Josue 3
3
Ang mga Israelinhon Nagtabok sa Suba sang Jordan
1Aga pa gid sang masunod nga adlaw nagbangon si Josue kag ang tanan nga mga tawo sang Israel. Naghalin sila sa lugar nga ginatawag Sitim, kag nagkadto sila sa Jordan. Naghimo anay sila sang kampo didto, sa wala pa sila magtabok. 2Sa tapos ang tatlo ka adlaw, ang mga pangulo naglibot sa kampo 3kag ginsingganan ang mga tawo, “Kon makita ninyo nga ginadala sang mga pari nga Levinhon ang Kaban sang Kasugtanan sang Ginoo nga inyo Dios, panghimos kamo kag sundon ini. 4Dayon mahibaluan ninyo kon diin kamo maagi, kay wala pa ninyo maagyi ini nga dalan. Pero indi kamo magpalapit sa Kaban sang Kasugtanan. Mag-antad kamo sing mga isa ka kilometro sa ulihi sini.”
5Ginsingganan ni Josue ang mga tawo, “Magpakaputli kamo, tungod kay buas ang Ginoo magahimo sing mga milagro sa tunga ninyo.” 6Dayon ginsingganan ni Josue ang mga pari, “Pas-ana ninyo ang Kaban sang Kasugtanan, kag maglakat kamo nga nagauna sa mga tawo.” Kag gintuman nila ang ginsiling ni Josue.
7Dayon nagsiling ang Ginoo sa kay Josue, “Sa akon pagahimuon karon nga adlaw, ang tanan nga mga tawo sang Israel magapasidungog sa imo subong isa ka gamhanan nga tawo, kag mahibaluan nila nga ako nagaupod sa imo subong nga ako nag-upod kay Moises. 8Mandui ang mga pari nga nagadala sang Kaban sang Kasugtanan, ‘Kon mag-abot kamo sa Suba sang Jordan, mag-ubog kamo sa tubig kag magtindog malapit sa pangpang.’”
9Karon si Josue nagsiling sa mga tawo, “Dali kamo, kag pamatii ang ginasiling sang Ginoo nga inyo Dios. 10Sa sini inyo mahibaluan nga ang Dios nga buhi yara kaupod ninyo. Samtang nagapasulod kamo, tabugon niya ang mga Canaanhon, ang mga Hethanon, ang mga Hevhanon, ang mga Paresnon, ang mga Gergasnon, ang mga Amornon, kag ang mga Jebusnon. 11Ang Kaban sang Kasugtanan sang Ginoo sang bug-os nga duta, pagapas-anon sang mga pari nga nagatabok sa Jordan nga nagauna sa inyo. 12Karon magpili ka sing dose ka mga tawo, isa sa tagsa ka tribo sang Israel. 13Kon ang mga pari nga nagadala sang Kaban sang Kasugtanan sang Ginoo sang bug-os nga duta, mag-ubog sang ila mga tiil sa tubig, ang Suba sang Jordan magauntat sa pag-ilig, kag ang tubig nga nagailig halin sa ilaya magapunong sa isa ka lugar.”
14-15Tig-alani sadto nga tion, kag nag-awas ang suba.
Gani ang mga tawo naghalin sang kampo agod sa pagtabok sa Jordan. Nag-una ang mga pari sa ila, nga nagadala sang Kaban sang Kasugtanan. Sang pagtupa sang ila mga tiil sa tubig, 16nag-untat sa pag-ilig ang tubig, kag nagpunong ini pa ilaya sa siudad sang Adan, nga yara sa tupad sang Saretan. Ang ilig pa ilawod pakadto sa Dagat nga Patay nag-untat gid sing bug-os, kag ang mga tawo nagtabok sa lugar nga malapit sa Jerico. 17Samtang nagatabok sila nga nagalakat sa mamala nga duta, ang mga pari nga nagadala sang Kaban sang Kasugtanan sang Ginoo nagtindog sa mamala nga duta sa tunga sang Jordan, tubtob nakatabok ang tanan nga mga tawo.
Currently Selected:
Josue 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
