Levitico 2
2
Mga Halad nga Kalan-on nga Nahimo sa Uyas
1“Ang bisan sin-o nga magdulot sa akon sing halad nga kalan-on halin sa uyas, kinahanglan ini manginpinili nga harina. Dapat butangan niya ini sing lana sang olivo kag insyenso, 2kag dalhon niya ini sa mga pari nga kaliwat ni Aaron. Ang pari nga nagaalagad magakuha sing isa ka hakop sang pinili nga harina kag lana lakip ang tanan nga insyenso kag sunogon niya ini sa altar subong isa ka tanda nga ini tanan nahalad sa akon. Ang kahamot sining halad nga kalan-on manginkahalamut-an sa akon. 3Ang nabilin sang halad nga kalan-on iya sang mga pari, labing balaan ini, tungod kay bahin ini sang kalan-on nga ginhalad sa akon, ang Ginoo.
4“Kon ang halad isa ka tinapay nga naluto sa horno, kinahanglan lutoon ini nga wala sing lebadora. Ayhan madamol ini nga tinapay nga nahimo sa pinili nga harina nga nasamuan sing lana sang olivo ukon manipis nga tinapay nga nahamlitan sing lana sang olivo.
5“Kon ang halad isa ka tinapay nga naluto sa sartin, kinahanglan nahimo ini sa pinili nga harina nga nasamuan sing lana sang olivo, pero wala sing lebadora. 6Pudpora ini kag buboan pa gid sing lana kon idulot mo ini subong isa ka halad.
7“Kon ang halad isa ka tinapay nga naluto sa kalaha, kinahanglan nahimo ini sa pinili nga harina kag lana sang olivo. 8Dalha ini subong isa ka halad sa akon kag ihatag ini sa pari nga amo ang magadala sini sa altar. 9Kag ang pari magakuha sang bahin sini nga halad nga kalan-on subong isa ka tanda nga ini tanan nahalad sa akon, kag sunogon niya ini sa altar. Ang kahamot sining halad nga kalan-on manginkahalamut-an sa akon. 10Ang nabilin sang halad iya sang mga pari, labing balaan ini tungod kay bahin ini sang kalan-on nga ginhalad sa akon, ang Ginoo.
11“Wala sing halad nga kalan-on nga may lebadora nga inyo ihalad sa akon, indi gid kamo maggamit sing lebadora ukon dugos sa kalan-on nga ginahalad sa akon. 12Ang halad sang nahauna nga patubas nga inyo ginaani sa tagsa ka tuig pagadalhon sa akon, pero indi ini pagsunogon sa altar. 13Asini ang tagsa ka halad nga kalan-on, tungod kay ang asin tanda sang kasugtanan sa tunga naton. Gani kinahanglan asinan ninyo ang tanan ninyo nga mga halad. 14Kon magdala kamo sa akon sang halad sang nahauna nga patubas sang uyas, magdulot kamo sang sinanlag nga uyas ukon ginaling nga kalan-on. 15Butangi ini sing lana sang olivo kag insyenso, ini halad nga kalan-on. 16Ang pari magasunog sang bahin sang ginaling nga kalan-on kag sang lana subong isa ka tanda, kag sang tanan man nga insyenso, subong isa ka halad nga kalan-on sa akon, ang Ginoo.
Currently Selected:
Levitico 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
