2 MGA CRONICA 15
15
Ang mga Pagbalhin nga Nahimo ni Asa
(1 Hari 15:13-15)
1Nag-abut ang Espiritu sang Dios kay Azarias nga anak nga lalaki ni Oded, 2kag naggowa sia sa pagsugata kay Asa, kag nagsiling sa iya, “Pamatii ninyo ako, Asa, kag bug-os nga Juda kag Benjamin: Ang Ginoo nagaupud sa inyo, samtang kamo nagaupud sa iya. Kon pangitaon ninyo sia, makita sia ninyo, apang kon bayaan ninyo sia, sia magabiya sa inyo. 3Karon sa malawig nga panag-on ang Israel wala sang matuud nga Dios, kag wala sing sacerdote nga manunudlo, kag wala sing kasogoan; 4apang kon sila sa kalisdanan nagbalik sila sa Ginoo, ang Dios sang Israel, kag nagpangita sa iya, nakita nila sia. 5Sa sadto nga mga tion wala sing kalinong sa naggowa ukon sa nagsulud, kondi ang dalagku nga mga kagamo yara sa bug-os nga mga pumuluyo sang mga duta. 6Nagbuluagas sila, ang pungsud batok sa pungsud kag ang banwa batok sa banwa, kay ang Dios nagtublag sa ila sa tanan nga kapipit-an. 7Apang magpakabakud kamo! Dili magluya ang inyo mga kamut, kay ang inyo binuhatan balusan.”
8Sang nabatian ni Asa ining mga polong, ang tagna ni Azarias nga lalaking anak ni Oded, nagpakaisug sia, kag ginkuha niya ang mga kangil-aran sa bug-os nga duta sang Juda kag sang Benjamin kag gikan sa mga banwa nga iya kinuha sa kabakoloran sang Efraim, kag ginkaayo niya ang halaran sang Ginoo nga yara sa atubangan sang portico sang Ginoo. 9Kag ginpatipon niya ang bug-os nga Juda kag Benjamin, kag sila nga nagpanlugayaw upud sa ila gikan sa Efraim, sa Manases, kag gikan sa Simeon, kay madamu sila nga nagsaylo sa iya gikan sa Israel sang nakita nila nga ang Ginoo nga ila Dios yara upud sa iya. 10Gani nagtipon sila sing tingub sa Jerusalem sa ikatlo nga bulan sa tuig nga ikapulog lima sang paghari ni Asa. 11Sa sadtong adlaw naghalad sila sa Ginoo, gikan sa inagaw nga nadala nila, sing pito ka gatus ka baka kag pito ka libo ka carnero. 12Kag nagpakigkatipan sila sa pagpangita sa Ginoo, ang Dios sang ila mga ginikanan, sa bug-os nila nga tagiposoon kag sa bug-os nila nga kalag; 13kag ang bisan sin-o nga dili buut magpangita sa Ginoo, ang Dios sang Israel, patyon, bisan dalagku ukon magamay, bisan lalaki ukon babayi. 14Nagsumpa sila sa Ginoo sa mabaskug nga tingug, kag may sininggit, kag may mga budyong, kag mga corneta. 15Kag ang bug-os nga Juda nagkasadya sa sumpa; kay sa bug-os nila nga tagiposoon nagsumpa sila, kag sa bug-os nila nga handum ginpangita nila sia, kag nakit-an sia nila, kag ginhatagan sila sang Ginoo sing kapahuwayan sa palibut.
16Bisan si Maaca man, ang iloy ni Asa nga hari, ginkuha niya sa pagkahara bangud nga naghimo sia sing kangil-aran nga larawan nga Ashera. Ginpulud ni Asa ang iya larawan, gindugmok ini, kag gintutdan ini sa sapa nga Cidron. 17Apang ang mga duug nga mataas wala makuha sa Israel. Wala sing sapayan ang tagiposoon ni Asa himpit sa tanan niya nga adlaw. 18Kag ginsulud niya sa balay sang Dios ang mga butang nga ginpakabalaan sang iya amay, kag nga iya gid ginpakabalaan, pilak, bulawan, kag mga gamit. 19Kag wala na sing inaway tubtub sa ikakatloan kag lima nga tuig sang paghari ni Asa.
Currently Selected:
2 MGA CRONICA 15: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
