Levitico 11
11
Mga Sapat nga Sarang Makaon
(Deut. 14:3-21)
1Ang Ginoo naghatag kay Moises kag kay Aaron sining masunod nga mga pagsulondan: 2“Ihambal sa mga katawhan sang Israel nga sarang kamo makakaon sang bisan ano nga sapat sa duta 3nga may nagapihak nga mga kuko kag nagapangusang man. 4-6Pero indi kamo magkaon sang mga kamelyo, mga ilaga sa kabatuhan, ukon mga koneho. Kabigon sila nga di-matinlo, tungod kay wala nagapihak ang ila mga kuko bisan nga nagapangusang sila. 7Indi kamo magkaon sang baboy. Kabigon sila nga di-matinlo, nagapihak ang ila mga kuko, pero wala sila nagapangusang. 8Indi kamo magkaon sini nga mga sapat ukon magtandog sang ila patay nga mga lawas, kay di-matinlo sila.
9“Sarang kamo makakaon sang bisan ano nga isda nga may mga kapay kag himbis, 10pero ang bisan ano nga nagaestar sa tubig nga wala sing mga kapay kag himbis indi pagkaunon. 11Ini nga mga tinuga kinahanglan kabigon nga di-matinlo. Indi kamo dapat magkaon sini ukon magtandog sang ila patay nga mga lawas. 12Indi kamo magkaon sang bisan ano nga nagaestar sa tubig nga wala sing mga kapay ukon himbis.
13-19“Indi kamo magkaon sining masunod nga mga pispis: agila, bukaw, dapay, falcon; tikwi, buwitre, uwak; ostrit; gabiota, dugwak, tulabong, pelicano, somorguho;#11:13-19 Ang ngalan sining iban nga mga pispis indi mapat-od. abubilla; ukon kabog.
20“Ang tanan nga sapatsapat nga may mga pakpak di-matinlo, 21luas lamang sa mga nagalumpatlumpat. 22Sarang kamo makakaon sang mga apan, mga sirumsirom, ukon mga tibakla. 23Pero ang iban nga magamay nga mga sapatsapat nga may mga pakpak kag nagasaog man pagakabigon nga di-matinlo.
24-28“Ang bisan sin-o nga makatandog sang patay nga mga lawas sang masunod nga mga sapat mangindi-matinlo tubtob sa gab-i. Ang tanan nga mga sapat nga may kuko, luas lamang kon ang ila mga kuko nagapihak kag nagapangusang sila, kag ang tanan nga sapat nga may apat ka mga tiil nga may inugkaros. Ang bisan sin-o nga magdala sang ila patay nga mga lawas, kinahanglan maglaba sang iya mga bayu, pero mangindi-matinlo pa gihapon sia tubtob sa gab-i.
29“Ini nga mga sapat kinahanglan kabigon nga di-matinlo: ang mole, ilaga, giting, kag ang daku nga halo suno sa iya sari; 30ang tuko, ang buaya, ang taguto, ang tambalihan, kag ang kamelyon. 31Ang bisan sin-o nga makatandog sa ila ukon sang ila patay nga mga lawas mangindi-matinlo tubtob sa gab-i. 32Kag ang matup-an sang ila patay nga mga lawas mangindi-matinlo: ang bisan ano nga gamit nga kahoy, panapton, panit, ukon sako, sa bisan ano man ini ginagamit. Itum-oy ini sa tubig, pero mangindi-matinlo ini tubtob sa gab-i. 33Kag kon ang ila mga lawas mahulog sa isa ka banga, ang tanan nga unod sini mangindi-matinlo, kag kinahanglan buongon ninyo ang banga. 34Ang bisan ano nga kalan-on nga sarang makaon, pero naulaan sang tubig halin sa sini nga sulodlan, mangindi-matinlo, kag ang bisan ano nga sarang mainom sa sini nga sulodlan mangindi-matinlo. 35Ang bisan ano nga mahulogan sang patay nga mga lawas mangindi-matinlo; ang dapog ukon pugon nga duta pagagub-on, 36pero ang isa ka tuboran ukon bubon magapabilin nga matinlo, bisan nga ang iban nga butang nga makatandog sang ila patay nga mga lawas mangindi-matinlo. 37Kon ang isa sini sa ila mahulog sa binhi nga inugtanom, ang binhi magapabilin nga matinlo. 38Pero kon ang binhi nahulom sa tubig, kag mahulogan ini sang isa sa ila, ang binhi mangindi-matinlo.
39“Kon ang bisan ano nga sapat nga sarang makaon mapatay, ang bisan sin-o nga makatandog sini mangindi-matinlo tubtob sa gab-i. 40Kag ang bisan sin-o nga magkaon sang bisan ano nga bahin sini nga sapat, kinahanglan maglaba sang iya mga bayu, pero magapabilin sia nga di-matinlo tubtob sa gab-i. Ang bisan sin-o nga magdala sang patay nga lawas kinahanglan maglaba sang iya mga bayu, pero mangindi-matinlo gihapon sia tubtob sa gab-i.
41“Indi kamo magkaon sang bisan ano nga magamay nga mga sapat nga nagagiho sa duta, 42bisan ang nagasaog sa iya tiyan ukon ang nagalakat sa iya apat ka mga tiil, ukon ang may madamo sing mga tiil. 43Indi ninyo pagdagtai ang inyo kaugalingon paagi sa pagkaon sang bisan isa sini. 44Ako#Lev. 19:2; 1 Ped. 1:16. amo ang Ginoo nga inyo Dios, kag dapat ninyo tipigan ang inyo kaugalingon nga manginbalaan, tungod kay ako balaan. 45Ako amo ang Ginoo nga nagpagwa sa inyo sa Ehipto agod ako mangin-inyo Dios. Kinahanglan magmanginbalaan kamo, tungod kay ako balaan.”
46Gani, amo ini ang kasugoan nahanungod sa mga sapat, mga pispis, sa tanan nga mga butang nga nagaestar sa tubig kag sa tanan nga mga butang nga nagagiho sa duta. 47Butangan ninyo sing kinatuhay kon ano ang matinlo kag ang di-matinlo, kon ano ang mga sapat nga sarang makaon kag ang mga indi sarang makaon.
Currently Selected:
Levitico 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
