Josue 16
16
Ang mga Kadutaan ni Efraim kag ni Manases
1Ang nabagatnan nga dulonan sang duta nga natuon sa mga kaliwat ni Jose, naglambot halin sa Jordan malapit sa Jerico, sa sidlangan sang mga tuboran sang Jerico, pakadto sa desierto. Halin sa Jerico nagpadulong ini sa kabakuloran tubtob sa Betel. 2Halin sa Betel nagpakadto ini sa Luz, kag nagaagi sa Atarot-adar sa diin nag-estar ang mga Arkinhon. 3Kag nagpadayon ini sa nakatundan pakadto sa lugar sang mga Hapletnon, tubtob sa lugar sang Naubos nga Bet-horon. Halin didto nagpadulong ini sa Gezer, kag nagtapos sa Dagat sang Mediteraneo.
4Ang mga kaliwat ni Jose, nga amo ang mga tribo ni Manases sa Nakatundan kag ni Efraim, nagbaton sini nga duta subong mangin-ila pagapanag-iyahan.
Ang Kadutaan nga Ginhatag sa Tribo ni Efraim
5Amo ini ang kadutaan sang mga panimalay sang tribo ni Efraim: ang ila dulonan sa sidlangan amo ang Atarot-adar tubtob sa Naibabaw nga Bet-horon. 6Halin didto naglambot ini sa Dagat sang Mediteraneo. Sa aminhan nila amo ang Mikmetat. Sa sidlangan ang dulonan nagaliko pakadto sa Taanat-silo, kag nagaagi ini sa sidlangan sang Janoa. 7Kag halin sa Janoa nagapadulhog ini sa Atarot kag Naarat. Naglambot ini sa Jerico kag nag-untat sa Jordan. 8Halin sa Tapua ang dulonan nagpadulong sa nakatundan pakadto sa sapa sang Kana, kag nag-untat sa Dagat sang Mediteraneo. Amo ini ang duta nga ginhatag sa mga panimalay sang tribo ni Efraim subong mangin-ila pagapanag-iyahan 9lakip ang mga banwa kag mga kabarangayan nga ginhatag sa mga Efraimnon, nga nasakop sang mga dulonan ni Manases. 10Pero#Huk. 1:29. wala nila pagtabuga ang mga Canaanhon nga nag-estar sa Gezer, gani ang mga Canaanhon nag-estar upod sa mga Efraimnon tubtob sini nga adlaw, pero ginhimo sila nga mga ulipon.
Currently Selected:
Josue 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
