Bugna 12
12
Ang Babayi kag ang Dragon
1Dayon ang isa ka daku kag makatalanhaga nga talan-awon nagpakita sa langit: may isa ka babayi nga ang iya bayu amo ang adlaw, ang bulan yara sa idalom sang iya mga tiil, kag ang iya ulo may korona nga may dose ka mga bituon. 2Manugbata na sia, kag nagasinggit sia tungod sang kasakit kag pag-antos sang pagpanganak.
3Kag#Dan. 7:7. may isa pa gid ka makatalanhaga nga talan-awon ang nagpakita sa langit. May isa ka daku kag pula nga dragon nga may pito ka mga ulo kag napulo ka mga sungay, kag may korona sa tagsa niya ka ulo. 4Ginpanglalas#Dan. 8:10. sang iya ikog ang ikatlo nga bahin sang mga bituon sa langit kag ginpanghaboy sila sa duta. Nagtindog sia sa atubang sang babayi nga manugbata, agod nga iya kaunon ang bata sa tion sang iya pagkatawo. 5Dayon#Isa. 66:7; Sal. 2:9. ang babayi nag-anak sang isa ka bata nga lalaki nga magagahom nga may bug-os nga awtoridad kag wala luoyluoy sa tanan nga mga kapungsoran. Pero ang bata ginsabnit kag gindala sa Dios nga nagapungko sa iya trono. 6Ang babayi nagpalagyo pakadto sa desierto, didto sa lugar nga gin-aman sang Dios para sa iya, sa diin pagatatapon sia sa sulod sang 1,260 ka adlaw.
7Dayon#Dan. 10:13, 21; 12:1; Jud. 9. nagsugod ang inaway sa langit. Si Miguel kag ang iya mga anghel nagpakig-away batok sa dragon. Ang dragon nagbato upod sa iya mga anghel. 8Pero ang dragon nalutos, kag sia kag ang iya mga anghel gintabog halin sa langit. 9Ginhaboy#Gen. 3:1; Luc. 10:18. pa gwa ang daku nga dragon! Sia amo anay yadtong man-og nga gintawag Yawa ukon Satanas nga nagpatalang sang bug-os nga kalibutan. Ginhulog sia sa duta, upod sang tanan niya nga mga anghel.
10Dayon#Job 1:9-11; Zac. 3:1. nabatian ko ang mabaskog nga tingog sa langit nga nagasiling, “Karon nag-abot na ang kaluwasan halin sa Dios! Karon ang Dios nagpakita sang iya gahom subong Hari! Karon ang iya Cristo nagpahayag sang iya awtoridad! Kay ang nagtindog sa atubang sang Dios kag nagsumbong sang aton mga kautoran sa adlaw kag gab-i, ginhaboy pagwa sa langit. 11Ang aton mga kautoran nagdaog batok sa iya paagi sa dugo sang Kordero, kag paagi sa kamatuoran nga ila ginwali. Handa sila sa paghalad sang ila kabuhi kag mapatay. 12Gani, magkalipay kamo, mga langit, kag tanan kamo nga nagaestar dira! Pero daw ano ka makakulogmat para sa duta kag sa kadagatan! Kay ang Yawa nagpanaog sa inyo, nga nagabalingaso sa kaakig, tungod kay nahibaluan niya nga diutay na lang ang iya tion nga nabilin.”
13Sang matalupangdan sang dragon nga ginhulog sia sa duta, ginlagas niya ang babayi nga nag-anak sang bata nga lalaki. 14Ang#Dan. 7:25; 12:7. babayi ginhatagan sing duha ka mga pakpak sang daku nga agila, agod nga makalupad sia pakadto sa iya lugar sa desierto, sa diin pagatatapon sia sa sulod sang tatlo ka tuig kag tunga, nga indi maano sang dragon. 15Dayon ang dragon nagbuga sing madamo nga tubig nga daw baha pakadto sa babayi, agod anuron sia sini. 16Pero gintabangan sang duta ang babayi. Ginnganga sang duta ang iya baba kag ginsuyop ang tanan nga tubig nga naghalin sa baba sang dragon. 17Naakig pa gid ang dragon sa babayi, kag nagpakig-away sia batok sa nabilin nga mga kaliwat sang babayi, ang tanan nga nagatuman sang mga sugo sang Dios kag mga matutom sa kamatuoran nga ginpahayag ni Jesus. 18Kag ang dragon nagtindog#12:18 Kag ang dragon nagtindog: Ang iban nga mga manuskrito mayKag nagtindog ako. sa baybayon.
Currently Selected:
Bugna 12: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
