2 MGA CRONICA 11
11
1Sang nag-abut si Rehoboam sa Jerusalem, ginpatipon niya ang panimalay sang Juda kag sang Benjamin, ang isa ka gatus kag kawaloan ka libo ka lalaki nga pinili nga mga hangaway, sa pagpakig-away sa Israel, sa pagpabalik sang ginharian kay Rehoboam. 2Apang ang polong sang Ginoo nag-abut kay Semaya nga tawo sang Dios: 3“Ipamolong kay Rehoboam nga anak ni Salomon, hari sang Juda, kag sa bug-os nga Israel sa Juda kag sa Benjamin, 4‘Amo ini ang ginasiling sang Ginoo, Dili kamo magtaklad ukon mag-away batok sa inyo mga utud. Magpauli ang tagsa ka tawo sa iya balay, kay ining butang gikan sa akon.’” Gani nagpamati sila sa mga polong sang Ginoo, kag nagbalik gikan sa pagkadto batok kay Jeroboam.
Ang Paghari ni Rehoboam
(1 Hari 14:21-31)
5Nagpuyo si Rehoboam sa Jerusalem, kag nagpatindug sing mga banwa nga pamakud sa Juda. 6Ginpatindug niya ang Bet-lehem, ang Etam, ang Tecoa, 7ang Bet-sur, ang Soco, ang Adullam, 8kag ang Gat, ang Maresa, ang Zif, 9ang Adoraim, ang Laquis, ang Azeca, 10ang Zora, ang Ayalon, kag ang Hebron, nga yara sa Juda kag sa Benjamin, mga banwang napamakuran. 11Ginpamakuran niya ang mga kuta, kag nagbutang sa ila sing mga pangolo, kag mga sinuput nga kalan-on, lana kag alak. 12Kag sa tagsa ka banwa nagbutang sia sing mga taming kag mga bangkaw, kag ginlig-on sila sing lakas. Gani ang Juda kag ang Benjamin nangin-iya.
13Kag ang mga sacerdote kag ang mga Levinhon nga didto sa bug-os nga Israel nagdangup sa iya gikan sa bug-os niyang ginsakpan. 14Kay ginbayaan sang mga Levinhon ang ila mga palahalban kag ila pagkabutang kag nagkadto sila sa Juda kag sa Jerusalem, kay ginsikway sila ni Jeroboam kag sang iya mga lalaking anak nga indi sila magpanghikot sang pagkasacerdote sa Ginoo, 15kag nagtangdo sia iya sing mga sacerdote nga sa mataas nga mga duug, kag sa mga kanding nga lalaki, kag sa mga tinday sang baka nga nahimo niya.#1 Hari 12:31. 16Kag sa olihi nila gikan sa tanan nga kabikahan sang Israel, ang mga nagtuhoy sang ila mga tagiposoon sa pagpangita sa Ginoong Dios sang Israel, nag-abut sa Jerusalem sa paghalad sa Ginoo, ang Dios sang ila mga ginikanan. 17Ginpalig-on nila ang ginharian sang Juda, kag ginpabakud si Rehoboam nga anak ni Salomon sing tatlo ka tuig, kay sa tatlo ka tuig naglakat sila sa dalanon ni David kag ni Salomon.
18Nagpangasawa si Rehoboam kay Mahalat nga babaying anak ni Gerimot nga anak ni David, kag ni Abihail nga anak nga babayi ni Eliab nga lalaking anak ni Jesse; 19kag sia nag-anak sa iya sing mga lalaki, kay Jeus, kay Semarias, kag kay Zaham. 20Madason sa iya ginpangasawa niya si Maaca nga babaying anak ni Absalom, nga nag-anak sa iya kay Abias, kay Atai, kay Ziza, kag kay Selomit. 21Ginhigugma ni Rehoboam si Maaca nga anak ni Absalom labaw sa tanan niyang asawa kag babayi (nangasawa sia sing napulog walo kag may kan-uman ka babayi, kag nangin-amay sang duha ka pulo kag walo ka anak nga lalaki kag kan-uman ka anak nga babayi); 22kag gintangdo nga pangolo ni Rehoboam si Abias nga lalaking anak ni Maaca nga principe sa iya mga utud, kay buut niya nga himoon sia nga hari. 23Kag naggawi sia sing maalamon, kag ginlapta niya ang tanan niyang anak sa bug-os sang tanan nga duta sang Juda kag Benjamin, sa tagsa ka banwa nga napamakuran; kag ginhatagan niya sila sing mga kalan-on nga bugana, kag ginpaasaw-an sila sing madamu.
Currently Selected:
2 MGA CRONICA 11: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
