Sulat ni Jeremias 1
1
1Amo#Jer. 29:1. ini ang kopya sang sulat nga ginpadala ni Jeremias sa mga taga-Jerusalem sa wala pa sila madakop sang hari sang Babilonia kag mabihag pakadto sa Babilonia. Ang kaundan sini nga sulat amo ang mensahe nga ginmando sang Dios nga igahatag ni Jeremias sa ila.
Ang mga Tawo Nagpangatubang sang Malawig nga Pagkabihag
2Nakasala kamo batok sa Dios. Tungod sini madali na lang kamo dalhon subong mga binilanggo ni Haring Nabucodonosor padulong sa Babilonia. 3Magapabilin kamo didto sa malawig nga mga tinuig, tubtob sa pito ka kaliwatan, dayon pabalikon kamo sang Dios sing mahidaiton sa inyo ilistaran gikan sa Babilonia.
4Didto sa Babilonia, makita ninyo ang mga dios nga nahuman sa kahoy, pilak kag bulawan—mga dios nga ginapas-an sang mga tawo kag ginakahadlukan sang mga di-tumoluo. 5Maghalong kamo nga indi mag-ilog sa sining mga Hentil. Indi kamo magkahadlok sa ila mga dios kon makita ninyo ini nga ginaprosisyon kag ginasimba. 6Sa baylo magsiling kamo sa inyo kaugalingon, “Ikaw lamang, O Ginoo, ang amon dapat simbahon.” 7Ang anghel sang Dios magaupod sa inyo; magabantay ini sia sa inyo.
Ang mga Diosdios Wala sing Sarang Mahimo
8Ang ila mga diosdios nataklapan sang pilak kag bulawan kag ang ila mga dila nahuman sa kahoy nga ginhimo sang mga tawo nga batid sa pag-obra sa kahoy. Pero ini sila indi matuod nga mga dios, kag indi sila makahambal. 9Ang mga tawo nagabuhat sang bulawan nga mga korona kag nagabutang sini sa mga ulo sang ila mga dios nga kuno abi ining mga dios kasubong sang mga dalaga nga mahuyogon sang alahas. 10Kon kaisa ang mga pari nagakawat sining mga pilak kag bulawan gikan sa ila mga dios kag ila ini ginagamit para sa ila kaugalingon, 11kag ila gani ginahatag ang iban sini sa malain nga mga babayi nga yara sa templo. Ang mga tawo nagabakal sining mga dios nga nahuman sa kahoy, pilak kag bulawan kag ila ini ginapabayuan kasubong sang tawo. 12Pero bisan nabayuan ini sila sang granate kasubong sang mga hari, wala sila sang sarang mahimo batok sa pagpug-is ukon makapangapin sang ila kaugalingon batok sa mga anay. 13Kon ang yab-ok sang templo magkalap-al sa ila mga guya, isa sang mga tawo ang nagapahid sini. 14Kasubong sang mga tawo nga hukom, nagauyat sila sang mga setro, pero wala sila sing gahom sa pagsilot sa bisan kay sin-o nga nagbuhat sing malain batok sa ila. 15Kon kaisa may ginauyatan sila nga mga daga kag wasay, pero indi sila makapangapin sang ila kaugalingon sa inaway ukon sa pagdala sa ila sang mga makawat. 16Ini tanan nagapamatuod nga indi sila mga dios, gani indi kamo magsimba sa ila.
17Yadtong mga dios nga nagpungko sa ila mga templo wala sing pulos katulad sang buong nga yahong. Ang ila mga mata napuno sang yab-ok nga naggikan sa mga sandalyas sang mga tawo sa ila pagsulod. 18Ang mga pari nagapabakod sang mga templo paagi sa mga pwertahan nga may mga rehas kag dalagku nga pintal agod nga indi makasulod ang mga makawat. Ang mga dios nasiraduhan sing mapag-on kasubong sang isa ka binilanggo nga madali na lang patyon tungod sang sala batok sa hari. 19Ang mga pari nagasindi sang mga suga para sa mga dios nga sobra pa sang sa ila kinahanglanon, pero ang mga dios indi makakita bisan isa lamang sini. 20Ang ila mga kaundan ginaut-ot sang anay kasubong sang mga balayan sang templo kag ang ila mga bayu nagakagisi, pero wala sila sini makahibalo. 21Nag-ilitom ang ila mga guya tungod sang aso sa templo. 22Ginahapunan sila sang mga kulonaknit, mga salimbabatang kag iban pa nga mga pispis, kag bisan pa gani ang mga kuring nagapungko sa ila. 23Ini tanan nagapamatuod nga indi sila mga dios, gani indi kamo magsimba sa ila.
24Ining mga dios gintaklapan sang bulawan agod magtahom sila, pero indi sila magbadlak kon wala sing may magpahining sa ila. Sang ginbutang sila sa mga hormahan wala sila nagbatyag. 25Bisan daku nga pilak ang ginbayad para sa ila, indi man sila gihapon makaginhawa. 26Tan-awa kon daw ano ang ila pagkawalay pulos! Indi sila makalakat sa ila kaugalingon nga mga tiil, pero kinahanglan nga dulodalhon sila. 27Bisan pa gani ang mga nagaatipan sa ila nagakahuya kon ang isa sang ila mga dios mahulog sa duta kag kinahanglan hakwaton liwat. Kon patindugon ang isa sini sa ila sa isa ka lugar, indi sia makahulag, kag kon nagahilay ini sia, indi sia makatadlong sang iya kaugalingon. Ang paghalad sa ila kasubong sa paghatag sang regalo sa bangkay. 28Ang mga pari nagabaligya sang mga ginhalad sa ila mga dios kag ginagamit nila ang kwarta para sa ila kaugalingon. Kag ang mga asawa sang mga pari nagaasin sang mga halad para lutoon sa ulihi, sa baylo nga ipakigbahin nila ini sa mga imol kag makaluluoy. 29Bisan pa gani ang mga babayi nga nagapamulanon kag ang mga bag-o pa lamang nagbata ginapatandog sang mga halad. Ini tanan nagapamatuod nga indi sila mga dios, gani indi kamo magsimba sa ila.
30Ano ang pagtawag mo sa ila nga mga dios kon ang mga babayi ginapahalad sa sining mga butang nga nahuman sa kahoy, pilak kag bulawan? 31Bisan pa gani ang mga pari nagapungko sa mga templo kon sila nagalalaw, nga ang ila mga bayu gisi, kag nakiskisan ang ila wala tabon nga mga ulo. 32Nagaginahod ang mga pari kag nagasininggit sila sa atubang sang ila mga dios kasubong nga daw nagapakigbahin sila sa piesta sang lubong. 33Ginaubahan nila ang ila mga dios kag ang mga bayu sini ila ginapanghatag sa ila mga asawa kag kabataan. 34Wala sing kaso nga ang isa ka tawo magbulig ukon magsakit sa sining mga dios kay indi man sila makabalos sa iya. Indi sila makabuhat sang isa ka hari ukon makapahalin sang hari sa iya trono 35kag indi man sila makabuhat nga magmanggaranon ang isa ka tawo ukon maghatag sa iya sang kwarta. Kon ang isa ka tawo magpanaad sa ila pero wala man niya ini ginatuman, indi nila sia mapabayad. 36Indi nila maluwas ang tawo gikan sa kamatayon kag indi man sila makabulig sang maluya batok sa makusog. 37Indi nila mabalik liwat ang panulok sang bulag ukon maluwas ang isa ka tawo nga yara sa katalagman. 38Indi sila makahatag kaluoy ukon makabulig sa mga balo kag mga ilo. 39Ining mga butang nga nahuman sa kahoy kag nahaklapan sang pilak kag bulawan wala gid sing gahom kasubong sang isa ka bato nga nakuha sa kilid sang mga bukid, kag ang mga tawo nga nagasimba sa ila mabutang sa kahuloy-an. 40Paano ang paghunahuna sang isa ka tawo nga ini sila mga dios ukon magtawag sa ila nga mga dios?
Ang Kabuangan sang Pagsimba sa mga Diosdios
Ang mga taga-Babilonia nagadala sing kahuloy-an sa ila kaugalingon nga mga dios. 41Kon#Isa. 46:1. ang isa ka tawo indi makahambal, ila sia ginadala sa templo kag magpangabay kay Bel nga hatagan ang tawo sang gahom sa paghambal, kasubong bala nga daw makahangop si Bel sang bisan ano nga butang. 42Pero bisan ang mga tawo nakatalupangod nga ang ila mga dios indi makabulig, mga buang sila gihapon sa pagpadayon sa pagsimba sa ila. 43Kag indi lamang ina, kundi nga ang mga babayi nagawagkos sang mga kordon kag magpungko sa higad sang dalan samtang nagadabok sang insyenso kag maghalad sang ila kaugalingon subong malain nga mga babayi. Kon ang isa sa ila kuhaon agod magpakighilawas, sa iya pagbalik ginayaguta niya ang babayi nga madason sa iya nga indi gid matahom sang sa iya kay wala napilian. 44Ang tanantanan nga mga bagay natungod sini nga mga diosdios binutig. Paano ang paghunahuna sang isa ka tawo nga ini sila mga dios ukon magtawag sa ila nga mga dios?
45Ang mga manug-obra sa kahoy kag sa bulawan amo ang naghimo sining mga dios gani nga indi sila mangin-iban nga bagay kundi kasubong lamang sang luyag sining mga tawo. 46Bisan pa ang mga naghimo sa ila wala nagalawig, gani paano nga makabuhat sila sang mga dios? 47Ining mga tawo nagbilin sang kabutigan kag kahuy-anan subong panublion para sa masunod nga mga kaliwatan. 48Kon mag-abot ang inaway kag kagamo, ang mga pari nagaplano kon sa diin sila magapanago upod ang ila mga dios. 49Ining mga diosdios wala gid sing sarang mahimo sa tion sang inaway kag kagamo. Ngaa nga ang mga tawo wala nagatalupangod nga ining mga diosdios indi mga dios?
50Ining mga diosdios mga kahoy lamang nga nataklapan sang pilak kag bulawan, magaabot ang adlaw nga mabuyagyag ang kamatuoran nga indi sila mga dios. 51Ang mga pungsod kag mga hari magatalupangod nga ining mga diosdios mga binuhatan lamang sang tawhanon nga mga kamot. Wala sila sing diosnon nga gahom, 52kag ang bisan sin-o magahibalo nga indi sila matuod nga mga dios.
53Ining mga dios indi makabuhat sang hari ukon makapaulan. 54Indi sila makapamat-od sang ila kaugalingon nga mga bulohaton ukon makahatag kinamatarong sa mga ginapigos, wala gid sila sing sarang mahimo. Kasubong sila sang walay pulos nga mga uwak nga nagalibutlibot sa paglupad sa kahanginan. 55Kon masunog ang templo, ang mga pari nagapalagyo sa pagluwas sang ila kaugalingon, samtang ang ila mga dios nga nahuman sa kahoy kag nahaklapan sang pilak kag bulawan nabilin nga masunog kasubong sang mga balayan nga kahoy. 56Indi sila makapakig-away batok sa mga hari ukon makapakigsumpong batok sa mga kaaway. Paano ang pagpati sang isa ka tawo nga ini sila mga dios?
57Ining mga dios nga nahuman sa kahoy kag nahaklapan sang pilak kag bulawan indi makaapin sang ila kaugalingon batok sa mga makawat kag mga buyong, 58nga magakuha sang ila mga pilak kag bulawan kag mga bayu kag ila ini tanan ginadala. Ang mga dios wala sing mahimo sa pagtapna sa ila. 59Mas maayo pa sa ila ang maisog nga hari, ukon ang isa ka mapuslanon nga kolon. Mas maayo pa ang pwertahan sang sa di-matuod nga dios, kay ang pwertahan magaapin sang mga pagkabutang sa sulod sang balay. Bisan pa gani ang kahoy nga haligi sang palasyo mas maayo sang sa di-matuod nga dios.
60Ang Dios naghatag sa adlaw, bulan kag mga bituon sing kasanag kag sila nagatuman sa iya. 61Amo man ini ang ginabuhat sang kilat kag sang hangin. Ang kilat makita sa malayo kag sa malapad nga lugar kag ang hangin nagahuyop sa tanan nga mga lugar. 62Kon ang Dios nagmando sa mga panganod nga maglapta sila sa bug-os nga duta, ini sila nagatuman. 63Kon ang Dios magpadala sang kalayo gikan sa langit sa pagsunog sang mga kabukiran kag mga kakahuyan, nagatuman gilayon ini. Ang mga diosdios indi makabuhat sini nga mga butang, indi gani sila makailog sini sing maayo. 64Ngaa nga tawgon sila nga mga dios kon indi sila makabulig ukon makahalit sa aton sa bisan ano nga paagi? 65Inyo nahibaluan nga indi sila mga dios, gani indi kamo magsimba sa ila.
66Ining mga dios wala sing gahom sa mga hari, indi sila makabendisyon ukon makamaldisyon. 67Indi sila makabuhat para sa mga pungsod sang kon ano man nga mga tanda sa kalangitan, indi sila makasiga subong sang adlaw ukon sang bulan. 68Bisan ang mabangis nga mga sapat mas maayo sang sa sining mga diosdios, ang mga sapat sarang makadalagan palayo sa katalagman sa pag-apin sang ila kaugalingon. 69Gani maathag kaayo nga indi sila mga dios, gani indi kamo magsimba sa ila.
70Ining ila mga dios nga nahuman sa kahoy kag nahaklapan sang pilak kag bulawan kasubong sang tawotawo nga inugtabog sa mga uwak sa tunga sang kamaisan, bisan pa sila mismo indi makatabog sang mga uwak. 71Kasubong sila sang isa ka tunokon nga tanom sa tunga sang hardin, sa baylo nga magtabog sang mga pispis, nangin halapunan ini sing mga pispis. Ining mga dios kasubong sang bangkay nga ginhaboy sa kadudulman. 72Ang granate nga tela#1:72 tela: Sa Griego marmol. nga ila ginakunop nagakagisi, gani aton nahibaluan nga indi sila mga dios. Sa katapusan, ginaut-ot sila sang anay kag dayon wala na sila sing pulos bisan diin.
73Ang matarong nga tawo may bentaha sang sa iban nga mga tawo; wala sia nagahupot sing mga diosdios kag indi sila makautis sa iya.
Currently Selected:
Sulat ni Jeremias 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012