Sirac 2
2
Ang Pagkatutom sa Dios
1Anak ko, kon ikaw nagahandom sa pag-alagad sa Ginoo,
ihanda ang imo kaugalingon sa pagtilaw.
2Magmanginsinsero ka, magpakalig-on,
kag indi ka magpakulba kon mag-abot ang mga kalalat-an.
3Magdangop ka sa Ginoo, kag indi sia pagsikwaya,
agod ikaw pasidunggan sa katapusan sang imo mga inadlaw.
4Bisan ano ang matabo sa imo, batuna ini,
kag magmapinasensyahon ka kon wala sing kasigurohan ang imo kubos nga kahimtangan.
5Kay#Klm. Sol. 3:5-6; 1 Ped. 1:7. ang bulawan ginatilawan sa kalayo,
kag ang pinili nga mga tawo paagi sa hornohan sang pagpaubos.
6Magsalig ka sa Ginoo kag sia magabulig sa imo,
sunda ang tadlong nga banas kag maglaom sa iya.
7Kamo nga nagatahod sa Ginoo, maghulat sang iya kaluoy,
indi ka magpalayo sa iya, basi ikaw mapukan.
8Kamo nga nagatahod sa Ginoo, magsalig sa iya,
kag indi niya kamo pagbalibaran sang inyo balos.
9Kamo nga nagatahod sa Ginoo, magpaabot sang maayo nga mga butang,
subong sang walay katapusan nga kalipay kag kaluoy.
10Talupangda ang nagligad nga mga kaliwatan kag tan-awa:
may yara bala nga napaslawan kay nagsalig sia sa Ginoo?
May nagsalig bala sing malig-on sa iya kag iya ginpatumbayaan?
Ukon may nagtawag bala sa iya kag wala niya ginsapak?
11Kay ang Ginoo mabinatyagon kag maluloy-on,
nagapatawad sia sang mga sala, kag nagapangluwas sa adlaw sang kalisdanan.
12Makaluluoy ang mga maluya sing tagipusoon kag nagakurog nga mga kamot
kag ang makasasala nga duha ka banas nga iya ginalaktan.
13Makaluluoy ang mga maluya sing tagipusoon!
Wala sila sing pagtuo, gani wala sing magaapin sa ila.
14Makaluluoy kamo nga nadulaan sing pagpailob,
ano bala ang himuon ninyo kon mag-abot ang Ginoo?
15Ang#Klm. Sol. 6:18; Juan 14:15, 21, 23. mga nagatahod sa Ginoo wala gid nagasupak sang iya mga pulong,
kag ang tanan nga nagahigugma sa iya nagatuman sang iya mga ginasugo.
16Ang mga nagatahod sa Ginoo nagahimo sang ila masarangan sa paglipay sa iya,
kag ang tanan nga nagahigugma sa iya nakunyag sa pagtuman sang iya Kasugoan.
17Ang mga nagatahod sa Ginoo nagahanda sang ila mga tagipusoon,
kag nagapaubos sila sa iya atubang, kag nagasiling,
18“Maayo pa nga mahulog kita sa kamot sang Ginoo,
sang sa kamot sang mga tawo,
tungod kay ang iya pagkahalangdon
subong kadako sang iya pagkamaluloy-on.”
Currently Selected:
Sirac 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012