Levitico 22
22
Ang Pagkabalaan sang mga Halad
1Ang Ginoo nagsugo kay Moises: 2“Singgana si Aaron kag ang iya mga anak nga lalaki nga ila tahuron ang balaan nga mga halad nga ginadulot sa akon sang mga tawo sang Israel, agod indi mahuy-an ang akon balaan nga ngalan. Ako amo ang Ginoo. 3Kon ang bisan sin-o sang inyo mga kaliwat, samtang di-matinlo pa sia, magpalapit sa balaan nga mga halad nga gindulot sa akon sang mga tawo sang Israel, indi na gid sia makaalagad sa akon presensya. Pagatumanon ini sa tanan nga panahon nga palaabuton. Ako amo ang Ginoo.
4“Wala sing kaliwat ni Aaron nga may makalalaton nga balatian sa panit ukon ginapanggwaan, nga sarang makakaon sang balaan nga mga halad tubtob nga magmatinlo sia. Ang bisan sin-o nga pari nga makatandog sang bisan ano nga butang nga di-matinlo paagi sa pagtandog sang bangkay sang tawo ukon sang tawo nga ginpanggwaan sang iya binhi 5ukon makatandog sang isa ka di-matinlo nga sapat ukon sa isa ka tawo nga di-matinlo mangindi-matinlo sia. 6Ang bisan sin-o nga pari nga nangindi-matinlo magapabilin nga di-matinlo tubtob sa gab-i, kag wala sapayan sini, indi sia sarang makakaon sang bisan ano nga balaan nga mga halad tubtob makapaligo sia. 7Sa tapos magtunod ang adlaw matinlo na sia, kag sarang na sia makakaon sang balaan nga mga halad nga amo ang iya kalan-on. 8Indi sia magkaon sang karne sang bisan ano nga sapat nga napatay ukon ginpatay sang mapintas nga mga sapat, kay magadagta ini sa iya. Ako amo ang Ginoo.
9“Ang tanan nga mga pari magatuman sang mga pagsulondan nga akon ginhatag. Kon indi sila magtuman magamalinapason sila kag magakalamatay, tungod kay ginlapas nila ang balaan nga mga pagsulondan. Ako amo ang Ginoo kag ginapakabalaan ko sila.
10“Ang katapo lamang sang panimalay sang pari amo ang sarang makakaon sang bisan ano nga balaan nga mga dulot, kag wala na sing iban nga sarang makakaon sini, bisan gani ang isa nga nagadayon sa balay sang pari ukon ang iya sinuholan. 11Pero ang isa ka ulipon sang pari, nga iya ginbakal sang iya kaugalingon nga kwarta ukon natawo sa iya balay, sarang makakaon sang kalan-on nga ginabaton sang pari. 12Ang anak nga babayi sang pari nga makapamana sang indi pari indi sarang makakaon sang bisan ano sang balaan nga mga halad. 13Pero ang isa ka anak nga babayi nga nabalo ukon ginbulagan, nga wala sing mga anak, kag nagpauli sa pag-estar sa balay sang iya amay subong isa ka salaguron, sarang makakaon sang kalan-on nga ginabaton sang iya amay subong isa ka pari. Ang katapo lamang sang panimalay sang pari ang sarang makakaon sang bisan ano nga bahin sini.
14“Kon ang bisan sin-o nga indi katapo sang panimalay sang pari nga makakaon sang bisan ano nga bahin sang balaan nga dulot sa indi hungod, kinahanglan magbayad sia sa pari sang bug-os nga bili sini kag magadugang sing baynte ka porsiento. 15Indi pagpasipakpakan sang mga pari ang balaan nga mga halad 16paagi sa pagpakaon sini sa tawo nga indi takos, kay tungod sini magalapas kag pagasilutan ang amo nga tawo. Ako amo ang Ginoo kag ginapakabalaan ko ang mga halad.”
17Ginsugo sang Ginoo si Moises: 18“Ihatag kay Aaron kag sa iya mga anak nga lalaki kag sa tanan nga mga tawo sang Israel ang masunod nga mga pagsulondan. Kon ang bisan sin-o nga Israelinhon ukon dumoluong nga nagaestar sa Israel magdulot sang isa ka halad nga sinunog, bisan ini isa ka pagtuman sang saad ukon isa ka halad nga kinabubot-on, ang sapat kinahanglan wala sing bisan ano nga depekto. 19Agod nga mabaton ini kinahanglan isa ini ka baka, ukon karnero, ukon kanding nga lalaki nga wala sing bisan ano nga depekto. 20Kon#Deut. 17:1. maghalad kamo sang bisan ano nga sapat nga may depekto, ako indi magbaton sini. 21Kon ang bisan sin-o nga magdulot sa akon sang halad sa paghiambit, bisan ini isa ka pagtuman sang saad ukon isa ka halad nga kinabubot-on, ang sapat kinahanglan wala sing bisan ano nga depekto agod batunon ini. 22Indi kamo maghalad sa akon sang bisan ano nga sapat nga bulag, ukon piang, ukon madamo sang pilas, ukon may nagabuswang nga hubag, ukon katulon ukon arikison. Indi kamo magdulot sini nga sahi sang mga sapat sa altar subong isa ka halad nga kalan-on paagi sa kalayo. 23Sarang kamo makadulot subong isa ka halad nga kinabubot-on sing isa ka sapat nga arikutoy ukon kiwi, pero indi ini mabaton subong isa ka pagtuman sang saad. 24Indi kamo maghalad sa akon sang bisan ano nga sapat nga napus-an, napilasan, nabagrasan ukon nautdan sing itlog. Wala ini ginatugot sa inyo duta.
25“Indi kamo magdulot subong isa ka halad nga kalan-on paagi sa kalayo sang bisan ano nga sapat nga inyo nakuha sa isa ka dumoluong. Ini nga sahi sang mga sapat ginakabig nga may depekto kag indi sarang mabaton.
26-27“Kon matawo ang isa ka tinday nga baka, kordero, ukon kanding, indi ini pagkuhaon sa iya inang sa sulod sang pito ka adlaw, pero sa tapos sini, sarang na ini mabaton subong isa ka halad nga kalan-on paagi sa kalayo. 28Indi kamo maghalad sang isa ka inang nga baka upod sa iya tinday ukon isa ka inang nga karnero upod sa iya tinday ukon isa ka inang nga kanding upod sa iya tinday sa amo man nga adlaw. 29Kon magdulot kamo sang isa ka halad sa pagpasalamat sa akon, sunda ninyo ang mga pagsulondan agod batunon kamo, 30kauna ninyo ini sa amo gid nga adlaw kag indi kamo magbilin sang bahin sini tubtob sa madason nga aga.”
31Ang Ginoo nagsiling, “Tumana ninyo ang akon mga sugo, ako amo ang Ginoo. 32Indi ninyo pagpakahuy-i ang akon balaan nga ngalan, ang tanan nga tawo sang Israel kinahanglan magkilala nga ako balaan. Ako amo ang Ginoo kag ako nagapakabalaan sa inyo, 33kag gindala ko kamo pa gwa sa Ehipto agod ako mangin-inyo Dios. Ako amo ang Ginoo.”
Currently Selected:
Levitico 22: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
