Miqueas 2
2
Ang Madangatan sang mga Nagapigos sa mga Imol
1Makaluluoy ang mga nagahigda nga wala nagakatulog kag nagaplano sing kalautan! Pagkaaga, kon may kahigayunan lang sila, ginahimo nila ang kalautan nga ila ginplano. 2Kon luyag sila sing mga talamnan, ginaagaw nila ini. Kon luyag sila sing mga balay, ginaagaw man nila ini. Wala sing tawo nga makapat-od nga indi pagkuhaon ang iya panimalay kag pagkabutang.
3Gani ang Ginoo nagasiling, “Nagaplano ako sa pagpadala sing kalalat-an sa inyo, kag indi kamo makapalagyo. Indi na kamo makalakat nga may bugal, kay manginmalain ini nga panahon para sa inyo. 4Kon mag-abot ina nga panahon, ang mga tawo magagamit sang inyo inagihan subong mga halimbawa sang kalalat-an, kag magakanta sila sining masubo nga kalantahon:
Nalaglag kami sing bug-os!
Ang Ginoo nagkuha sang amon duta.
Ginhatag niya ini sa mga nagbihag sa amon.”
5Gani, wala sing isa sa inyo nga pagahatagan sing duta sa adlaw nga partihon ini liwat sa mga tawo sang Ginoo.
6Ang mga tawo nagsaway sa akon nga nagasiling, “Indi kami pagwalihi. Indi kami pagwalihi nahanungod sini tanan. Ang Dios indi magpakahuya sa amon. 7Ginapakamalaut bala ang mga tawo sang Israel? Nadulaan bala sing pasensya ang Ginoo? Himuon bala niya ini nga mga butang? Wala bala sia#2:7 Ang isa ka dumaan nga pagbadbadwala bala sia; sa Hebreowala bala ako. nagahambal sing maayo sa ila nga nagahimo sing matarong?”
8Ang Ginoo nagasabat, “Ginasalakay ninyo ang akon mga katawhan subong mga kaaway. Ginaagaw ninyo ang mga kunop nga ginasuksok sang mahidaiton nga mga tawo nga nakabalik gikan sa inaway kag nagahunahuna sila nga indi na sila maano. 9Ang mga babayi sa akon katawhan gintabog ninyo gikan sa mga balay nga ila ginapakamahal kag gin-agaw ninyo sing dayon sa ila mga kabataan ang akon mga kaayuhan. 10Magtindog kamo kag maghalin diri, kay indi ini lugar nga palahuwayan. Tungod sang inyo mga sala nga nagadagta malaglag ini nga lugar.
11“Ang sahi sang propeta nga naluyagan sang mga tawo amo ang propeta nga nagakadto bisan diin nga nagabinutig kag nagadaya kag nagasiling, ‘Ginapahibalo ko sa inyo nga ang bino kag iban nga ilimnon magabugana sa inyo.’
12“Pero tipunon ko sing tingob kamo tanan nga mga tawo sang Israel nga nagkalabilin. Tipunon ko kamo kaangay sang mga karnero sa toril, kag sang mga karnero sa ila palahalban. Ang inyo duta mapun-an liwat sang ginahod sang madamo nga mga tawo.”
13Ang Dios magabukas sang alagyan para sa ila kag magapangulo sa ila pa gwa. Magagwa sila sa mga pwerta sang siudad kag manginhilway. Ang ila hari, ang Ginoo mismo, amo ang magapangulo sa ila pa gwa.
Currently Selected:
Miqueas 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
