2 MGA CRONICA 9
9
Ang Hara sang Saba Nagaduaw kay Salomon
(1 Hari 10:1-13)
1Karon sang nakabati ang hara sang Saba#Mat. 12:42; Luc. 11:31. sang kabantugan ni Salomon nag-abut sia sa pagtilaw kay Salomon sa maiwat nga mga pamangkot sa Jerusalem, upud ang tama kadaku nga katay kag mga camelyo nga nagdala sing mga pahumut kag bugana nga bulawan kag mga bato nga bilidhon. Sang nag-abut sia kay Salomon, ginpabutyag niya sa iya ang tanan nga yara sa iya tagiposoon. 2Kag si Salomon nagsaysay sa iya sang tanan niya nga pamangkot; wala sing bisan ano nga natago kay Salomon nga wala niya masaysay sa iya. 3Kag sang nakita sang hara sang Saba ang kaalam ni Salomon, ang balay nga iya napatindug, 4ang pagkaon sa iya latok, ang paglingkod sang iya mga sologoon, kag ang pag-alagad sang iya mga alagad, kag ang ila panapton, ang iya mga manugtagay man, kag ang ila panapton, kag ang iya salakaan nga ginsakaan niya pakadto sa balay sang Ginoo, nahalawhaw sia.
5Kag nagsiling sia sa hari, “Matuud ang balita nga akon nabatian sa akon kaugalingon nga duta sang imo mga binuhatan kag sang imo kaalam, 6apang ako wala magpati sang mga polong nila tubtub nga nag-abut ako kag ang akon mga mata nakakita sini; kag yari karon, ang katunga sang pagkadaku sang imo kaalam wala masugid sa akon; nagalabaw ka sa kabantugan nga akon nabatian. 7Bulahan ang imo mga tawo! Bulahan ini nga imo mga alagad, nga yara sing dalayon sa imo atubangan kag nagapamati sang imo kaalam! 8Pakamaayohon ang Ginoo nga imo Dios, nga nahamuut sa imo sa pagbutang sa imo sa iya trono nga hari nga sa Ginoo nga imo Dios! Bangud nga ang imo Dios naghigugma sang Israel sa pagpalig-on sa iya sa gihapon, busa ginhimo ka niya nga hari sa ibabaw nila, sa paghimo sing katarungan kag pagkamatarung.” 9Niyan naghatag sia sa hari sing isa ka gatus kag duha ka pulo ka talanton nga bulawan, kag tama gid kabugana nga mga pahumut, kag mga bato nga bilidhon: wala na gid sing subong nga pahumut subong sang ginhatag sang hara sang Saba kay Hari Salomon.
10Labut pa ang mga alagad ni Huram kag ang mga alagad ni Salomon, nga nagdala sing bulawan gikan sa Ofir, nagdala sing mga kahoy nga sandalo kag mga bato nga bilidhon. 11Kag sa mga kahoy nga sandalo naghimo ang hari sang mga hagdan nga sa balay sang Ginoo kag nga sa balay sang hari, kag sang mga arpa kag mga salterio nga sa mga manug-amba; wala gid sing subong nga nakita sang una sa duta sang Juda.
12Kag si Hari Salomon naghatag sa hara sang Saba sang tanan nga iya naluyagan, ang bisan anong ginpangayo niya luwas sang gindala niya sa hari. Gani nagtaliwan sia kag nagpauli sa iya kaugalingon nga duta, sia kag ang iya mga alagad.
Ang Kamanggaran kag Kabantugan ni Salomon
(1 Hari 10:14-29; 2 Cron. 1:14-17)
13Karon ang timbang sang bulawan nga nag-abut kay Salomon sa isa ka tuig anum ka gatus kag kan-uman kag anum ka talanton nga bulawan, 14luwas sang gindala sang mga manugpatikang kag mga manugbaligya; kag ang tanan nga hari sang Arabia kag ang pangolo-puud sang duta nagdala sing bulawan kag pilak kay Salomon. 15Si Hari Salomon naghimo sing duha ka gatus ka kalasag nga bulawan nga pinapa; anum ka gatus ka siclo nga bulawan nga pinapa nagamit sa isa ka kalasag. 16Kag naghimo sia sing tatlo ka gatus ka taming nga bulawan nga pinapa; tatlo ka gatus ka siclo nga bulawan nagamit sa isa ka taming; kag ginbutang sila sang hari sa Balay sang Kagulangan sang Libano. 17Ang hari naghimo man sing isa ka trono nga tiposo, kag gintaklapan ini sing bulawan nga bus-og. 18May anum ka alintaga pakadto sa trono, nga may palatungan nga bulawan, nga natakud sa trono, kag mga halambuyan sa magtimbang nga kilid sang lingkoran kag duha ka leon nga nagatindug sa luyo sang mga halambuyan, 19samtang may napulog duha ka leon nga nagatindug didto, isa sa tagsa ka kilid sang anum ka alintaga. Walay kaangay sining nahimo sa bisan diin nga ginharian. 20Ang tanan nga ilimnan ni Hari Salomon bulawan, kag ang tanan nga gamit sang Balay sang Kagulangan sang Libano bus-og nga bulawan; sa kaadlawan ni Salomon ang pilak wala pagpakamahala. 21Kay ang hari may mga sakayan nga nagkadto sa Tarsis upud sang mga alagad ni Huram; makaisa sa tagsa ka tatlo ka tuig nagaabut ang mga sakayan sang Tarsis nga nagadala sing bulawan, pilak, tiposo, mga amo, kag mga pavo real.
22Sa sining bagay si Hari Salomon naglabaw sa tanan nga hari sang duta sa manggad kag sa kaalam. 23Kag ang tanan nga hari sang duta naghimulat sa pagpakigkita kay Salomon sa pagpamati sang iya kaalam, nga ginbutang sang Dios sa iya tagiposoon. 24Ang tagsa ka tawo sa ila nagdala sang iya dolot, mga suludlan nga pilak kag mga suludlan nga bulawan, panapton, hinganib, mga pahumut, mga kabayo, kag mga mula, sa amo kadamu tuigtuig. 25Kag si Salomon may apat ka libo ka palasudlan sang mga kabayo kag mga kangga, kag napulog duha ka libo ka manugkabayo,#1 Hari 4:26. nga ginbutang niya sa mga banwa nga sa mga kangga kag sa hari sa Jerusalem. 26Kag naggahum sia sa tanan nga hari kutub sa Suba tubtub sa duta sang mga Filistinhon, kag tubtub sa dulunan sang Egipto.#Gen. 15:18; 1 Hari 4:21. 27Kag sa Jerusalem ginbilang sang hari ang pilak nga daw mga bato,#Deut. 17:17. kag ginbilang niya ang mga cedro nga daw mga kahoy nga sicomoro nga yara sa kapatagan sa kabugana. 28Kag nagdala sila sing mga kabayo kay Salomon gikan sa Egipto#Deut. 17:16. kag gikan sa tanan nga duta.
Ang Pagkapatay ni Salomon
(1 Hari 11:41-43)
29Karon ang nabilin sang mga binuhatan ni Salomon, ang nahauna kag katapusan, wala bala sila masulat sa maragtas ni Natan nga manalagna, kag sa tagna ni Ahias nga Silonhon, kag sa mga palanan-awon ni Iddo nga manugpanan-aw nahanungud kay Jeroboam nga anak ni Nabat? 30Si Salomon naghari sa Jerusalem sa bug-os nga Israel sing kap-atan ka tuig. 31Kag si Salomon nagtolog upud sa iya mga ginikanan, kag ginlubung sia sa banwa ni David nga iya amay; kag naghari nga tal-us niya si Rehoboam nga iya anak.
Currently Selected:
2 MGA CRONICA 9: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
