Jonas 3
3
Si Jonas Nagtuman sa Ginoo
1Sa liwat ang Ginoo nagsiling kay Jonas, 2“Magkadto ka sa Ninive, inang daku nga siudad kag iwali sa mga tawo ang mga pulong nga ginhatag ko sa imo.” 3Gani si Jonas nagtuman sa Ginoo kag nagkadto sa Ninive, ang isa ka daku nga siudad nga ang iya kasangkaron nagakinahanglan sing tatlo ka adlaw nga paglakat, halin sa pihak pakadto sa pihak. 4Si#Mat. 12:41; Luc. 11:32. Jonas nagsulod sa siudad kag sang makalakat sia sing isa ka adlaw nagwali sia, “Sa tapos ang kwarenta ka adlaw ang Ninive pagalaglagon!”
5Ang mga tawo sang Ninive nagtuo sa pulong sang Dios. Gani nagpamat-od sila nga ang tagsatagsa dapat magpuasa, kag ang tanan nga mga pumoluyo halin sa kadalagkuan tubtob sa labing kubos, magbayu sing sako sa pagpakilala nga naghinulsol sila.
6Sang pagkabati sang hari sang Ninive nahanungod sini, nanaog sia sa iya trono, gin-uba niya ang iya kapa, nagbayo sang sako kag nagpungko sa abo. 7Nagmando sia sa mga tawo sang Ninive nga nagasiling, “Amo ini ang mando gikan sa hari kag sa iya mga opisyales: Wala sing may magkaon bisan ano, tanan nga mga tawo, mga baka kag mga karnero ginadumilian sa pagkaon ukon pag-inom. 8Ang tanan nga mga tawo kag mga kasapatan dapat magbayu sang sako. Ang tagsatagsa dapat magpangamuyo sing hanuot sa Dios kag ang tagsatagsa dapat magbiya sang iya malaut nga mga pagginawi kag sang mga sala nga iya ginahimo. 9Ayhan ang Dios magabaylo sang iya hunahuna, kag indi na sia magkaakig, kag indi kita magkalamatay!”
10Nakita sang Dios ang ila ginhimo. Nakita niya ang ila pagbiya sang ila malaut nga mga pagginawi. Gani nagbaylo sia sang iya hunahuna kag wala niya sila pagsiluti suno sa iya ginsiling nga silutan sila.
Currently Selected:
Jonas 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
