Zacarias 12
12
Ang mga Palaabuton nga Pagluwas sang Jerusalem
1Amo ini ang mensahe halin sa Ginoo, ang Ginoo nga nagahumlad sang kalangitan, nga nagtuga sang duta, kag naghatag sing kabuhi sa tawo. Nagasiling sia nahanungod sa Israel, 2“Himuon ko ang Jerusalem kaangay sang isa ka kupa sang bino, kag ang mga pungsod sa palibot niya magainom kag magadulingduling kaangay sang mga hubog. Kag kon kibunon nila ang Jerusalem, ang tanan nga mga siudad sang Juda pagakibunon man. 3Pero kon mag-abot ina nga panahon himuon ko ang Jerusalem kaangay sang isa ka mabug-at nga bato, kag ang bisan ano nga pungsod nga magtinguha sa paghakwat sini magaagom sing kahalitan. Ang tanan nga mga kapungsoran sa duta magabuylog sa pagsalakay sa iya. 4Sa sadto nga panahon pahugon ko ang ila mga kabayo, kag pasalahon ko ang ila mga sumalakay. Bantayan ko ang mga tawo sang Juda, pero bulagon ko ang mga kabayo sang ila mga kaaway. 5Dayon ang mga kabarangayan sang Juda magasiling sa ila kaugalingon, ‘Ang Ginoo nga Dios sang mga hangaway nagahatag sing kusog sa iya mga tawo nga nagaestar sa Jerusalem.’
6“Sa sadto nga panahon himuon ko ang mga kabarangayan sang Juda kaangay sang kalayo sa kagulangan ukon sa isa ka uma nga alanyon na kag pagalaglagon nila ang tanan nga mga pungsod nga yara sa palibot nila. Ang mga pumoluyo sang Jerusalem magapabilin nga wala sing katalagman sa siudad.
7“Ako, ang Ginoo, magapadaog sing una sa mga hangaway sang Juda, agod ang kadungganan nga mabaton sang mga kaliwat ni David kag sang mga pumoluyo sang Jerusalem indi maglabaw sang iya sang nabilin nga mga tawo sang Juda. 8Sa sadto nga panahon ang Ginoo magaapin sang mga pumoluyo sang Jerusalem, kag bisan ang labing maluya sa ila manginmabakod kaangay kay David sang una. Ang mga kaliwat ni David magatuytoy sa ila kaangay sang anghel sang Ginoo, kaangay sang Dios mismo. 9Sa sadto nga panahon laglagon ko ang tagsa ka pungsod nga magatinguha sa pagsalakay sang Jerusalem.
10“Ipasagahay#Juan 19:37; Bug. 1:7. ko sa mga kaliwat ni David kag sa mga pumoluyo sang Jerusalem ang espiritu sang pagkaluoy kag ang espiritu sang pagkamapinangamuyuon. Magatulok sila sa ila ginbuno kag napatay, kag magalalaw sila para sa iya pareho sang mga nagalalaw sa ila bugtong nga anak. Magalalaw sila nga nagahilibion kaangay sang mga nadulaan sang ila panganay nga anak nga lalaki. 11Sa sadto nga tion ang paglalaw sa Jerusalem mangindaku kaangay sang paglalaw kay Hadad-rimon#12:11 HADAD-RIMON: Ayhan ini nga ngalan napatungod kay Baal (tan-awa ang Lista sang mga Pulong). sa kapatagan sang Megido. 12-14Ang tagsa ka panimalay sa duta magalalaw sing pahain: ang panimalay nga kaliwat ni David, ang panimalay nga kaliwat ni Natan, ang panimalay nga kaliwat ni Levi, ang panimalay nga kaliwat ni Simei, kag ang iban pa nga mga panimalay nga nagkalabilin. Ang tagsa ka panimalay magalalaw sing pahain, kag ang mga lalaki sa tagsa ka panimalay magalalaw sing pahain sa mga babayi.
Currently Selected:
Zacarias 12: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
