Josue 11
11
Si Jabin kag ang Iya mga Kadampig Nalutos ni Josue
1Si Jabin nga hari sang Hasor nakabalita nahanungod sang mga kadalag-an sang mga Israelinhon. Nagpasugo sia sa kay Hobab nga hari sang Madon, sa mga hari sang Simron kag Aksap, 2sa mga hari sang banwa sa kabakuloran sa naaminhan, sa Kapatagan sang Jordan sa nabagatnan sang Linaw sang Galilea, sa kapatagan, kag sa baybayon malapit sa Dor. 3Nagpasugo man sia sa mga hari sang mga Canaanhon sa magtimbang nga bahin sang Suba sang Jordan, sang mga Amornon, sang mga Hethanon, sang mga Peresnon, sang mga Jebusnon sa kabakuloran. Subong man nagpasugo sia sa hari sang mga Hevhanon nga nagaestar sa kunsaran sang Bukid sang Hermon sa duta sang Mispa. 4Nag-abot sila upod sang tanan nila nga mga hangaway, nga ang kadamuon sang ila mga soldado subong sang mga balas sa baybayon. May madamo sila nga mga kabayo kag mga karwahi sa inaway. 5Ini tanan nga mga hari nagtingob sang ila mga hangaway, kag nagtipon sila sing tingob kag nagpatindog sila sang kampo sa mga Tuboran sang Merom, sa pagpakig-away batok sa Israel.
6Ang Ginoo nagsiling kay Josue, “Indi ka magkahadlok sa ila. Buas sa sini nga tion, pamatyon ko na sila tanan tungod sa Israel. Imo pamiangon ang ila mga kabayo kag sunogon ang ila mga karwahi.” 7Gani si Josue kag ang tanan niya nga tinawo nagsalakay sa ila sa hinali sa mga Tuboran sang Merom. 8Ang Ginoo nagpadaog sa mga Israelinhon batok sa ila. Ginsalakay sila sang mga Israelinhon, kag ginlagas sila tubtob sa naaminhan pakadto sa Daku nga Sidon kag sa Misrepot-maim, tubtob sa sidlangan pakadto sa kapatagan sang Mispa. Nagpadayon sila sa pagpakig-away tubtob nga wala na sing kaaway nga nabilin nga buhi. 9Ginhimo sa ila ni Josue ang ginsugo sang Ginoo: ginpamiang niya ang ila mga kabayo, kag ginpangsunog ang ila mga karwahi.
10Dayon si Josue nagbalik, gin-agaw niya ang Hasor kag ginpatay ang hari sini. Sa sadto nga tion ang Hasor amo ang labing gamhanan sa tanan nga mga ginharian. 11Ginpamatay nila ang tanan didto. Wala sing isa nga nabilin nga buhi, kag ginsunog nila ang siudad.
12Ginpang-agaw ni Josue ang tanan nga mga siudad, kag ginpangdakop ang tanan nila nga mga hari. Ginpamatay niya sila tanan subong sang ginmando ni Moises nga alagad sang Ginoo. 13Pero ang mga siudad nga yara sa kabakuloran, wala ginsunog sang mga Israelinhon, luas lamang sa Hasor nga gintutdan ni Josue. 14Ginkuha sang mga tawo sang Israel ang tanan nga malahalon nga mga pagkabutang kag mga hayop halin sa sini nga mga siudad kag ginkuha nila ini para sa ila kaugalingon. Pero ila ginpamatay ang tanan nga mga tawo didto. Wala sing isa nga nabilin nga buhi. 15Ang Ginoo naghatag sini nga mga sugo sa iya alagad nga si Moises. Si Moises naghatag sini kay Josue, kag gintuman ini ni Josue. Gintuman niya ang tanan nga ginsugo sang Ginoo paagi kay Moises.
Gin-agaw ni Josue ang Bug-os nga Kadutaan
16Gin-agaw ni Josue ang bug-os nga kadutaan: ang mga lugar sa kabakuloran, ang tanan nga kadutaan sa Negeb, ang tanan nga duta sang Gosen, ang kapatagan, ang Kapatagan sang Jordan, ang mga kabukiran kag ang kapatagan sang Israel. 17-18Ang kadutaan nagasugod halin sa Bukid sang Halak sa nabagatnan malapit sa Edom, tubtob sa Baalgad sa naaminhan, sa kapatagan sang Libano sa nabagatnan sang Bukid sang Hermon. Ginpangdakop kag ginpamatay niya ang tanan nila nga mga hari sa tapos sang iya malawig nga pagpakig-away sa ila. 19Wala gid sing mga siudad nga nagpakighidait sa mga tawo sang Israel, luas lamang sa Gabaon, diin nagaestar ang mga Hevhanon. Ang iban iya ginapangdaog sa inaway. 20Ang#Deut. 7:16. Ginoo nagpatig-a sang ila mga tagipusoon sa pagpakig-away sa mga Israelinhon, agod malaglag sila sing bug-os kag mapamatay sila tanan nga wala sing luoyluoy. Amo ini ang ginsugo sang Ginoo kay Moises.
21Sa sadto nga tion si Josue naglakat, kag ginpapas ang mga higante nga Anakimnon nga nagaestar sa kabakuloran—sa Hebron, Debir, Anab, kag sa tanan nga mga kabakuloran sang Juda kag Israel. Ginpapas sila tanan ni Josue kag ginpangguba ang ila mga siudad. 22Wala sing mga Anakimnon nga nabilin sa duta sang Israel. Pero may pila pa ka bilog nga nabilin sa Gaza, sa Gat, kag sa Asdod.
23Gin-agaw ni Josue ang bug-os nga duta suno sa ginsugo sang Ginoo kay Moises. Ginhatag niya ini sa mga Israelinhon nga mangin-ila kaugalingon, kag ginpartida niya ini sa tagsa ka tribo.
Gani ang mga tawo nagpahuway gikan sa inaway.
Currently Selected:
Josue 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
