Miqueas 4
4
Ang Mahidaiton nga Paggahom sang Ginoo sa Bug-os nga Kalibutan
(Isaias2:2-4)
1Sa palaabuton nga mga adlaw
ang bukid nga ginatindugan sang Templo
manginpinakamataas sa tanan,
magatimbuok labaw sa tanan nga mga kabakuloran.
Madamo nga mga pungsod ang magakadto sa iya,
2kag ang ila mga tawo magasiling,
“Dali, mataklad kita sa bukid sang Ginoo,#4:2 BUKID SANG GINOO: Bukid sang Sion (tan-awa ang Sion sa Lista sang mga Pulong).
sa Templo sang Dios sang Israel.
Tudloan niya kita kon ano ang luyag niya nga aton pagahimuon,
malakat kita sa mga dalanon nga iya ginpili.
Kay ang pagtudlo sang Ginoo nagagikan sa Jerusalem,
gikan sa Sion nagahambal sia sa iya mga tawo.”
3Husayon#Isa. 2:4; Joel 3:10. niya ang mga pagsinuay sang mga pungsod,
kag manginhukom sia sa tunga sang gamhanan nga mga pungsod, nga malapit kag malayo sa Israel.
Ang ila mga espada himuon nila nga mga arado,
kag ang ila mga bangkaw himuon nila nga mga inughagbas.
Ang mga pungsod indi na maggubat sa pagpakig-away,
ukon maghanda liwat para sa inaway.
4Ang#Zac. 3:10. tagsatagsa magaestar sa paghidait
sa tupad sang iya katamnan sing ubas kag mga kahoy nga higera,
kag wala sing may magapahadlok sa ila.
Ang Ginoo sang mga hangaway nagsaad sini.
5Ang tagsa ka pungsod nagasimba kag nagatuman sang ila kaugalingon nga dios, pero magasimba kita kag magatuman sa Ginoo nga aton Dios sa walay katubtoban.
Ang Israel Magabalik halin sa Pagkabihag
6Ang Ginoo nagasiling, “Ang tion magaabot nga akon tipunon ang mga tawo nga nag-antos sa pagkabihag, ining mga tawo nga akon ginsilutan. 7Mga piang sila kag malayo sila sa ila mga ilistaran, pero ang diutay nga mabilin magasugod liwat kag mangingamhanan nga pungsod. Magagahom ako sa ila sa Bukid sang Sion halin sadto nga tion tubtob sa walay katubtoban.”
8Kag ikaw, Jerusalem, sa diin ang Dios kaangay sang manugbantay sang mga karnero nga yara sa tore, nagabantay sang iya mga tawo, sa liwat manginpangulo ikaw nga siudad sang ginharian pareho sang una. 9Ngaa nagagurahab ka? Ngaa nagaantos ka kaangay sang babayi nga manugbata? Tungod bala nga wala ikaw sing hari, kag ang imo mga manuglaygay patay na? 10Maglubid ka sa kasakit kag mag-ugayong, mga pumoluyo sang Jerusalem, kaangay sang babayi nga manugbata. Karon kinahanglan maghalin kamo sa siudad kag mag-estar sa latagon. Kinahanglan magkadto kamo sa Babilonia, pero didto pagahilwayon kamo sang Ginoo gikan sa inyo mga kaaway. 11Madamo nga mga pungsod ang nagtipon sa pagsalakay sa imo. Nagasiling sila, “Ang Jerusalem kinahanglan gub-on! Luyag kita magtan-aw nga guba ini nga siudad!” 12Pero ini nga mga pungsod wala makahibalo kon ano ang yara sa hunahuna sang Ginoo. Wala sila makahibalo nga nagaplano sia sa pagtipon sa ila kag sa pagsilot sa ila, pareho sang inani nga ginatipon kag ginalinas.
13Ang Ginoo nagasiling, “Mga pumoluyo sang Jerusalem, lakat kamo kag siluti ang inyo mga kaaway! Pabakuron ko kamo kaangay sang baka nga salsalon ang mga sungay kag bronsi ang mga kuko. Dugmokon ninyo ang madamo nga mga pungsod, kag ang manggad nga ila ginkuha sa palugos inyo ihatag sa akon, ang Ginoo sang bug-os nga kalibutan.
Currently Selected:
Miqueas 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
