Numeros 2
2
Ang Pagpahamtang sang mga Tribo sa Kampo
1Ang Ginoo naghatag kay Moises kag kay Aaron sang masunod nga mga pagsulondan nga nagasiling nga 2kon ang mga Israelinhon magpatindog sing kampo, ang tagsa ka tawo magpatindog sang iya tolda sa idalom sang bandera sang iya grupo kag sang bandera sang iya kaugalingon nga barangay. Ang kampo ipahamtang sa palibot sang Tolda sang presensya sang Ginoo.
3-9Sa nasidlangan nga bahin, ang mga nasakop sa idalom sang bandera sang grupo ni Juda magapatindog sing mga tolda upod sa ila mga sakop, sa idalom sang ila mga pangulo nga amo ang masunod:
| Tribo | Pangulo | Kadamuon |
|---|---|---|
| Juda | Naason, anak ni Aminadab | 74,600 |
| Isacar | Netanel, anak ni Zuar | 54,400 |
| Zabulon | Eliab, anak ni Helon | 57,400 |
| Kabug-osan: | 186,400 |
Ang grupo ni Juda amo ang magalakat sing una.
10-16Sa nabagatnan nga bahin, ang mga nasakop sa idalom sang bandera sang grupo ni Ruben magapatindog sang kampo upod sa ila mga sakop, sa idalom sang ila mga pangulo nga amo ang masunod:
| Tribo | Pangulo | Kadamuon |
|---|---|---|
| Ruben | Elizur, anak ni Sedeur | 46,500 |
| Simeon | Selumiel, anak ni Zurisadai | 59,300 |
| Gad | Eliasaf, anak ni Deuel | 45,650 |
| Kabug-osan: | 151,450 |
Ang grupo ni Ruben amo ang ikaduha nga magalakat.
17Dayon, sa gintung-an sang nahauna nga duha ka grupo kag sang katapusan nga duha ka grupo ang mga Levita amo ang magalakat nga nagadala sang Tolda sang presensya sang Ginoo. Ang tagsa ka grupo magalakat sa amo man nga pagpasunod subong sang ila pagpahamtang sang ila kampo, ang tagsatagsa sa idalom sang ila bandera.
18-24Sa nakatundan nga bahin, ang mga nasakop sa idalom sang bandera sang grupo ni Efraim magapatindog sang ila kampo upod sa ila grupo, sa idalom sang ila mga pangulo nga amo ang masunod:
| Tribo | Pangulo | Kadamuon |
|---|---|---|
| Efraim | Elisama, anak ni Amiud | 40,500 |
| Manases | Gamaliel, anak ni Pedazur | 32,200 |
| Benjamin | Abidan, anak ni Gideoni | 35,400 |
| Kabug-osan: | 108,100 |
Ang grupo ni Efraim amo ang ikatlo nga magalakat.
25-31Sa naaminhan nga bahin, ang mga nasakop sa idalom sang bandera sang grupo ni Dan magapatindog sang ila kampo upod sa ila grupo, sa idalom sang ila mga pangulo nga amo ang masunod:
| Tribo | Pangulo | Kadamuon |
|---|---|---|
| Dan | Ahiezer, anak ni Amisadai | 62,700 |
| Aser | Pagiel, anak ni Ocran | 41,500 |
| Neftali | Ahira, anak ni Enan | 53,400 |
| Kabug-osan: | 157,600 |
Ang grupo ni Dan amo ang katapusan nga magalakat.
32Ang bug-os nga kadamuon sang mga tawo sang Israel nga nalista sa mga grupo naglambot sa 603,550. 33Suno sa ginmando sang Ginoo kay Moises, ang mga Levita wala ginlista upod sa iban nga mga Israelinhon.
34Gani ang mga tawo sang Israel nagtuman sang tanan nga butang nga ginsugo sang Ginoo kay Moises. Naghimo sila sing kampo, ang tagsatagsa sa idalom sang iya kaugalingon nga bandera, kag naglakat sila, ang kada-isa upod sa iya kaugalingon nga barangay.
Currently Selected:
Numeros 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012