Mga Hukom 3
3
Ang Ginbilin nga mga Pungsod sa Pagtilaw sang Israel
1Dayon ang Ginoo nagbilin sang iban nga mga pungsod sa duta sa pagtilaw sa mga Israelinhon nga wala makaagi sing mga inaway sa Canaan. 2Ginhimo ini sang Ginoo agod lamang matudloan ang tagsa ka kaliwatan sang mga Israelinhon nahanungod sa inaway, labi na gid yadtong mga wala pa gid makaagi sa pagpakig-away halin sang una. 3Yadtong mga nabilin sa duta amo ang lima ka mga siudad sang mga Filistinhon, ang tanan nga mga Canaanhon, Sidonhon, kag Hevhanon nga nag-estar sa Bukid sang Libano, halin sa Kabukiran sang Baal-hermon tubtob sa Alagyan sang Hamat. 4Nabilin sila sa pagtilaw sa Israel, kon bala tumanon sang mga Israelinhon ukon indi ang mga sugo nga ginhatag sang Ginoo sa ila mga katigulangan paagi kay Moises. 5Gani ang mga tawo sang Israel nag-estar upod sa mga Canaanhon, mga Hethanon, mga Amornon, mga Peresnon, mga Hevhanon, kag mga Jebusnon. 6Nag-alasawahay sila kag nagsimba sila sa ila mga dios.
Si Otniel
7Ang mga tawo sang Israel nalipat sa Ginoo nga ila Dios. Nagpakasala sila batok sa iya, kag nagsimba sa mga Baal kag sa mga Asera. 8Gani ang Ginoo naakig gid sa Israel, kag ginpalutos niya sila sa kay Kusan-risataim nga hari sang Mesopotamia. Gingamhan niya sila sa sulod sang walo ka tuig. 9Dayon ang mga Israelinhon nagpanawag sa Ginoo, kag nagpadala ang Ginoo sing tawo nga nagluwas sa ila. Amo ini si Otniel, nga anak ni Kenaz nga manghod ni Caleb. 10Gingamhan sia sang Espiritu sang Ginoo, kag nanginhukom sia sang Israel. Nagpangulo si Otniel sa inaway, kag ginpadaog sia sang Ginoo batok sa hari sang Mesopotamia. 11Nagluntad ang kalinong sa duta sa sulod sang kwarenta ka tuig. Sang ulihi, si Otniel nga anak ni Kenaz, napatay.
Si Ehud
12Ang mga tawo sang Israel nagpakasala liwat batok sa Ginoo. Tungod sini, ginpabakod sang Ginoo si Eglon nga hari sang Moab batok sa Israel. 13Nagbuylog si Eglon sa mga Amonhon kag sa mga Amaleknon. Ila ginlutos ang Israel, kag ila ginbihag ang Jerico, ang siudad sang mga palma. 14Ang mga Israelinhon gingamhan ni Eglon sa sulod sang desi-otso ka tuig.
15Dayon ang mga Israelinhon nagpanawag sa Ginoo, kag nagpadala sia sing isa ka tawo sa pagluwas sa ila. Amo ini si Ehud, ang tawo nga walis, nga anak ni Gera, halin sa tribo ni Benjamin. Ang mga tawo sang Israel nagpadala kay Eglon nga hari sang Moab sing mga regalo paagi kay Ehud. 16Naghimo si Ehud sing espada nga doble sing sulab, nga mga isa ka tapak kag tunga ang kalabaon. Gintago niya ini sa sulod sang iya bayu sa iya tuo nga paa. 17Dayon gindala niya ang mga regalo sa kay Eglon. Si Eglon isa ka tawo nga tama katambok. 18Sang mahatag na ni Ehud sa iya ang mga regalo, ginpalakat niya ang mga tawo nga nagdala sang mga regalo. 19Pero si Ehud mismo nagbalik sa may sininsil nga mga bato malapit sa Gilgal nagbalik kay Eglon kag nagsiling, “Mahal nga hari, may sekrito ako nga balita para sa imo.”
Gani ginmanduan sang hari ang iya mga ulipon, “Bayai ninyo kami diri!” Kag naggwa sila tanan.
20Dayon samtang isa na lang ang hari nga nagapungko sa iya mabugnaw nga kwarto sa atop, ginpalapitan sia ni Ehud kag nagsiling, “May mensahe ako sa imo halin sa Dios.” Nagtindog dayon ang hari. 21Gingabot ni Ehud sang iya wala nga kamot ang espada gikan sa iya tuo nga paa kag ginbuno ang tiyan sang hari. 22Ang bug-os nga espada nagsalop tubtob sa iya pulo, kag gintabunan ini sang tambok, kay wala ini paggabuta ni Ehud gikan sa tiyan sang hari. Ang espada naglapos sa iya likod kag naggwa ang higko. 23Naggwa dayon si Ehud, iya ginsirahan ang mga pwertahan, ginkandaduhan ini 24kag naghalin. Nag-abot ang mga suloguon kag nakita nila ang mga pwertahan nga nakandaduhan. Naghunahuna lamang sila nga ang hari yara sa sulod nga nagapahuwayhuway. 25Naghulathulat sila tubtob nga tinak-an sila, pero wala pa gid niya pag-abrihi ang pwertahan tubtob tinak-an sila. Gani ginkuha nila ang yabi kag ginbuksan ang pwertahan, kag nakita nila ang ila agalon nga nagahamyang sa salog nga patay na.
26Nagpalagyo si Ehud samtang nagahinulat sila. Didto sia nag-agi sa mga bato nga sininsil, kag nagpalagyo pakadto sa Seira. 27Sang makaabot sia didto, nagpatunog sia sang budyong sa kabakuloran sang Efraim sa pagpanawag sa mga tawo sang Israel sa pagpakig-away. Kag nag-una sia sa ila sa pagdulhog sa mga kabakuloran. 28Ginsingganan niya sila, “Sunod kamo sa akon! Ang Ginoo naghatag sa inyo sing pagdaog batok sa inyo mga kaaway nga Moabnon.” Gani nagsunod sila sa iya sa pagdulhog kag gin-agaw nila ang lugar nga pagatabukan sang mga Moabnon sa Jordan. Wala nila pagpatabuka ang bisan isa lang ka tawo. 29Sa sadto gid nga adlaw ginpamatay nila ang mga 10,000 ka makusog kag isganan nga mga soldado nga Moabnon, kag wala sing isa nga nakapalagyo. 30Ginlutos sang mga Israelinhon ang Moab sadto nga adlaw. Nagluntad ang kalinong sa duta sa sulod sang otsenta ka tuig.
Si Samgar
31Ang madason nga hukom amo si Samgar, ang anak ni Anat. Ginpamatay niya ang 600 ka mga Filistinhon paagi sa suntok nga ginagamit sa baka. Sia man ang nagluwas sang Israel.
Currently Selected:
Mga Hukom 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
