Numeros 17
17
Ang Sungkod ni Aaron
1Ang Ginoo nagsiling kay Moises, 2“Singgana ang mga tawo sang Israel sa paghatag sa imo sang dose ka mga sungkod, isa halin sa tagsa ka pangulo sang tagsa ka tribo. Isulat ang ngalan sang tagsa ka tawo sa iya sungkod 3kag dayon isulat ang ngalan ni Aaron sa sungkod nga iya sang tribo ni Levi. May isa ka sungkod para sa tagsa ka pangulo sang tribo. 4Dalha ini tanan sa Tolda sang akon presensya kag ibutang ini sa atubangan sang Kaban sang Kasugtanan, sa diin ako magapakigkita sa inyo. 5Dayon ang sungkod sang tawo nga akon ginpili magapanalingsing. Sa sini nga paagi pauntaton ko ang padayon nga pagreklamo sini nga mga Israelinhon batok sa imo.”
6Gani si Moises naghambal sa mga Israelinhon, kag ang kada-isa sang ila mga pangulo naghatag sa iya sing sungkod, isa para sa tagsa ka tribo, dose tanan, kag ang sungkod ni Aaron ginbutang upod sini. 7Dayon ginbutang ni Moises ang tanan nga mga sungkod sa Tolda sa atubangan sang Kaban sang Kasugtanan sang Ginoo.
8Sang#Heb. 9:4. madason nga adlaw, sang pagsulod ni Moises sa Tolda, nakita niya nga ang sungkod ni Aaron nga iya sang tribo ni Levi, nagpanalingsing. Nanglumbay ini, namulak, kag nagpamunga sing mga almendro nga luto! 9Ginkuha ni Moises ang tanan nga mga sungkod kag ginpakita niya ini sa mga Israelinhon. Nakita nila ang nahanabo kag ang tagsa ka pangulo nagkuha sang iya kaugalingon nga sungkod. 10Ang Ginoo nagsiling kay Moises, “Iuli ang sungkod ni Aaron sa atubangan sang Kaban sang Kasugtanan. Pagataguon ini subong isa ka paandam sa mga rebelde nga mga Israelinhon nga magakalamatay sila kon indi sila mag-untat sang ila mga pagreklamo.” 11Ginhimo ini ni Moises suno sa sugo sang Ginoo.
12Ang mga tawo sang Israel nagsiling kay Moises, “Kon amo katapusan na namon ini! 13Kon ang bisan sin-o lang nga magpalapit sa Tolda sang presensya sang Ginoo mapatay, kon amo pareho lang nga patay na kami tanan!”
Currently Selected:
Numeros 17: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
