Levitico 8
8
Ang Pag-orden kay Aaron kag sa Iya mga Anak nga Lalaki
(Exo. 29:1-37)
1Ang Ginoo nagsiling kay Moises: 2“Dalha si Aaron kag ang iya mga anak nga lalaki sa pwertahan sang Tolda sang akon presensya kag dalha ang mga bayu sang mga pari, ang lana nga inughaplas, ang torite nga baka para sa halad tungod sa sala, ang duha ka mga karnero nga lalaki, kag ang isa ka alat nga tinapay nga wala sing lebadora. 3Dayon tipuna didto ang bug-os nga katilingban.”
4Gintuman ni Moises ang sugo sang Ginoo, kag sang matipon na ang katilingban, 5ginsingganan niya sila, “Ang akon pagahimuon karon amo ang ginsugo sang Ginoo.”
6Ginpakadto ni Moises si Aaron kag ang iya mga anak nga lalaki sa atubangan kag ginpapaligo niya sila. 7Ginpasuksok niya kay Aaron ang bayu kag ang sutana kag ang wagkos sa iya hawak. Ginpasuksok niya sa iya ang bestidora#8:7 BESTIDORA: Tan-awa ang Lista sang mga Pulong. kag ginhugot ini paagi sa pagtakod sang hinabol sing maayo nga paha sa palibot sang iya hawak. 8Gintakod niya kay Aaron ang hapin sa dughan kag ginbutang ang Urim kag Tumim#8:8 URIM KAG TUMIM: Duha ka mga butang nga gingamit sang pari sa paghibalo sang kabubot-on sang Dios. Indi gid mapat-od kon paano ini gingamit. sa sulod sini. 9Ginpasuksok ni Moises sa iya ang turbante sa iya ulo, kag sa atubangan sini ginbutang niya ang medalya nga bulawan, ang balaan nga tanda sang pagtugyan, suno sa ginsugo sang Ginoo.
10Dayon ginkuha ni Moises ang lana nga inughaplas kag ginwisikan niya ang Tolda sang presensya sang Ginoo kag ang tanan nga yara sa sini, kag sa sini nga paagi ginhalad niya ini tanan sa Ginoo. 11Nagkuha sia sing lana kag ginwisikan niya sing makapito ang altar kag ang iya sini mga gamit kag ang batya kag ang iya tulongtungan, agod mahalad ini sa Ginoo. 12Gin-ordinan niya si Aaron paagi sa pagbubo sing lana nga inughaplas sa iya ulo. 13Sa tapos sini, ginpakadto man ni Moises ang mga anak nga lalaki ni Aaron sa atubangan kag ginpasuksokan niya sila sing bayu, ginwagkusan sa ila mga hawak, kag gintakdan sing mga gora ang ila mga ulo, suno sa ginsugo sang Ginoo.
14Dayon nagdala si Moises sing torite nga baka para ihalad tungod sa sala, kag si Aaron kag ang iya mga anak nagtungtong sang ila mga kamot sa ulo sini. 15Gin-ihaw ini ni Moises kag nagkuha sia sing dugo, kag paagi sa iya tudlo ginhamlit ini sa mga sungaysungay sa mga pamusod sang altar, agod mahalad ini. Dayon gin-ula niya ang nabilin nga dugo sa sadsaran sang altar. Sa sini nga paagi ginhalad niya kag gintinluan ini. 16Ginkuha ni Moises ang tanan nga sapay sa mga kasudlan, ang labing maayo nga bahin sang atay, ang mga batubato upod ang sapay nga yara sa sini, kag ginsunog ini tanan sa altar. 17Ginkuha niya ang nabilin nga bahin sang torite nga baka lakip ang panit sini, ang karne, ang mga kasudlan, kag ginsunog ini sa gwa sang kampo, suno sa ginsugo sang Ginoo.
18Sa tapos sini, nagdala si Moises sing karnero nga lalaki para sa halad nga sinunog, kag si Aaron kag ang iya mga anak nagtungtong sang ila mga kamot sa ulo sini. 19Gin-ihaw ini ni Moises, kag ginwisik ang dugo sa apat ka mga kilid sang altar. 20-21Ginlasa niya ang karnero nga lalaki, ginhugasan niya ang mga kasudlan kag ang pangulihi nga mga tiil sa tubig, ginsunog niya sa altar ang ulo, ang sapay, kag ang tanan nga nabilin nga bahin sang karnero nga lalaki, suno sa ginsugo sang Ginoo. Ining halad nga sinunog isa ka halad nga kalan-on kag ang iya kahamot sini manginkahalamut-an sa Ginoo.
22Dayon nagdulot si Moises sang ikaduha nga karnero nga lalaki nga para sa pag-orden sang mga pari, kag si Aaron kag ang iya mga anak nagtungtong sang ila mga kamot sa ulo sini. 23Gin-ihaw ini ni Moises kag nagkuha sia sing dugo kag ginhamlit ini sa labit sang tuo nga dulonggan ni Aaron, sa kumalagko sang iya tuo nga kamot, kag sa kumalagko sang iya tuo nga tiil. 24Dayon ginpakadto niya ang mga anak ni Aaron sa atubangan kag ginhamlitan sing dugo ang mga labit sang ila tuo nga mga dulonggan, ang mga kumalagko sang ila tuo nga mga kamot, kag ang mga kumalagko sang ila tuo nga mga tiil. Dayon ginwisik ni Moises ang nabilin nga dugo sa apat ka mga kilid sang altar. 25Ginkuha niya ang sapay, ang matambok nga ikog, ang tanan nga sapay nga nagatabon sa mga kasudlan, ang labing maayo nga bahin sang atay, ang mga batubato upod sa mga sapay nga yara sa sini, kag ang pangulihi nga tuo nga tiil. 26Dayon nagkuha sia sing isa ka bilog nga tinapay halin sa alat nga nasudlan sang tinapay nga wala sing lebadora nga nahalad sa Ginoo, isa ka bilog nga tinapay nga naluto sa lana, kag isa ka manipis nga tinapay, kag ginbutang niya ini sa ibabaw sang sapay kag sang pangulihi nga tuo nga tiil. 27Ginbutang niya ini tanan nga kalan-on sa mga kamot ni Aaron kag sang iya mga anak, kag ginhalad nila ini subong isa ka pinasahi nga dulot sa Ginoo. 28Dayon ginkuha ni Moises sa ila ang kalan-on kag ginsunog ini sa altar, sa ibabaw sang halad nga sinunog, subong isa ka halad tungod sang pag-orden. Isa ini ka halad nga kalan-on kag ang iya kahamot sini manginkahalamut-an sa Ginoo. 29Dayon ginkuha ni Moises ang dughan kag ginhalad ini subong isa ka pinasahi nga dulot sa Ginoo. Amo ini ang bahin ni Moises sa karnero nga ginhalad tungod sa pag-orden. Ginhimo ni Moises ang tanan suno sa ginsugo sang Ginoo.
30Nagkuha si Moises sang bahin sang lana nga inughaplas kag sang dugo nga yara sa altar kag ginwisik ini kay Aaron kag sa iya mga anak sa ila mga bayu. Sa sini nga paagi ginpakabalaan niya sila kag ang ila mga bayu sa Ginoo.
31Ginsingganan ni Moises si Aaron kag ang iya mga anak: “Dalha ang karne sa pwertahan sang Tolda sang presensya sang Ginoo, lagaa ini, kag kauna ini didto upod sa tinapay nga yara sa alat nga nasudlan sang mga halad tungod sang pag-orden, suno sa sugo sang Ginoo. 32Sunoga ang karne ukon ang tinapay nga mabilin. 33Indi ninyo pagbayaan ang pwerta sang Tolda sa sulod sang pito ka adlaw, tubtob matapos ang pag-orden sa inyo. 34Ang Ginoo nagmando sa aton sa paghimo sining nahimo naton karon nga adlaw, agod sa pagkuha sang inyo mga sala. 35Kinahanglan magpabilin kamo sa pwertahan sang Tolda sa adlaw kag gab-i sa sulod sang pito ka adlaw, nga nagahimo sang ginsugo sang Ginoo. Kon indi kamo magtuman sini, magakalamatay kamo. Amo ini ang ginsugo sang Ginoo sa akon.” 36Gani si Aaron kag ang iya mga anak nagtuman sang tanan nga ginsugo sang Ginoo paagi kay Moises.
Currently Selected:
Levitico 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
