Mga Taga-Roma 9
9
Ang Dios kag ang Iya Pinili nga Katawhan
1Matuod ang ginasiling ko, wala ako nagabutig kay iya ako ni Cristo. Ang akon konsensya nga ginagamhan sang Espiritu Santo nagapasalig man sa akon nga wala ako nagabutig. 2Ang matuod amo nga daku gid ang akon kalisod, kag wala gid nagauntat ang kasakit sa akon tagipusoon tungod sa akon mga kasimanwa nga akon gid mga kadugo! 3Tungod sa ila, maayo na lang kuntani nga ako mismo pakamalauton sang Dios, kag ipahamulag kay Cristo. 4Mga#Exo. 9:4. pinili sila nga katawhan sang Dios, kag ginhimo niya sila nga iya mga anak, kag ginpaambit sila sang iya himaya. Naghimo sia sing mga kasugtanan sa ila, kag ginhatag niya sa ila ang Kasugoan. May matuod sila nga pagsimba kag nabaton nila ang mga saad sang Dios. 5Naghalin sila sa Hebreo nga mga katigulangan, kag si Cristo sa iya tawhanon nga kinaugali, naghalin man sa ila kaliwat. Kabay nga dayawon sa gihapon ang Dios nga nagagahom sang tanan!#9:5 Kabay nga dayawon sa gihapon ang Dios nga nagagahom sang tanan!: ukonKag kabay nga sia, nga amo ang Dios nga nagagahom sang tanan, dayawon sa gihapon. Kabay pa.
6Wala ako nagasiling nga ang saad sang Dios napaslawan, tungod kay indi ang tanan nga mga kaliwat ni Israel pinili nga mga katawhan sang Dios. 7Indi#Gen. 21:12. man ang tanan nga mga kaliwat ni Abraham anak sang Dios, kay ang Dios nagsaad kay Abraham, “Ang mga kaliwat lamang ni Isaac amo ang pagaisipon nga imo mga anak.” 8Nagakahulogan ini nga ang mga anak nga matawo sa kinaandan nga paagi#9:8 MGA ANAK NGA MATAWO SA KINAANDAN NGA PAAGI: Ini napatuhoy sa mga kaliwat ni Abraham paagi kay Ismael, ang iya anak kay Hagar (tan-awa ang Gal. 4:22-23). indi mga anak sang Dios, kundi ang mga anak nga matawo tungod sang saad sang Dios amo ang ginakabig nga matuod nga mga kaliwat. 9Kay#Gen. 18:10. amo ini ang ginhambal sang Dios sang nagsaad sia kay Abraham, “Magabalik ako sa nagakaigo nga panahon kag si Sara magaanak sing isa ka anak nga lalaki.”
10Kag indi lamang ina, kay ang amay sang duha ka mga anak ni Rebeca amo si Isaac nga aton ginhalinan. 11-12Pero#Gen. 25:23. ang Dios nagsiling kay Rebeca, “Ang magulang magaalagad sa manghod,” agod nga ang pagpili sang isa sang iya mga anak matuman suno sa tinutuyo sang Dios. Iya ini ginsiling sa wala pa sila matawo kag sa wala pa sila makahimo sing maayo ukon malain. Gani ang pagpili nasandig sa pagtawag sang Dios, kag indi suno sa ila ginhimo. 13Kay#Mal. 1:2-3. ang kasulatan nagasiling, “Ginpili ko si Jacob, pero ginsikway ko si Esau.”
14Karon, ano ang aton masiling? Nga ang Dios indi matarong? Indi man! 15Kay #Exo. 33:19. nagsiling sia kay Moises, “Magakaluoy ako sa luyag ko kaluoyan, magakaawa ako sa luyag ko kaawaan.” 16Gani wala ini nasandig sa luyag ukon sa ginahimo sang tawo, kundi sa kaluoy lamang sang Dios. 17Kay#Exo. 9:16 (LXX). suno sa kasulatan sang Dios nagsiling sa hari sang Ehipto, “Sa sini nga tinutuyo ginhimo ko ikaw nga hari, agod nga paagi sa imo mapakita ko ang akon gahom kag mapakilala ko ang akon ngalan sa bug-os nga kalibutan”. 18Gani, ginakaluoyan sang Dios ang luyag niya kaluoyan, kag iya ginapatig-a ang tagipusoon nga luyag niya patig-ahon.
Ang Kaakig kag Kaluoy sang Dios
19Karon, ang isa sa inyo magapamangkot sa akon, “Kon amo ini, ngaa bala basulon pa sang Dios ang tawo sa iya pagpakasala? Kay sin-o bala ang makapamatok sa kabubot-on sang Dios?” 20Pero#Isa. 29:16; 45:9; Klm. Sol. 12:12. sin-o ka bala, abyan, nga magsabat sa Dios? Ang kolon indi makapamangkot sa naghimo sa iya, “Ngaa bala ginhimo mo ako sing subong sini?” 21Indi#Klm. Sol. 15:7; Sir. 33:13. bala nga ang tawo nga nagahimo sing mga kolon makapagusto sa paggamit sang lunang suno sa iya naluyagan kag sa paghimo sing duha ka kolon sa amo man nga lunang, ang isa para sa pinasahi nga mga pagtinipuntipon kag ang isa para gamiton adlaw-adlaw?
22Amo#Klm. Sol. 12:20-21. man ini ang ginhimo sang Dios. Luyag niya ipakita ang iya kaakig kag ipakilala ang iya gahom. Gani, mapainulobon gid sia sa pagbatas sang iya mga naakigan, nga madali na lang niya laglagon. 23Kag luyag man niya ipahayag ang iya di-matupungan nga kabantugan nga iya ginpaambit sa aton nga iya ginkaluoyan, kita nga iya na gin-aman sa pagbaton sang iya himaya. 24Kay kita amo ang iya gintawag, indi lamang gikan sa mga Judio kundi man gikan sa mga Hentil. 25Amo#Os. 2:23. ini ang iya ginsiling sa libro ni Oseas:
“Gamiton ko ang mga pulong ‘Akon mga Tawo’
sa pagtawag sa sadtong mga tawo nga indi akon.
Gamiton ko ang ngalan ‘Akon Hinigugma’
sa pagtawag sang isa ka pungsod nga wala ko ginahigugma.
26Kag#Os. 1:10. sa amo gid nga lugar sa diin ang Dios nagsiling, ‘Indi kamo akon mga tawo’,
didto ang Dios nga buhi magatawag sa ila nga iya mga anak.”
27Amo#Isa. 10:22-23 (LXX). ini ang ginpabutyag ni Isaias nahanungod sa Israel: “Bisan pa nga ang katawhan sang Israel manginsubong kadamo sang balas sa baybayon, pero pila lamang sa ila ang maluwas. 28Kay ang Ginoo magahukom sa labing madali sang tanan nga yara sa kalibutan.” 29Suno#Isa. 1:9 (LXX). ini sa ginsiling anay ni Isaias, “Kon ang Ginoo nga Makagagahom wala magbilin sa aton sing mga kaliwat, nanginkaangay na kita kuntani sa Sodoma kag Gomorra.”
Ang Israel kag ang Maayong Balita
30Karon, ano bala ang aton isiling? Amo ini ang aton masiling: ang mga Hentil nga wala nagtinguha nga pagabatunon sang Dios, ginbaton paagi sa pagtuo. 31Pero ang pinili nga katawhan nga nagtinguha nga pagabatunon sang Dios paagi sa pagtuman sang kasugoan, wala ginbaton. 32Kag ngaa man? Kay ang ila ginhimo wala masandig sa pagtuo, kundi sa mga buhat. Nakasandad sila sa “bato nga nagapasandad” 33suno#Isa. 28:16 (LXX). sa ginasiling sang kasulatan:
“Pamatii sing maayo, ginabutang ko sa Sion ang isa ka igang
nga magapasandad sa mga tawo,
isa ka bato nga magapahagmak sa ila.
Pero ang nagatuo sa iya indi mapaslawan.”
Currently Selected:
Mga Taga-Roma 9: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
