1 CORINTO 6

Ang Pagkadto sa Hukom sa atubangan sang mga Ditomoloo

1Nagapangahas bala ang bisan sin-o sa inyo, nga may butang batok sa isa, sa pagpakigkasaba sa atubangan sang dimatarung kag indi sa atubangan sang mga balaan? 2Wala bala kamo makahibalo nga ang mga balaan magahukom sang kalibutan? Kag kon ang kalibutan paghukman ninyo, indi bala kamo takus sa paghukom sa diotay nga mga kasaba? 3Wala bala kamo makahibalo nga magahukom kita sang mga manugtunda? Daw ano pa gid, sa mga butang nahanungud sining kabuhi! 4Niyan kon may amo kamo nga mga kasaba, ngaa bala ginabutang ninyo ini sila sa atubangan sang mga talamayon gid sang iglesia? 5Sa pagpakahuya sa inyo ginasiling ko ini. Wala bala sing makita sa tunga ninyo nga isa ka maalam nga tawo nga makahusay sa tunga sang mga kauturan, 6kondi ang utud nagapakigkasaba sa utud, kag ina sa atubangan sang mga dimatinoohon?

7Ina isa na ka kakulangan sa inyo nga may mga kinasabaay kamo. Ngaa bala wala ninyo hinonoo pag-antusa ang sayup? Ngaa indi kamo hinonoo magpatikas? 8Apang kamo inyo nagahimo sing sayup kag nagapanikas, kag ina sa inyo mga kauturan.

9Wala bala kamo makahibalo nga ang mga dimatarung indi makapanubli sang ginharian sang Dios? Dili kamo magtalang; bisan ang mga makihilawason, ukon mga diwatahan, ukon mga makihilahion, ukon babayinhon, ukon mga sodomanhon, 10ukon mga makawat, ukon mga mahamkonon, ukon mga palahobog, ukon mga mapasipalahon, ukon mga malugus indi makapanubli sang ginharian sang Dios. 11Kag ang iban sa inyo subong anay sina. Apang ginhugasan kamo, ginpakabalaan kamo, ginpakamatarung kamo sa ngalan ni Ginoong Jesu-Cristo kag sa Espiritu sang aton Dios.

Himayaa ang Dios sa Imo Lawas

12“Ang tanan nga butang tugut sa akon,” apang indi ang tanan nga butang sa kaayohan.#1 Cor. 10:23. “Ang tanan nga butang tugut sa akon,” apang indi ako magpaulipon sa bisan ano. 13“Ang kalan-on tungud sa tiyan kag ang tiyan tungud sa kalan-on”—kag tingub ini kag ang isa laglagon sang Dios. Ang lawas indi tungud sa pagpakighilawas, kondi tungud sa Ginoo, kag ang Ginoo tungud sa lawas. 14Kag ang Dios nagbanhaw sang Ginoo kag magabanhaw man sa aton paagi sa iya gahum. 15Wala bala kamo makahibalo nga ang inyo mga lawas mga bahin ni Cristo? Kuhaon ko bala niyan ang mga bahin ni Cristo kag himoon sila nga mga bahin sang isa ka makihilawason nga babayi? Malayo ina! 16Ukon wala bala kamo makahibalo nga ang nagapakigtingub sa makihilawason nga babayi isa ka lawas sa iya? Kay, subong sang nasulat, “Ang duha mangin-isa ka unud.”#Gen. 2:24. 17Apang ang nagapakigtingub sa Ginoo nangin-isa ka espiritu sa iya. 18Palagyo kamo sa pagkamakihilawason. Ang tagsa ka sala nga iban nga ginahimo sang tawo nahagowa sa lawas; apang ang makihilawason nagapakasala batok sa kaugalingon niya nga lawas. 19Wala bala kamo makahibalo nga ang inyo lawas templo sang Espiritu Santo nga yara sa inyo,#1 Cor. 3:16; 2 Cor. 6:16. nga inyo nabaton gikan sa Dios? Indi na kamo inyo; 20ginbakal kamo sa kabilyanan. Gani himayaa ang Dios sa inyo lawas.

Currently Selected:

1 CORINTO 6: ABHIL82

Highlight

Copy

Compare