2 CORINTO 11

1Kabay nga magbatas kamo sa akon sa diotay nga kabuangon. Batasa ninyo ako! 2Nagakaimon ako sa inyo sa diosnon nga kaimon, kay ginkagon ko kamo kay Cristo sa pagpahayag sa inyo subong nga putli nga asawa sa isa ka bana. 3Apang nagakahadluk ako nga subong nga ang man-ug sa iya kadaya naglimbong kay Eva,#Gen. 3:4, 13. ang inyo mga hunahuna patalangon gikan sa hanuut kag putli nga katutum kay Cristo. 4Kay kon may isa nga mag-abut kag magwali sing iban nga Jesus sang sa amon ginwali, ukon nagabaton kamo sing iban nga espiritu sang sa inyo nabaton, ukon nagabaton kamo sing iban nga maayong balita, sang sa inyo nabaton, maayo ang pagbatas ninyo sini. 5Ginaisip ko nga indi ako nga mas-a kubus sa sining lutaw gid nga mga pinadala. 6Bisan bikwalon ako sa pamolong, apang indi sa pagkilala; sa tagsa ka bagay ginpaathag namon ini sa inyo sa tanan nga butang.

7Nakasala bala ako sa pagpakubus ko sang akon kaugalingon agud nga mabayaw kamo, bangud nga nagwali ako sa inyo sang maayong balita sang Dios sa walay bayad? 8Ginkawatan ko ang iban nga mga iglesia, nga nagabaton sing sohol sa ila agud nga makaalagad ako sa inyo. 9Kag sang yara ako kaupud ninyo kag sa kakulangan, indi ako lulan sa bisan kay sin-o, kay ang mga kauturan nga nag-abut gikan sa Macedonia naghimuno sang akon kakulangan.#Filip. 4:15-18. Gani sa tagsa ka butang gintipigan ko kag tipigan ang akon kaugalingon nga indi maglulan sa inyo. 10Bangud sang kamatooran ni Cristo nga yari sa akon, indi matapna ining akon pagpabugal sa mga ginsakpan sang Acaya. 11Ngaa bala? Bangud bala nga wala ako nagahigugma sa inyo? Ang Dios nakahibalo nga nagahigugma ako!

12Kag ang ginahimo ko himoon ko sing dalayon, agud nga mautud ko ang pangako sang mga buut mag-ako nga sa ila napabugal nga hilikoton nagapangabudlay sila subong sa aton. 13Kay ang amo nga mga tawo dimatuud nga mga pinadala, madaya nga mga manugpangabudlay, nga mga nagapakapinadala ni Cristo. 14Kag indi katingalahan, kay bisan si Satanas nagapakamanugtunda sang kapawa. 15Gani indi katingalahan nga kon ang iya mga alagad man nagapakamanug-alagad sang pagkamatarung. Ang ila katapusan manginsono sa ila mga buhat.

Ang mga Pag-antus ni Pablo subong nga Pinadala

16Nagasiling liwat ako, walay tawo nga maghunahuna nga buangbuang ako; apang kon maghunahuna kamo, walay sapayan batona ako ninyo subong nga buangbuang, agud nga magpabugal man ako sing diotay. 17(Ang ginahambal ko wala ko ginahambal sono sa pagbulut-an sang Ginoo kondi subong nga buangbuang, sa sining binugal nga pagsalig; 18sanglit nga madamu ang nagapabugal sa kalibutanon nga mga butang, magapabugal man ako.) 19Kay ginabatas ninyo sing malipayon ang mga buangbuang, bangud nga mga maalam kamo! 20Kay ginabatas ninyo ang tawo kon ginaulipon niya kamo, ukon ginalamon niya kamo, ukon nagahimulus sia sa inyo, ukon nagapakataas sia sa iya kaugalingon, ukon ginatampa niya kamo. 21Ginasiling ko gid ini sa kahuluy-an ko, maluya kami sing tama sa sina!

Apang ang bisan ano nga napangahasan sa pagpabugal sang bisan sin-o—nagahambal ako subong nga buangbuang—ako nagapangahas man sa pagpabugal sina. 22Mga Hebreo bala sila? Ako amo man. Mga Israelnon bala sila? Ako amo man. Mga kaliwatan bala sila ni Abraham? Ako amo man. 23Mga manug-alagad bala sila ni Cristo? Nagahambal ako subong nga buang nga tawo—ako labi pa—sa mga pagpangabudlay labi pa,#Binu. 16:23. sa mga bilanggoan labi pa, sa mga lapdus tama pa gid, sa mga kamatayon masami. 24Sa mga Judio makalima ako nakabaton sing kap-atan ka lapdus kulang isa.#Deut. 25:3. 25Makatlo bunalon ako;#Binu. 16:22. makaisa ginbato ako.#Binu. 14:9. Makatlo ako nalunud; isa ka gab-i kag isa ka adlaw ginaanud ako sa kadagatan; 26sa mga panlakatan masunsun, sa katalagman sa mga suba, sa katalagman sa mga makawat, sa katalagman sa akon mga kasimanwa,#Binu. 9:23. sa katalagman sa mga Gentil,#Binu. 14:5. sa katalagman sa banwa, sa katalagman sa kamingawan, sa katalagman sa dagat, sa katalagman sa tunga sang dimatuud nga mga kauturan; 27sa pagpangabudlay kag kaiwat, sa mga pagpulaw masunsun, sa kagutum kag kauhaw, sa mga pagpuasa masunsun, sa tugnaw kag kahubo. 28Walay labut sining mga butang, nagapalibog sa akon adlawadlaw ang paghimud-os tungud sa tanan nga iglesia. 29Sin-o bala ang maluya, kag ako indi maluya? Sin-o bala ang ginpasandad, kag wala ako nagasingkal?

Ang Pagpalagyo ni Pablo sa Damasco

(Binu. 9:23-25)

30Kon kinahanglan ako magpabugal, magapabugal ako sang mga butang nahanungud sa akon kaluyahon. 31Ang Dios kag Amay ni Ginoong Jesu-Cristo, sia nga dalayawon sa gihapon, nakahibalo nga wala ako nagabutig. 32Sa Damasco, ang pangolo-puud nga sakup ni Haring Aretas nagbantay sang banwa sang Damasco sa pagdakup sa akon, 33apang paagi sa talamwaan sa kuta gintonton ako sa isa ka alat, kag nakapalagyo sa iya mga kamut.

Currently Selected:

2 CORINTO 11: ABHIL82

Highlight

Copy

Compare