Mateo 7
7
Ang Paghukom sa Iban
(Luc. 6:37-38, 41-42)
1“Indi kamo maghukom sa iban, agod ang Dios indi man maghukom sa inyo. 2Kay#Mar. 4:24. ang Dios magahukom sa inyo suno sa inyo paghukom sa iban, kag ang talaksan nga inyo ginagamit sa iban, amo man ang talaksan nga gamiton sang Dios sa paghukom sa inyo. 3Kay ngaa bala ginahimutaran mo gid ang diutay nga puling sa mata sang imo utod, pero wala mo ginasapak ang puling nga daw troso kadako sa imo kaugalingon nga mata? 4Ano ang pagsiling mo sa imo utod, ‘Abi kuhaon ko ang diutay nga puling sa imo mata,’ kon sa imo kaugalingon nga mata may puling nga daw troso kadako? 5Hipokrito! Kuhaa anay ang puling nga daw troso kadako sa imo mata, agod makakita ka sing maathag kag ugaling kuhaon mo ang diutay nga puling sa mata sang imo utod.
6“Indi pag-ihatag ang balaan nga mga butang sa mga ido, kay balikdon ka nila kag kadton. Indi pag-ihaboy ang mga perlas sa atubangan sang mga baboy kay pagatasakon lamang nila ini.
Pangayo, Pangita, Panuktok
(Luc. 11:9-13)
7“Pangayo kag pagahatagan kamo, pangita kag makakita kamo, panuktok kag pagaabrihan kamo. 8Kay ang tagsatagsa nga nagapangayo pagahatagan, kag ang tagsatagsa nga nagapangita makakita, kag ang nagapanuktok pagaabrihan. 9May ara bala sa inyo nga amay nga magahatag sing bato sa iya anak kon sia nagapangayo sing tinapay? 10Ukon magahatag bala sia sing man-og kon ginapangayuan sia sang isda? 11Gani kon kamo nga mga malaut makahibalo maghatag sing maayo nga mga butang sa inyo mga kabataan, daw ano pa gid ang inyo Amay nga yara sa langit. Magahatag sia sing maayo nga mga butang sa mga nagapangayo sa iya!
12“Himua#Tob. 4:15; Luc. 6:31. sa iban ang luyag ninyo nga pagahimuon sa inyo. Amo ini ang kahulogan sang Kasugoan ni Moises kag ang mga pagtudlo sang mga propeta.
Ang Makitid nga Pwerta
(Luc. 13:24)
13“Sulod#Sir. 15:17. kamo sa pwerta nga makitid, tungod kay masangkad ang pwerta kag mahapos ang dalan pakadto sa kalaglagan, kag madamo ang nagaalagi sa sini. 14Pero makitid ang pwerta kag mabudlay ang dalan nga nagapakadto sa kabuhi, kag diutay gid lang nga mga tawo ang makatultol sini.
Ang Kahoy kag ang Iya Bunga
(Luc. 6:43-44)
15“Andam kamo sa indi matuod nga mga propeta. Nagakadto sila sa inyo nga daw mga karnero, pero sa sulod daw kasubong gid sila sang mapintas nga mga lobo. 16Makilala#Sir. 27:6. ninyo sila sa ila mga pagginawi. Ang mga sapinit wala nagapamunga sing mga ubas, kag ang mga talungon wala nagapamunga sing mga higos. 17Ang maayo nga kahoy nagapamunga sing maayo nga bunga, pero ang malain nga kahoy nagapamunga sing malain nga bunga. 18Ang maayo nga kahoy indi makapamunga sing malain nga bunga, kag ang malain nga kahoy indi makapamunga sing maayo nga bunga. 19Ang#Mat. 3:10; Luc. 3:9. tagsa ka kahoy nga wala nagapamunga sing maayo nga bunga ginatapas kag ginahaboy sa kalayo. 20Gani,#Mat. 12:33. makilala ninyo ang indi matuod nga mga propeta sa ila mga buhat.
Ang Adlaw Sang Paghukom
(Luc. 13:25-27)
21“Indi ang tanan nga nagatawag sa akon ‘Ginoo, Ginoo,’ makasulod sa Ginharian sang langit, kundi ang nagahimo lamang sang kabubot-on sang akon Amay nga yara sa langit. 22Kon mag-abot na ang Adlaw sang Paghukom, madamo ang magasiling sa akon ‘Ginoo, Ginoo! Sa imo ngalan nagwali kami, sa imo ngalan nagtabog kami sang mga demonyo kag naghimo sang madamo nga mga milagro!’ 23Dayon#Sal. 6:8. magasiling ako sa ila, ‘Wala ako makakilala sa inyo. Palayo kamo sa akon, kamo nga manugbuhat sang malaut!’
Ang Duha ka Manugpatindog sang Balay
(Luc. 6:47-49)
24“Gani, ang tagsatagsa nga nagapamati sang akon mga pulong kag nagatuman sini kaangay sia sang isa ka maalam nga tawo nga nagpatindog sang iya balay sa igang. 25Nagbunok ang ulan, nag-awas ang baha sa pangpang sang suba kag nagwaswas ang mabaskog nga hangin sa sadto nga balay. Pero wala ini matumba tungod kay napasad ini sa igang.
26“Pero ang tagsatagsa nga nagapamati sang akon mga pulong kag wala nagatuman sini, kaangay sia sa tawo nga buangbuang nga nagpatindog sang iya balay sa balas. 27Nagbunok ang ulan, nag-awas ang baha sa pangpang sang suba kag nagwaswas ang mabaskog nga hangin sa sadto nga balay. Natumba ini kag daw ano ang pagragamak sini!”
Ang Awtoridad ni Jesus
28Sa tapos mahambal ni Jesus ini nga mga butang, ang mga tawo natingala gid sa iya pagpanudlo. 29Indi#Mar. 1:22; Luc. 4:32. sia kaangay sang ila mga manunodlo sang Kasugoan, kay ang iya pagpanudlo may awtoridad.
Currently Selected:
Mateo 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
