1 MGA HARI 14
14
Ang Tagna ni Abias batok kay Jeroboam
1Sa sadtong tion si Abias nga anak ni Jeroboam nagmasakit. 2Kag si Jeroboam nagsiling sa iya asawa, “Tindug ka, kag indi ka magpahilum sang imo kaugalingon, agud nga indi ka makilala nga asawa ni Jeroboam, kag kadto ka sa Silo; yari karon, yadto didto si Ahias nga manalagna, nga nagpamolong nahanungud sa akon nga ako manginhari sa ibabaw sini nga katawohan. 3Dala ka sing napulo ka bilog nga kalan-onon, mga torta, kag isa ka tibud nga dugus, kag kadto ka sa iya; sia magasugid sa imo kon ano ang maabutan sang bata.”
4Ang asawa ni Jeroboam naghimo sang subong; sia nagtindug, kag nagkadto sa Silo, kag nag-abut sa balay ni Ahias. Karon indi na makakita si Ahias, kay ang iya mga mata nag-unay bangud sa iya katigulangon. 5Kag ang Ginoo nagsiling kay Ahias, “Yari karon, ang asawa ni Jeroboam nagakari sa pagpamangkot sa imo nahanungud sang iya anak; kay nagamasakit sia. Subong sini kag subong sini ang imo isiling sa iya.”
Sang sia nagsulud, nagpakaiban sia nga babayi. 6Apang sang pagkabati ni Ahias sang lapaklapak sang iya tiil, sang nagsulud sia sa ganhaan, nagsiling sia, “Sulud, ikaw nga asawa ni Jeroboam; ngaa bala nagapakaiban ka? Kay ako ginpadala sa imo nga may balita nga mabug-at. 7Lakat, sugiri si Jeroboam, ‘Amo ining ginasiling sang Ginoo, ang Dios sang Israel: Bangud nga ginbayaw ko ikaw sa tunga sang katawohan, kag ginhimo ikaw nga principe sa ibabaw sang akon banwang Israel, 8kag ginkusnit ang ginharian gikan sa panimalay ni David kag ginhatag ini sa imo; kag bisan pa ikaw wala manginsubong kay David nga akon alagad, nga nagbantay sang akon mga sogo, kag nagsonod sa akon sa bug-os niya nga tagiposoon, sa paghimo sang matarung lamang sa akon mga mata, 9kondi naghimo ka sing malaut labaw pa sa tanan nga una sa imo kag naglakat kag naghimo sa imo sing iban nga mga dios, kag mga larawan nga tinunaw, sa pagpaakig sa akon, kag ginsikway mo ako sa imo pa likod; 10busa yari karon, magapadala ako sing malaut sa panimalay ni Jeroboam, kag utdon kay Jeroboam ang tagsa ka bata nga lalaki, sia nga ginbokot kag sia nga layaw sa Israel, kag silhigon sing bug-os ang panimalay ni Jeroboam,#1 Hari 15:29. subong sang pagsilhig sang ipot tubtub nga ini tanan maurut. 11Ang mapatay gikan kay Jeroboam sa banwa kaonon sang mga ido; kag ang mapatay sa latagon kaonon sang mga pispis sang langit; kay ang Ginoo nagpamolong sini.” ’ 12Busa tindug ka, pauli ka sa imo balay. Sa pagsulud sang imo mga tiil sa banwa, mapatay ang bata. 13Kag ang bug-os nga Israel magahaya sa iya, kag magalubung sa iya; kay sia lamang gikan kay Jeroboam ang makasulud sa lulubngan, kay sa iya nakit-an ang pila ka maayong butang ayon sa Ginoo, ang Dios sang Israel, sa panimalay ni Jeroboam. 14Labut pa ang Ginoo magapatindug sing hari sa ibabaw sang Israel, nga magautud sang panimalay ni Jeroboam karon nga adlaw. Kag kutub karon, 15ang Ginoo magalaglag sang Israel, subong sang tabun-ak nga ginauyug sa tubig, kag gabuton niya ang Israel gikan sining maayong duta nga iya ginhatag sa ila mga ginikanan, kag laptahon sila sa tabok sang Suba, bangud nga naghimo sila sang ila mga Asherim, nga nagpaakig sa Ginoo. 16Kag itugyan niya ang Israel bangud sang mga sala ni Jeroboam, nga iya ginpakasala kag diin ginpapakasala niya ang Israel.”
17Niyan ang asawa ni Jeroboam nagtindug, kag nagtaliwan, kag nag-abut sa Tirsa. Kag sang pagsulud niya sa atangan sang balay, ang bata napatay. 18Kag ang bug-os nga Israel naglubung sa iya kag naghaya sa iya, sono sa polong sang Ginoo, nga iya ginpamolong paagi sa iya alagad nga si Ahias nga manalagna. 19Karon ang nabilin nga mga binuhatan ni Jeroboam, kon paano ang pagpakig-away niya kag kon paano ang iya paghari, yari karon, nasulat sila sa Tolon-an sang mga Maragtas sang mga Hari sang Israel. 20Kag ang mga adlaw nga naghari si Jeroboam duha ka pulo kag duha ka tuig; kag nagtolog sia upud sa iya mga ginikanan, kag naghari nga tal-us niya si Nadab nga iya anak nga lalaki.
Ang Paghari ni Rehoboam
(2 Cron. 12:1-16)
21Karon si Roboam nga anak ni Salomon naghari sa Juda. Si Roboam kap-atan kag isa ka tuig sang nagsugud sia sa paghari, kag naghari sia sing napulog pito ka tuig sa Jerusalem, ang banwa nga ginpili sang Ginoo gikan sa tanan nga kabikahan sang Israel, sa pagbutang didto sang iya ngalan. Ang ngalan sang iya iloy si Naama nga Amonhon. 22Kag ang Juda naghimo sang malaut sa itololok sang Ginoo, kag ginpapangimon nila sia sa sala nga ginhimo nila, labaw sa tanan nga ginhimo sang ila mga ginikanan. 23Kay sila man nagpatindug nga sa ila sing mataas nga mga duug, kag mga obelisco, kag mga Asherim sa tagsa ka bakolod nga mataas kag sa idalum sang tagsa ka kahoy nga madabong;#2 Hari 17:9-10. 24kag may didto man nga mga sodomanhon#Deut. 23:17. sa duta. Naghimo sila sono sa tanan nga kangil-aran sang mga pungsud nga ginsobol sang Ginoo gikan sa atubangan sang katawohan sang Israel.
25Sa ikalima nga tuig ni Hari Roboam, si Sisac nga hari sang Egipto nagtaklad batok sa Jerusalem; 26ginkuha niya ang mga bahandi sang balay sang Ginoo kag ang mga bahandi sang balay sang hari; ginkuha gid niya ang tanan. Ginkuha niya ang tanan nga taming nga bulawan nga ginpahimo ni Salomon;#1 Hari 10:16-17; 2 Cron. 9:15-16. 27kag sa baylo nila naghimo si Hari Roboam sing mga taming nga saway, kag gintugyan sila sa mga kamut sang mga pangolo sang mga bantay, nga nagbantay sang ganhaan sang balay sang hari. 28Kag sa masunsun nga ang hari magsulud sa balay sang Ginoo, ang mga bantay nagdala sa ila kag ginauli sila sa hulut sang bantay.
29Karon ang nabilin nga mga binuhatan ni Roboam, kag ang tanan nga iya ginhimo, wala bala sila masulat sa Tolon-an sang mga Maragtas sang mga Hari sang Juda? 30Kag may dalayon nga inaway sa tunga ni Roboam kag ni Jeroboam. 31Kag si Roboam nagtolog upud sa iya mga ginikanan kag ginlubung upud sa iya mga ginikanan sa banwa ni David. Ang ngalan sang iya iloy si Naama nga Amonhon. Kag naghari nga tal-us niya si Abiam nga iya anak.
Currently Selected:
1 MGA HARI 14: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
