Zacarias 14
14
Ang Jerusalem kag ang mga Kapungsoran
1Malapit na ang adlaw nga ang Ginoo magahukom. Dayon ang siudad sang Jerusalem pagaagawan sang mga pagkabutang, kag ang mga inagaw pagapartidahon sa imo atubang. 2Ang Ginoo magatipon sang tanan nga mga pungsod sa paggubat sang Jerusalem. Ang siudad pagaagawon, ang mga balay pagakawatan, kag ang mga babayi pagalugoson. Ang katunga sang mga tawo pagabihagon, pero ang iban nga mabilin indi pagkuhaon sa siudad. 3Dayon ang Ginoo magagwa kag magapakig-away batok sa yadtong mga kapungsoran, subong sang iya pagpakig-away sa nagligad nga panahon. 4Sa sadto nga tion magatindog sia sa Bukid sang mga Olivo, sa sidlangan sang Jerusalem. Dayon ang Bukid sang mga Olivo mapihak halin sa sidlangan tubtob sa nakatundan sang isa ka daku nga kapatagan. Ang katunga sang bukid magaidog pa aminhan kag ang katunga pa bagatnan. 5Magapalagyo ka paagi sa sini nga patag nga nagapihak sang bukid. Magapalagyo kamo subong sang inyo mga katigulangan sang paglinog sing mabaskog sa panahon ni Haring Uzias sang Juda. Ang Ginoo nga akon Dios magaabot upod sang tanan nga mga anghel.
6Kon mag-abot ina nga tion, wala na sing tigtulognaw ukon yelo, 7ukon kadudulman. Wala na sing gab-i kundi adlaw lamang. Ang Ginoo lamang ang makahibalo kon san-o ini mahanabo.
8Kon#Ezeq. 47:1; Juan 7:38; Bug. 22:1. mag-abot ina nga adlaw, ang tubig nga sarang mainom magailig halin sa Jerusalem, ang katunga sini pakadto sa Patay nga Dagat, kag ang katunga sa Mediteraneo. Magailig ini sa bug-os nga tuig sa tingadlaw kag sa tingulan. 9Dayon ang Ginoo manginhari sa bug-os nga duta, kag ang tagsatagsa magasimba sa iya subong nga Dios, kag makilala nila sia sa isa ka ngalan.
10Ang bug-os nga duta sa palibot sang Jerusalem pagatapanon halin sa Geba sa aminhan tubtob sa Rimon sa bagatnan. Ang Jerusalem magalabaw sa mga duta sa palibot sini kag ang siudad magalambot halin sa Pwerta ni Benjamin tubtob sa Pamusod nga Pwerta sa diin may pwerta anay, kag halin sa Tore ni Hananel tubtob sa mga pulogaan sang ubas sang hari. 11Ang#Bug. 22:3. mga tawo magaestar didto sing malinong nga wala na sing katalagman nga malaglag.
12Ang Ginoo magapadala sing makahalalit nga balatian sa tanan nga mga pungsod nga nagapakig-away sa Jerusalem. Ang ila unod magakadunot samtang buhi pa sila kag ang ila mga mata kag dila magakadunot man.
13Sa sadto nga tion ang Ginoo magapasalasala kag magapahadlok sa ila nga ang tagsatagsa magaliab sang tawo sa tupad niya kag magasalakay sa iya. 14Ang mga tawo sang Juda magapakig-away sa pag-apin sa Jerusalem. Agawon nila ang manggad sang tanan nga mga pungsod—bulawan, pilak, kag madamo nga mga bayu.
15Ang makahalalit nga balatian magaabot sa mga kabayo, sa mga mula, sa mga kamelyo, kag sa mga asno—sa tanan nga mga kasapatan sa kampo sang kaaway.
16Dayon#Lev. 23:39-43. ang tanan nga nabilin nga buhi gikan sa mga kapungsoran nga nagsalakay sang Jerusalem magakadto didto sa tagsa ka tuig sa pagsimba sa Ginoo sang mga hangaway subong hari, kag sa pagsaulog sang Piesta sang mga Palasilungan. 17Kon may pungsod nga indi maglakat sa pagsimba sa Ginoo sang mga hangaway subong nga hari, dayon indi mag-ulan sa ila duta. 18Kon ang mga Ehiptohanon indi magsaulog sang Piesta sang mga Palasilungan, dayon magaabot sa ila ang pamalatian nga ipadala sang Ginoo sa tagsa ka pungsod nga indi magtuman. 19Amo ini ang silot nga magaabot sa Ehipto kag sa tanan nga mga pungsod, kon indi sila magsaulog sang Piesta sang mga Palasilungan.
20Sa sadto nga tion bisan pa ang mga kilingkiling sang mga kabayo pagasulatan sini nga mga pulong: “Nahalad sa Ginoo.” Ang mga kolon nga ginalutoan sa Templo manginbalaan kaangay sang mga yahong sa atubangan sang altar. 21Ang tagsa ka lulutoan sa Jerusalem kag sa Juda pagapainon para gamiton sa pagsimba sa Ginoo sang mga hangaway. Ang mga tawo nga nagadulot sing mga halad magagamit sini agod nga lagaan sang mga karne sang mga halad. Kon mag-abot ina nga tion wala na sing mga manugbaligya sa Templo sang Ginoo sang mga hangaway.
Currently Selected:
Zacarias 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
