Ruth 1
1
Si Elimelec kag ang Iya Panimalay Nag-estar sa Moab
1-2Sang una nga ang Israel ginpangulohan sang mga hukom, may tiggulotom nga nag-abot sa pungsod. Gani ang isa ka tawo nga taga-Betlehem nga sakop sang Juda nagdala sang iya asawa kag duha ka mga anak nga lalaki sa Moab sa pag-estar didto sing pila ka tuig. Ang ngalan sini nga tawo amo si Elimelec, ang iya asawa amo si Noemi kag ang ila duha ka mga anak nga lalaki amo si Mahalon kag si Quelion. Ini sila katapo sang kabarangayan ni Efrata. Samtang nagaestar sila sa Moab, 3si Elimelec napatay, kag si Noemi na lang kag ang iya duha ka mga anak nga lalaki ang nabilin. 4Nagpangasawa sila sang mga dalaga nga taga-Moab nga ang isa ginahingalanan kay Orpa kag ang isa kay Ruth. Sa tapos nakaestar sila didto sing napulo ka tuig, 5si Mahalon kag si Quelion napatay man, kag si Noemi nabilin nga wala na sing bana kag mga kaanakan nga lalaki.
Si Noemi kag si Ruth Nagbalik sa Betlehem
6Samtang didto pa sia sa Moab, si Noemi nakabati nga ang Ginoo naghatag sing maayo nga patubas sa iya mga tawo. Gani, nagpanghimos sia sa paghalin sa Moab upod sa iya mga umagad. 7Upod sila naglakat pabalik sa Juda, pero sa dalanon 8nagsiling sia sa ila, “Pauli kamo kag mag-estar upod sa inyo mga iloy. Kabay nga ang Ginoo magmaayo sa inyo subong nga nanginmaayo gid kamo sa akon kag sa ila nga nagtaliwan. 9Kag kabay nga buligan kamo sang Ginoo agod makapamana liwat kag mapahamtang sa kalinong sa inyo tagsa ka panimalay.”
Gani si Noemi naghalok sa ila sa pagpaalam, pero naghibi sila sing matunog 10kag nagsiling sa iya, “Indi kami magpauli, kundi maupod kami sa imo pakadto sa imo mga kasimanwa.”
11Si Noemi nagsabat, “Mga anak ko, labing maayo nga magpauli kamo. Ngaa bala mag-upod pa kamo sa akon? Makabata pa bala ako sing mga lalaki nga inyo mapamana? 12Magpauli kamo. Indi na ako makapamana liwat kay tigulang na ako. Bisan kon maghunahuna ako nga may paglaom pa, kag magpamana karon nga gab-i kag magpamata sing mga lalaki, 13hulaton pa bala ninyo nga magdalagku sila kag pamanahon? Punggan bala ninyo ang inyo kaugalingon sa pagpamana sa iban? Mga anak ko, nakahibalo kamo nga indi mahimo ina. Ang Ginoo naghatag sang kalisdanan sa akon, kag naluoy gid ako sa inyo.”#1:13 naluoy gid ako sa inyo: ukonnagapangasubo gid ako sang nadangatan ninyo.
14Sa liwat naghibi sila. Dayon si Orpa naghalok sa iya ugangan sa pagpaalam sa iya kag nagpauli,#1:14 Ang isa ka dumaan nga pagbadbadkag nagpauli. pero si Ruth indi maghalin. 15Gani si Noemi nagsiling sa iya, “Ruth, ang imo bilas nga babayi nagbalik sa iya mga kasimanwa kag sa iya dios#1:15 dios: ukonmga dios. nga ginasimba. Pauli ka upod sa iya.”
16Pero si Ruth nagsabat,
“Indi ako pagpilita sa pagbiya sa imo!
Paupda ako sa imo.
Maupod ako bisan diin ka makadto,
bisan diin ka mag-estar didto man ako magaestar.
Ang imo mga tawo mangin-akon mga tawo,
kag ang imo Dios mangin-akon Dios.
17Kon diin ka mapatay, didto man ako mapatay,
kag didto ako ilubong.
Kabay nga ang labing mabug-at nga silot sang Dios mangin sa akon kon ako magbiya sa imo
sa iban nga kabangdanan luas sa kamatayon!”
18Sang makita ni Noemi nga maupod gid si Ruth sa iya, wala na sia maghambal pa.
19Nagpadayon sila sa paglakat tubtob nakaabot sila sa Betlehem. Sang pag-abot nila, ang bug-os nga banwa nagkinagula, kag ang mga babayi nagsiling, “Si Noemi gid bala ini?”
20Nagsabat sia, “Indi ninyo ako pagtawga nga Noemi, kundi tawga ninyo ako kay Mara,#1:20 NOEMI…MARA: Sa Hebreo ang Noemi nagakahulogan “malipayon” kag ang Mara “mapait”. tungod kay ang Dios nga Makagagahom nagpaantos sa akon. 21Bugana ako sang paghalin ko diri, pero karon ginbalik ako sang Ginoo diri nga wala wala gid. Ngaa tawgon pa ninyo ako Noemi kay ang Dios nga Makagagahom nagasikway sa akon kag naghatag sang kalisdanan sa akon?”
22Gani, amo ini ang pagbalik ni Noemi halin sa Moab nga upod si Ruth, ang iya umagad nga babayi nga taga-Moab. Sang pag-abot nila sa Betlehem nagasugod gid ang tig-alani sang sebada.
Currently Selected:
Ruth 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012