Mga Salmo 94
94
Ang Dios nga Hukom sang Tanan
1O Ginoo, ikaw isa ka Dios nga nagasilot,
ipakita ang imo kaakig!
2Ikaw ang hukom sang tanan nga mga tawo,
tindog ka kag ihatag sa mga bugalon ang nagakabagay sa ila!
3Tubtob pa bala san-o ang pagkinasadya sang mga malaut?
Tubtob pa bala san-o, O Ginoo?
4Tubtob pa bala san-o ang pagpabugal sang mga nagahimo sang kalautan
kag ang pagpahambog nila sang ila mga sala?
5Ginahingabot nila ang imo mga tawo, O Ginoo,
ginapigos nila ang imo kaugalingon nga mga tawo.
6Ginapamatay nila ang mga babayi nga balo kag ang mga ilo,
kag ginapamatay man nila ang mga dumoluong nga nagaestar sa amon duta.
7Nagasiling sila, “Ang Ginoo indi makakita sa aton,
ang Dios sang Israel wala nagasapak!”
8O mga tawo ko, daw ano gid kabuangbuang sa inyo?
San-o pa bala kamo makatuon?
9Ang Dios ang naghimo sang aton mga dulonggan, indi bala sia makabati?
Sia ang naghimo sang aton mga mata, indi bala sia makakita?
10Sia ang nagasaway sa mga kapungsoran, indi bala sia ang magsilot sa aton malaut nga mga pangulo?#94:10 sa aton malaut nga mga pangulo?: ukonsa ila?
Sia ang manunodlo sang tanan nga mga tawo, wala bala sia sing ihibalo?
11Ang#1 Cor. 3:20. Ginoo nakahibalo sang ila ginahunahuna,
nahibaluan niya nga wala sing pulos ang ila mga rason.
12O Ginoo, daw ano ka malipayon ang tawo nga imo ginatudloan,
ang tawo nga imo ginatudloan sang imo kasugoan,
13sa paghatag sa iya sing kapahuwayan sa mga adlaw sang kagamo,
tubtob makutkot ang lulobngan para sa malaut nga mga tawo.
14Ang Ginoo indi magbiya sang iya mga tawo,
indi niya sila pagsikwayon.
15Ang katarungan makita liwat sa mga hukmanan,
kag pagasakdagon ini sang tanan nga matarong nga mga tawo.
16Sin-o bala ang nag-apin sa akon batok sa mga malaut?
Sin-o bala ang nagdampig sa akon batok sa mga nagahimo sang kalautan?
17Kon ang Ginoo wala nagbulig sa akon,
kuntani didto na ako karon sa malinong nga lulobngan.
18Nagsiling ako, “Nakadanlog ako”,
pero ang imo mapinadayunon nga gugma, O Ginoo, nag-alay-ay sa akon.
19Kon ako indi mapahamtang kag nagapalibog,
ikaw nagalipay kag nagapasadya sa akon.
20Wala ka sing labot sa malaut nga mga hukom,
nga nagapahito sing kalainan paagi sa kasugoan,
21nga nagaplano batok sa maayo nga mga tawo,
kag nagapamatbat sing kamatayon sa mga wala sing sala.
22Pero ang Ginoo nagatabang sa akon,
ang akon Dios nagaapin sa akon.
23Pagasilutan niya sila tungod sang ila mga kalautan,
kag pagalaglagon niya sila tungod sang ila mga sala;
ang Ginoo nga aton Dios magalaglag sa ila.
Currently Selected:
Mga Salmo 94: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
