Zacarias 10
10
Ang Ginoo Nagsaad sa Pagluwas
1Pangayo sa Ginoo sing ulan sa tion sang tingadlaw. Ang Ginoo amo ang nagapadala sing gal-om kag talithi, nga nagapalagtom sang talamnan para sa tanan. 2Ang#Mat. 9:36; Mar. 6:34. mga tawo nagadangop sa mga diosdios kag manughimalad, pero ang mga sabat nga ila makuha wala sing pulos kag binutig. Ang mga nagasaysay sang mga damgo nagapatalang. Ang paglipay nga ila ginahatag wala sing pulos. Gani ang mga tawo nagadalangdalang kaangay sang nagtalang nga karnero. Nagakinagamo sila tungod kay wala sila sing pangulo.
3Ang Ginoo nagasiling, “Naakig ako sa mga dumoluong nga nagagahom sa akon mga tawo, kag pagasilutan ko sila. Ang mga tawo sang Juda akon, kag ako, ang Ginoo sang mga hangaway, magaatipan sa ila. Sila ang akon gamhanan nga mga kabayo sa inaway. 4Gikan sa ila magahalin ang mga manugdumala, mga pangulo, kag mga manugsugo sa paggahom sang akon mga tawo. 5Ang mga tawo sang Juda magamadinalag-on kaangay sang mga soldado nga nagatasak sang ila mga kaaway sa lunang sang mga dalan. Magapakig-away sila tungod kay ang Ginoo kaupod nila, kag magalutos bisan pa sang mga kaaway nga nagasakay sa kabayo.
6“Pabakuron ko ang mga tawo sang Juda,
luwason ko ang mga tawo sang Israel.
Kaluoyan ko sila kag dalhon ko sila tanan pauli.
Daw kaangay lamang nga wala ko sila ginsikway.
Ako, ang Ginoo nga ila Dios,
kag sabton ko ang ila mga pangamuyo.
7Ang mga tawo sang Israel manginmabakod kaangay sang mga soldado,
nga nagakinasadya kag nagaininom sang bino.
Ang ila mga kaliwat magadumdom sini nga pagdaog
kag magakasadya tungod sang ginhimo sang Ginoo.
8“Pagatawgon ko ang akon mga tawo,
kag tipunon ko sila sing tingob.
Luwason ko sila kag padamuon
subong sang ila kadamuon sang una.
9Bisan#Bar. 2:20-32. ginpaalaplaag ko sila sa mga kapungsoran,
pero didto sa malayo nga mga lugar pagadumdomon nila ako.
Sila kag ang ila mga kabataan mabilin nga buhi,
kag magapauli sing tingob.
10Gikan sa Ehipto kag Asiria pagadalhon ko sila pauli,
kag paestaron ko sila sa ila kaugalingon nga duta.
Paestaron ko sila sa Galaad kag sa Libano man,
ang bug-os nga duta mapuno sang mga tawo.
11Kon mag-agi sila sa ila dagat sang kalalat-an,
ako, ang Ginoo, magahampak sang mga balod,
kag ang kadadalman sang Nilo magamala.
Ang bugalon nga Asiria pauboson,
kag ang Ehipto madulaan sing gahom.
12Pabakuron ko ang akon mga tawo,
magasimba sila kag magatuman sa akon.”
Ang Ginoo naghambal sini.
Currently Selected:
Zacarias 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
