagapangita kamo sing pagpamatuud nga si Cristo nagahambal paagi sa akon. Indi sia maluya sa paghisayo sa inyo, kondi gamhanan sa tunga ninyo. 4Kay ginlansang sia sa cruz sa kaluyahon, apang nagakabuhi sia bangud sa gahum sang Dios. Kay kami maluya sa iya, apang sa paghisayo namon sa inyo magakabuhi kami kaupud niya bangud sa gahum sang Dios.
5Usisaa ninyo ang inyo kaugalingon, kon yara kamo sa pagtoo. Tilawi ninyo ang inyo kaugalingon. Wala bala ninyo mahibaloi nga yara sa inyo si Jesu-Cristo?—luwas matuud kon napaslawan kamo sa pagtilaw! 6Nagalaum ako nga makahibalo kamo nga wala kami mapaslawi. 7Apang nagapangamuyo kami sa Dios nga indi kamo maghimo sing malaut—indi agud nga magpakita kami nga minamaayo, kondi nga mahimo ninyo ang matarung, bisan kami magapakita nga daw napaslawan. 8Kay wala kami sing bisan ano nga mahimo batok sa kamatooran, kondi tungud sa kamatooran. 9Kay nagakalipay kami kon kami maluya kag kamo mabaskug. Ang ginapangamuyo namon amo ang inyo kaayohan. 10Nagasulat ako sini samtang nga malayo ako sa inyo, agud kon yara ako indi ako magmatigdas sa akon paggamit sang pagbulut-an nga ginhatag sang Ginoo sa akon sa pagpalig-on kag indi sa paglumpag.
Katapusan nga mga Pag-abiabi
11Sa katapusan, mga kauturan, paalam. Tadlonga ang inyo mga dalanon, pamatii ang pangabay ko, maghilisugot kamo, magkabuhi sa paghidait, kag ang Dios sang gugma kag paghidait manginkaupud ninyo. 12Mag-abiabihay kamo nga may balaan nga haluk. 13Ang tanan nga balaan nagaabiabi sa inyo.
14Ang bugay ni Ginoong Jesu-Cristo kag ang gugma sang Dios kag ang pagpakighiambit sang Espiritu Santo manginkaupud ninyo tanan.
Currently Selected:
2 CORINTO 13: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
