Numeros 33
33
Ang Pagpanglakaton halin sa Ehipto pakadto sa Moab
1Ang masunod nga mga nasulat nagahatag sang mga ngalan sang mga lugar sa diin ang mga Israelinhon naghimo sing kampo, sa tapos sila makahalin sa Ehipto suno sa ila mga tribo sa idalom sang pagdumala ni Moises kag ni Aaron. 2Sa sugo sang Ginoo, ginsulat ni Moises ang ngalan sang lugar sa tagsa ka paghimo nila sing kampo.
3Ang mga tawo sang Israel naghalin sa Ehipto sa ika-15 nga adlaw sang nahauna nga bulan sang tuig, ang adlaw sa tapos ang nahauna nga Pascua. Sa idalom sang pag-amlig sang Ginoo, naghalin sila sa siudad sang Rameses samtang nagatan-aw ang mga Ehiptohanon, 4nga nagalubong sang mga panganay nga mga anak nga lalaki nga ginpamatay sang Ginoo. Paagi sa paghimo sini, ginpakita sang Ginoo nga labi pa sia ka gamhanan sang sa mga dios sang Ehipto.
5Ang mga tawo sang Israel naghalin sa Rameses kag naghimo sing kampo sa Sucot. 6Ang madason nila nga kampo ila ginpatindog sa Etam, sa higad sang desierto. 7Halin didto nagliko sila pakadto sa Pi-hahirot, sa sidlangan sang Baal-zepon, kag naghimo sila sing kampo malapit sa Migdol. 8Naghalin sila sa Pi-hahirot kag nag-agi sila sa Mapula nga Dagat#33:8 MAPULA NGA DAGAT: Tan-awa ang Lista sang mga Pulong. pakadto sa desierto sang Sur. Sa tapos ang tatlo ka adlaw nga paglakat, naghimo sila sing kampo sa Mara. 9Halin didto nagkadto sila sa Elim, sa diin naghimo sila sing kampo, tungod kay didto may dose ka mga tuboran sang tubig kag setenta ka puno sang mga palma.
10Naghalin sila sa Elim kag naghimo sila sing kampo malapit sa Baybayon sang Suez. 11Ang ila madason nga kampo didto sa desierto sang Sin. 12Dayon naghimo sila sing kampo sa Dofca, 13kag pagkatapos didto sa Alus. 14Madason didto sa Refidim, sa diin wala sing tubig sila nga sarang mainom.
15-37Halin sa Refidim pakadto sa Bukid sang Hor naghimo sila sing kampo sa masunod nga mga lugar: Desierto sang Sinai, Kibrot-hataava ukon “Mga Lulobngan sang Pagkaibog”, Hazerot, Ritma, Rimonfarez, Libna, Rissa, Keelata, Bukid sang Sefer, Harada, Maquelot, Tahat, Tera, Mitca, Asmona, Moserot, Benejaakan, Hor-hagidgad, Jotebata, Abrona, Eziongeber, desierto sang Zin (nga amo ang Kades), kag sa Bukid sang Hor, sa higad sang duta sang Edom.
38-39Sa#Num. 20:22-28; Deut. 10:6; 32:50. mando sang Ginoo, si Aaron nga pari nagtaklad sa Bukid sang Hor. Didto sia napatay sa edad nga 123 ka tuig sa nahauna nga adlaw sang ikalima nga bulan sang ika-40 ka tuig sa tapos makahalin ang mga Israelinhon sa Ehipto.
40Ang#Num. 21:1. hari sang Arad sa nabagatnan nga Canaan nakabati nga ang mga Israelinhon nagapadulong.
41-49Halin sa Bukid sang Hor pakadto sa mga kapatagan sang Moab ang mga Israelinhon naghimo sing kampo sa masunod nga mga lugar: Zalmona, Punon, Obot, sa mga ginub-an sang Abarim sa kadutaan sang Moab, Dibon-gad, Almon-diblataim, sa Kabukiran sang Abarim malapit sa Bukid sang Nebo, kag sa mga Kapatagan sang Moab sa tabok sang Suba sang Jordan halin sa Jerico, sa gintung-an sang Bet-hesimot kag Kapatagan sang Akasya.
Ang mga Tugon sa Wala pa Makatabok sa Jordan
50Didto sa mga kapatagan sang Moab sa tabok sang Jordan halin sa Jerico ang Ginoo naghatag kay Moises 51sang masunod nga mga tugon para sa Israel: “Kon makatabok kamo sa Jordan pakadto sa duta sang Canaan, 52kinahanglan tabugon ninyo ang tanan nga mga pumoluyo sang duta. Laglagon ninyo ang tanan nila nga mga diosdios nga bato kag metal, kag ang tanan nga mga lugar nga ila ginasimbahan. 53Agawa ninyo ang duta kag mag-estar kamo sa sini, tungod kay ginahatag ko ini sa inyo. 54Partidaha#Num. 26:54-56. ninyo ang duta sa nagakalainlain nga mga tribo kag mga kabarangayan, paagi sa pagabutgabot, nga nagahatag sing daku nga bahin sa daku nga barangay, kag ang diutay nga bahin sa diutay nga barangay. 55Pero kon indi ninyo matabog ang mga pumoluyo sang duta, ang mga nabilin manginkaangay sang mga puling sa inyo mga mata kag mga tunok sa inyo mga kilid, kag magapakig-away sila batok sa inyo. 56Kon indi ninyo sila pagtabugon, laglagon ko kamo subong sang akon tuyo sa paglaglag sa ila.”
Currently Selected:
Numeros 33: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
