2 MGA CRONICA 22
22
Ang Paghari ni Ocozias
(2 Hari 8:25-29)
1Kag ang mga pumuluyo sang Jerusalem naghimo nga hari nga tal-us niya kay Ocozias nga iya lalaking anak nga kamanghuran; kay ang kabon sang mga tawo nga nag-abut upud sang mga Arabiahanon sa dologan nagpatay sang tanan nga magulang. Gani naghari si Ocozias nga anak ni Joram nga hari sang Juda. 2Kap-atan kag duha ka tuig si Ocozias sang nagsugud sia sa paghari, kag naghari sia sing isa ka tuig sa Jerusalem. Ang ngalan sang iya iloy si Atalia, ang babaying anak ni Omri. 3Sia naglakat man sa mga dalanon sang panimalay ni Acab, kay ang iya iloy manuglaygay niya sa paghimo sing kalautan. 4Ginhimo niya ang malaut sa itololok sang Ginoo, subong sang panimalay ni Acab; kay sang patay na ang iya amay sila mga manuglaygay niya, sa iya kalaglagan. 5Naglakat man sia sono sa mga laygay nila, kag nag-upud kay Joram nga anak ni Acab nga hari sa Israel sa pag-away batok kay Hazael nga hari sang Siria sa Ramot-galaad. Kag ginpilas sang mga Sirianhon si Joram, 6kag nagpauli sia sa pagpabolong sa Jezreel sang mga pilas nga ginhatag nila sa iya sa Rama, sang nag-away sia batok kay Hazael nga hari sang Siria. Kag nagdulhog si Azarias nga anak ni Joram nga hari sang Juda sa pagduaw kay Joram nga anak ni Acab sa Jezreel, bangud nga masakit sia.
Si Jehu Nagapatay kay Ocozias
(2 Hari 9:27-29)
7Apang ang kalaglagan ni Ocozias gintangdo sang Dios paagi sa pagkadto niya kay Joram. Kay sang nag-abut sia naggowa sia upud kay Joram batok kay Jehu nga anak ni Nimsi, nga ginhaplas sang Ginoo sa pag-utud sang panimalay ni Acab. 8Kag sang nagahimo sing paghukom si Jehu sa panimalay ni Acab, nasapwan niya ang mga principe sang Juda kag ang mga lalaking anak sang mga utud ni Ocozias, nga nag-alagad kay Ocozias, kag ginpatay sila. 9Ginpangita niya si Ocozias, kag gindakup nila sia sang sia nagapanago sa Samaria, kag gindala nila sia kay Jehu kag ginpatay sia. Ginlubung nila sia, kay nagsiling sila, “Anak sia ni Josafat, nga nagpangita sa Ginoo sa bug-os niyang tagiposoon.” Kag ang panimalay ni Ocozias wala sing gahum sa pagdumala sang ginharian.
Si Atalia Nagaagaw sang Trono
(2 Hari 11:1-21)
10Karon sang nakita ni Atalia nga iloy ni Ocozias nga ang iya anak patay na, nagtindug sia kag naglaglag sang bug-os nga kaliwat nga harianon sang panimalay sang Juda. 11Apang si Josabet, ang babaying anak sang hari, nagkuha kay Joas nga lalaking anak ni Ocozias, kag ginkawat sia gikan sa tunga sang mga lalaking anak sang hari nga ginpamatay, kag ginbutang sia kag ang iya sisiwa sa hulut nga higdaan. Gani si Josabet, nga babaying anak ni Hari Joram kag asawa ni Joiada nga sacerdote, kay babaying utud sia ni Ocozias, nagtago sa iya gikan kay Atalia, sa bagay nga wala niya mapatay sia; 12kag nagtago sia upud sa ila sa balay sang Dios sing anum ka tuig, samtang si Atalia naghari sa duta.
Currently Selected:
2 MGA CRONICA 22: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
