Numeros 35
35
Ang mga Siudad nga Ginhatag sa mga Levita
1Sa#Jos. 21:1-42. mga kapatagan sang Moab sa tabok sang Jordan halin sa Jerico, ang Ginoo nagsiling kay Moises, 2“Singgana ang mga Israelinhon nga gikan sa pagkabutang nga ila nabaton, kinahanglan hatagan nila ang mga Levita sing mga siudad nga ila pagaestaran kag mga duta nga palahalban sa palibot sang mga siudad. 3Ini nga mga siudad mangin-iya sang mga Levita kag didto sila magaestar. Ang lugar sa palibot manginpalahalban sang ila mga kabakahan kag sang iban nila nga mga kasapatan. 4Ang palahalban magalambot sing 500 ka yarda pagwa halin sa mga pader sang siudad sa bug-os nga palibot. 5Kinahanglan nga takson ini agod nga sa tagsa ka kilid may yara nga kwadrado nga duta nga ang kalaparon 1,000 ka yarda, kag ang siudad yara sa tunga sini. 6Hatagan ninyo ang mga Levita sing anom ka mga siudad nga dalangpan sa diin ang isa ka tawo makapalagyo kon makapatay sia sing tawo sa indi hungod. Wala labot sini, hatagi ninyo sila sing kwarentay dos ka mga siudad. 7Ang bug-os nga kadamuon sang mga siudad kwarentay otso tanan, lakip ang mga palahalban sini. 8Ang kadamuon sang mga siudad sang mga Levita sa tagsa ka tribo manginsuno sa kadakuon sang iya kadutaan.”
Ang mga Siudad nga Dalangpan
(Deut. 19:1-13; Jos. 20:1-9)
9Ang#Deut. 19:2-4; Jos. 20:1-9. Ginoo nagsugo kay Moises, 10“Singgana ang mga tawo sang Israel: “Kon makatabok kamo sa Suba sang Jordan kag makasulod sa duta sang Canaan, 11kinahanglan magpili kamo sing mga siudad nga dalangpan sa diin ang isa ka tawo makapalagyo kon makapatay sia sing isa ka tawo sa indi hungod. 12Didto manginhilway sia sa katalagman sa pagtimalos sang pariente sang tawo nga napatay. Ang tawo nga ginsumbong sa pagpatay indi pagpatyon nga wala mahukmi sa atubang sang katilingban. 13Magpili kamo sing anom ka mga siudad, 14tatlo sa sidlangan sang Jordan, kag tatlo sa duta sang Canaan. 15Ini mangindalangpan nga mga siudad para sa mga Israelinhon kag mga dumoluong nga permanente nga mga pumoluyo ukon umalagi lamang. Ang bisan sin-o nga makapatay sing indi hungod makadangop sa isa sining mga siudad.
16-18“Pero kon may isa ka tawo nga maggamit sing salsalon, ukon bato ukon kahoy sa pagpatay sing tawo, may salabton sia sa pagpatay, kag pagapatyon sia. 19Ang pinakamalapit nga pariente sang tawo nga napatay may katungdanan sa pagpatay sang tawo nga nakapatay. Kon makita niya sia, iya dayon sia patyon.
20“Kon may isa ka tawo nga tungod sa iya dumot nakapatay sing tawo paagi sa pagtikwang sa iya, ukon paagi sa paghaboy sa iya sing bisan ano nga butang, 21ukon paagi sa pagsumbag sa iya, may salabton sia sa pagpatay, kag pagapatyon sia. Ang pinakamalapit nga pariente sang tawo nga napatay may katungdanan sa pagpatay sang tawo nga nakapatay. Kon makita niya sia, iya sia dayon patyon.
22“Pero, abi, may isa ka tawo nga sa indi hungod nakapatay sing tawo nga wala niya ginadumti, ayhan paagi sa pagtikwang sa iya ukon paghaboy sa iya sang bisan ano nga butang. 23Ukon, abi, may isa ka tawo nga wala nagatan-aw nakahaboy sing bato nga nakapatay sang tawo nga wala man sia sing tuyo sa paghalit, kag indi man niya kaaway. 24Sa sini nga mga kahimtangan, ang katilingban magahukom sa pag-apin sang tawo nga nakapatay kag indi sa nagahandom sa pagtimalos nga pariente sang tawo nga napatay. 25Ang katilingban kinahanglan magtabang sang tawo nga nakapatay sa pariente sang tawo nga napatay, kag ibalik nila sia sa siudad nga dalangpan sa diin sia nagpalagyo. Kinahanglan didto sia mag-estar tubtob sa kamatayon sang tawo nga amo ang Pinakamataas nga Pari sa sadto nga tion. 26Kon ang tawo nga nakapatay maggwa sa siudad nga dalangpan sa diin sia nagpalagyo, 27kag kon makita sia sang pariente sang tawo nga napatay kag patyon sia, ini nga pagtimalos wala sing silot. 28Ang tawo nga nakapatay kinahanglan magpabilin sa siudad nga dalangpan tubtob sa kamatayon sang Pinakamataas nga Pari, pero sa tapos sini, mahimo na sia makapauli. 29Ini nga mga pagsulondan para sa inyo kag sa inyo mga kaliwat bisan diin kamo nagaestar.
30“Ang#Deut. 17:6; 19:15. tawo nga ginsumbong sa pagpatay mahimo nga mapamatud-an kag mapapatay lamang sa tapos ang pagpamatuod sang duha ukon tatlo ka mga saksi; ang pagpamatuod sang isa ka saksi indi tuman sa pagsakdag sang panumbongon sa pagpatay. 31Ang nakasala sa pagpatay kinahanglan patyon. Indi sia makalikaw sini nga silot paagi sa pagbayad sing kwarta. 32Kon ang isa ka tawo nakapalagyo sa siudad nga dalangpan, indi sia pagtugoti nga makapauli paagi sa pagbayad sing kwarta sa wala pa ang kamatayon sang Pinakamataas nga Pari. 33Kon himuon ninyo ini pagadagtaan ninyo ang duta sa diin kamo nagaestar. Ang pagpatay nagadagta sang duta, kag wala sing paagi sa paghimo sang tulomanon sa pagpaninlo para sa duta sa diin ang isa ka tawo ginpatay, luas sa kamatayon sang tawo nga nagpatay. 34Indi ninyo pagdagtai ang duta sa diin kamo nagaestar, tungod kay ako amo ang Ginoo, kag nagaestar ako upod sa mga tawo sang Israel.”
Currently Selected:
Numeros 35: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
